FIFA World Cup Semi Final Khel tur te:- “Khawvela ennawm ropui ber” an lo tih thin, FIFA World Cup 2014 chu a hmawr an lo bawk hnai ta reng mai a, Semi Final Line-up a lo lang ta iar mai a, Team tenau ho an rawn tha ve hle a, Team lian ho awlsam takin an chaktir bik lova, First half-ah phei chuan goal an chhuah bik mang lo a ni. Nimahsela, a tawpkhawkah chuan, Team lian ho nge nge an rilru pau a khauh a, a tawp lamah chak ngei tumin an nawr tang tang peih deuh a, vanneihna changin, hnehtu dinhmunah an ding leh nge nge thin a tih theih awm e. A tlangpui thuin Result te hi rinlawk ang deuh vek anni ti ila a sual tampui awm lo ve, rinlawk loh deuh hlek, thil thleng danglam deuh leh rinlawk vak loh thenkhatte han tarlang ta I la:- 1) Champion lai Spain hi Group winner ni ngei tura ngaih leh Quarter final chu thleng ngei tura ngaih annih lain, an first match ah Netherland-in an sawp zek mai a, First round paltlang lovin an tla hian khawvel a barakhaih khawp mai. David Villa aia inhliam damkawr leh an khelhpui than lutuk loh Brazilian Diego Costa Striker atana Coach-in a ring tlat zawk hi, an chet chhiat chhan pakhat niin a lang a, Tin, tunlai football hi speed leh strength ah a innghat nasa tawh a, mawi taka ball chawha in pass hlek hlek(Tiki-taka) an tih ang hi a ding chang tawh lo a tih theih awm e. Brazil ho pawh hian an game mawi tak ‘Samba’ an tih kha an kalsan hlek hlek ta a nih hi. 2) Group of Death atanga Costa Rica ho an rawn Top nawlh mai hi rin phak bak a ni awm e. Pele-a khan, Costa Rica hi Kumin WC a ‘Surprise Package’ annih a rin thu a lo sawi lawk a, a sawi dik phian mai. 3) Colombia Rawlthar James Rodriguez a rawn par chhuak a, tunah an team tla tawh mahse, Goal 6 a thun hi khum an awm a rinawm tawh vak lo a, Golden boot a dawn ngei a rin awm. Tunah chuan, Semi Final khel turte han thlir thuak thuak ta I la:- 1) Netherland: Tuntum World Cup Semi finalist 4 te zinga Football Super Power an tithe zinga tel ve lo awm chhun an nia, Football Super Power 4 te zingah tel chiah lo mahse, Football thiam ram anni reng a, World Cup history a an record pawh hi a chhe lo viau a ni. Final tum 3 zet an lo thleng tawh a, Nimahsela, Final-ah hian a thlengtu ram an tum thei ang reng khawp mai a, 1970-1980 lai kha Johan Cruiff a hunlai kha a nia, ‘Total Football’ a rawn ching chhuak a, an thawm pawh ana hle a ni. 1974 khan a thlengtu West Germany nen Final khelin an vanduai hlauh a, 1978 pawh khan a thlengtu ram Argentina nen bawk Final an khel leh a, hemi tum pawh hian a thlengtu ram nge nge chu a vannei zawkah an tang leh a ni. World Cup hnuhnung ber South Africa ah khan Spain nen final khelin, a vanduai zawkah an tang leh hlauh mai a, Kuminah hian Van Gaal-an a rawn ho a, Coach tha tak hnuaiah hian an Champion thei tawh ang em? Football thiam ram, Player nei tha thei tak, Final-a vanduai thin Netherland hi Champion ve tawh se tih an duhsakawm khawp mai. 2) Argentina: Football Super Power 4 te zinga 1 Argentina hian World Cup-ah hian Final tum 4 zet an lo khel tawh a, chung zingah chuan tum 2 champion tawhin, tum 2 chu runner-up an lo ni tawh a ni. Tun Generation-ah hian, tunlaia Football thiamber tia mi tam takin an sawi thin leh Khawvela Football thiam ber lawman Ballon ‘D’ or pawh lo dawng fo tawh Leonel Messi an nei a, Messi hian Football chawimawina sang hi dawn loh a bar a nei tawh lo a, Nimahsela, a ropui ber World Cup hi ala chawi tlat lo mai a, mi tam takin, Club-ah chauh khel tha thei a, ram tana khel tha thei lo angin an sawiin an ngai hial tawh a ni. Tun tumah hian, European ram ho Champion theih lohna hmun South American soil-ah an khel a, Khawvela Striker tha thiau a kawp hlawm bawk a, atan hian, ‘Golden chance’ tak meuh meuh a niin a lang. Christiano Ronaldo hi a elpui ber niin, ani (Ronaldo) hi chuan, World