Faiceu Kumruk a tling cang (By Van Kham Hranglung) Kan hnu kum ruk lio (14, Dec, 2008) nihin bantuk zarhpi zing ah Faiceu Journal cu Malaysia ram a bikin Kuala Lumpur um Chinmi (Laimi) hna sinah kan rak chuahpi hmasa i cu liote cu mipi hna nih Faiceu Journal a rim an teh i lampi kipah an i kalpi mi hna kan hmuh i kan i lawmhnak a tling khun caah Pathian kan thangthat. Faiceu Journal kan rak chuah hlan ahhin Seihnam cazual (cauk hme tein) le Bawinu authawng, ( A4 catlap in) an rak um hmasa. Faiceu Media Group nih careltu mipi hna thadam tein an rel khawh nak hnga tiah A3 in kan rak chuah hmasat. Cu cu Faiceu Journal nih mipi caah zaanghlei cawi in aa zuamnak bik cu a si. Kumruk chung Faiceu Journal a chuah kho pengmi hi ruah ahcun thil hme cu a si hrim lo. A chuahtu hna lawng nih can hman tein kan chuah peng ko zongah ca reltu mipi nih nan cawk lo, nan rel lo ahcun a nung kho ding cu a si kho hrim lo ti hi kan i fiang tuk. Cu caah Faiceu kumruk tiang a nung kho pengmi hi cu a nunak caah rawl a petu ti a toihtu careltu mipi hi nan si ko. Hi Faiceu Journal nih a timh bikmi zong cu kan caholh kilvennak a si ve caah santlaihnak a ngei hrimhrim ko ti hi kan zumh ve i, cu cu kan thazaang a si ve. Nihin kan vawlei ah caholh le nunphung a ngei lomi miphun hna cu hmuh khawh an si ti lo. Nihin ah kanmah le kan ca /holh tein cazual, Journal a um mi thazaang kan pekmi le a man tein kan cawkmi hna hi miphun dawtnak, miphun kilvennak pakhat a si ve caah kan zapi in tuanvo kan ngei. RM 2 in Faiceu Journal na cawk i na relmi hi miphun kilvennak rian pakhat na tuan ve kha philh lo ding a si lai. A hnu bik ah Kumruk chung Faiceu Journal a rel pengmi mipi nan zapi cungah lawmhnak tampi ka ngei i Faiceu Media Group kan rak dirh kain nihin ni tiang ka rian tuantti hawi a simi hna Faiceu Journal Chief-Editor in Editor hna le Marketing tuantu hna nan zapi cungah lunglawmhnak tampi ka ngei. Nihin kumruk thawk in hmailei caan zongah Faiceu Journal a lampi cu mipi kut cungah a um mi a si i mipi nih nan dawt i nan kilven, nan zohkhen peng ahcun a nung peng ko lai tihi ka zumh ko. Van Kham Hranglung Joint Founder Faiceu Media Group
Posted on: Sun, 14 Dec 2014 12:13:53 +0000
Trending Topics
Recently Viewed Topics
© 2015