Cup hi a chawi ngai dawn lo niin a ngaih theih a, Messi hian Ronaldo a khum theihna tur chu World Cup chawi hi a ni. Tuntumah hian, a theihna zawng zawng takmeuha a beih a rinawm a, hetiang ang player thiam chung chuang leh ropui hian World cup hi chawi ve ngei se tih hi a duhsakpui awm viau mai. Chawi tak ang maw? 3) Germany: Football Super Power ram 4 te zinga 1 Germany hi World Cup-ah an record a ropui tek tek hle. Brazil nen Final thleng ngun ber niin tum 7 zet final an lo khel tawh a, chung zingah chuan tum 3 champion niin, tum 4 erawhchu runner-up dinhmunah an ding a ni. Kumin tiam hian World cup tum 4 zet chu a zawnin Semi-final an khel dawn ta ani a, pui tek tek tak an ni. Tuntumah pawh hian, Player an tha rual ber niin a lang a, an pumrua a lian a, an chak a, an huai a, an rilru hrim hrim hi an indahsang deuh tlat niin a lang a, Tin an khel hi a physical viau nain, an fair phian lawi si a ni. Tluder, na der leh dive tih ang vel pawh hi an ching ve vak lem lo. An striker 1 Klose hian tunah hian World Cup a goal thun tam ber nihna Brazilian Ronaldo nen an intawm mek a, goal 15 an thun tawh a ni. Game 2 khelh tur an la neihah hian goal 1 chauh pawh a thun chuan, Brazilian Striker ropui Ronaldo Record hi a khum thei dawn a ni. Amaherawhchu, Jurgen Klinsman leh Rudi Voeller te inkawp ang Striking Duo ropui ang kha chu an nei hlei thei tawh bik lo anih hi. American soil a European Team Champion hmasa ber ni thei tak ang maw? 4) Brazil: Football ram ropui ber tia sawi theih leh ball thiama lar thin, Brazil hian World Cup-ah hian hnuhma an nei hraw hreih hrawih hle a ni. World Cup vawi 20 a la tel kim awm chhun an nia, Vawi 20 ah chuan, Final vawi 7 khel tawhin, tum 5 zet Champion no mawi an lo chawi tawh a, Champion ngun ber an ni. Football game mawi em em mai, ‘Samba’ an tih ang hi an khel thin a, Nimahsela, European lam an physical tial tial si a, Dunga teho khan, “Khelh mawi aiin, Chak a pawimawh zawk” tiin, an Samba football hi an kalsan ve tial tial a ni. Striker ngaihsanna ram anih angin, Striker hi an nei tha thei thin khawp mai a, Pele, Zico, Romario, Ronaldo tih vel nei thin hian, Kumin World Cup chu Centre Forward an tlachham ve tlat mai hi a mak ang reng zawk hle mai. Neymar an nei a, an ram ani bawk a, a khel tha theiin a thiam tak zet mai. Amaherawhchu, a awm nem deuh hlek a, Defender palian pui pui ten an veng ngun bik a, an dimlovin an nek per nasa thin hle mai. Referee ten chhan nachang an hre si lova, hliampui a tuar a, a khel chhunzawm thei dawn ta lo niin a lang lehnghal a, Semi Final ah hian an Captain Thiago Silva lah chu Yellow card vawihnih a hmuh avangin a khel thei dawn bawk si lova, an Star player Ronaldinho te, Robinho te, Kaka te ho Squad-ah an lo telh tawh bawk silova, an buai ve hle ang. German rallian hi an ngamlo mai ang tih a hlauh thawnawm ta hle a ni. Nimahsela, 11 ve ve inkhel tur an nia, Brazil te ang Football ram ropui chuan player tha 11 thawh chhuah tur chu an haihchham lo turah ngai ang. 1962 World Cup khan, an thiampuipa Pele kha a inhliam hlauh mai a, a khel chhunzawm thei lova, nimahsela, hnual mai lovin, “With or without Pele the Cup will be ours” an ti ngam a, an Champion ta tho anih kha. Brazil hi ka tan ber anni thin a, tunah pawh an la ni reng a, Champion se ka tih em emna chhan chu, an champion hian Pathian a Ropui thin tlat a ni. An pet goal chang leh an chak chang a, Khelmuala thingthi a, vanlam hawi leh ban phar chunga an tawngtai te, an Jersey hnuaia an T-Shirt-a Pathian thu chi hrang hrang, “I belong to Jesus” tih ang te, Khawvel mithmuha an pho chhuak thin hi an ngaihsanawm ka ti a, chutiang tih theihna hun remchang chu nei chhunzawm zel tur pawhin ka duhsak em em a ni.
Posted on: Sun, 06 Jul 2014 17:50:11 +0000
Trending Topics
Recently Viewed Topics
© 2015