Fakatauange ke mou mau ha Falaite ke fefauhi mo Sisu kaeoua pe kuo to mai hamou tapuaki. Sisu Emeni. Falaite, ‘Okatopa ‘aho 25. Lau Folofola: Toe lau pē ‘a Luke 18: 9-14, , 9 Pea naʻa´ ne leaʻaki mo e fakatātā ko eni´ ke tau ki ha niʻihi naʻe ʻafungi ʻoku nau maʻoniʻoni, mo nau fakasīkakaʻi hono toe ʻo e kakai´: 10 Tokua ko ha ongo tangata naʻa´ na ō hake ki he Temipale´ ke fai ʻena lotu; ko e Fālesi ʻa e taha´ pea ko e taha´ ko e pōpilikane. 11 Ko e Falesi´ naʻa´ ne tuʻu taha atu, ʻo ne lotu, ʻo pehē ʻE ʻOtua, ʻoku ou fakafetaʻi atu, ʻoku ʻikai te´ u hangē ko hono toe ʻo e kakai´, ʻa e kau fakamālohi´, mo e kau kākaa´, mo e kau feʻauaki´, kaeʻumaʻā haʻaku hangē ko e pōpilikane ko eni´. 12 ʻOku ou ʻaukai tuʻo ua ʻi he uike, ʻoku ou ʻatu ki he siasi´ hono vahehongofulu ʻo e meʻa kotoa ʻoku ou maʻu ʻi heʻeku ngāue´. 13 Ka ko siʻi pōpilikane´ naʻa´ ne tuʻu pe mei ha potu, ʻo mamaʻo atu, pea naʻa mo hono mata´ naʻe ʻikai te´ ne faʻa hiki ki he langi´; ka ka sī fatafata pē ia, ʻo ne pehē, ʻE ʻOtua, ke´ ke fakamolemole au, ʻa au angahala. 14 Talaatu, naʻe ʻalu atu ʻa e toko taha ko ia´ ki hono ʻapi´, kuo´ ne maʻu ha tonuhia naʻe lahi ʻi he tonuhia ʻa e tangata ʻe taha´: he ko ia ʻoku´ ne hakeakiʻi ia´ ʻe fakavaivaiʻi, pea ko ia ʻoku´ ne fakavaivaiʻi ia´ ʻe hakeakiʻi. Veesi Fakalaulauloto: Luke 18: 13, “Ka ko siʻi pōpilikane´ naʻa´ ne tuʻu pe mei ha potu, ʻo mamaʻo atu, pea naʻa mo hono mata´ naʻe ʻikai te´ ne faʻa hiki ki he langi´; ka ka sī fatafata pē ia, ʻo ne pehē, ʻE ʻOtua, ke´ ke fakamolemole au, ʻa au angahala.” Kaveinga: Ko e lotu mo e loto fakatōkilalo´. Poupou: ‘Aneafi na’a tau vakai ki he lotu mo e loto ‘afungi´ ‘a ia ne fai ‘e he Fālesi´; ka ko e ‘aho´ ni ‘oku tau fakalaulauloto ‘i he lotu mo e loto fakatōkilalo´ ‘a ia ne fai ‘e he Pōpilikane´. Na’e ‘alu ‘a e Fālesi´ ia kimu’a ki he feitu’u ‘e sio kiate ia ‘a e kakai´. Na’a nau manako pē kinautolu ia he nofo kimu’a´, he na’a nau fiehā pē kinautolu ia mo fie ma’u langilangi; “Ka ko si’i Pōpilikane naʻa´ ne tuʻu pe mei ha potu, ʻo mamaʻo atu, pea naʻa mo hono mata´ naʻe ʻikai te´ ne faʻa hiki ki he langi´; ka ka sī fatafata pē ia, ʻo ne pehē, ʻE ʻOtua, ke´ ke fakamolemole au, ʻa au angahala.” Ko e anga eni ia ‘a e to’onga lotu ‘oku fai mo e loto fakatōkilalo´. Na’a´ ne tu’u pē mei´ he mama’o´. Na’e tatau pē kiate ia pe ‘e sio mai ha taha pe ‘ikai; he ko ‘ene tefito’i tokanga ‘a’ana´ - kiate ia pē mo e ‘Otua. Na’e ‘ikai ke toe tokanga ia ke fakahohoa ia ki ha toe taha kehe pe ke fakamaau’i kinautolu mo e anga ‘enau lotu´. Pea ko ‘ene ‘uluaki me’a pē ne fai ‘i he’ene sio hifo kiate ia´, ko ‘ene ‘ilo’i ‘e ia ia – ko e angahala ia. Koia ai na’e ‘ikai te ne kei lava ke hanga hake ki he langi´ koe’uhi´ ko ‘ene ongo’i ‘oku ‘afio hifo ‘a e ‘Otua kiate ia mei hono ‘afio’anga´. Pea na’a´ ne sī fatafata. Ko e faka’ilonga ia ‘a ‘ene ongo’i mamahi ‘i hono loto´ koe’uhi´ he ko e angahala ia. Ko e faka’ilonga ia ‘o e loto ‘oku ongo’i fakatomala ‘i he’ene ngaahi kovi kuo´ ne fai´. Pea ko e sitepi hoko pē, ko ‘ene kole fakamolemole ki he ‘Otua´, “ʻE ʻOtua, ke´ ke fakamolemole au, ʻa au angahala.” Na’e ‘ikai te ne toe fakamaau’i ha taha ‘o hangē ko e lotu ne fai ‘e he Fālesi´; ka ko ia pē na’a´ ne fakamāu’i´. Pea ko e me’a pē na’a´ ne ‘ilo’i ‘iate ia´, ko e angahala ia. Na’e ‘ikai ha teitei loto ‘afungi ‘iate ia, ka ko e loto pē ne fakatōkilalo. Ko e lotu mo e loto ‘afungi, te te ‘ilo ‘e kita ‘a e kovi ‘a e kakai kehe ka he ‘ikai te te ‘ilo ‘e kita ‘a ‘ete kovi ‘a’ata´. Ka ko ‘ete lotu mo e loto fakatōkilalo´ pea ko e kovi pē ‘a’ata´ te te ‘ilo´ pea mo tokanga ki ai ke fai ha fakatomala mo kole fakamolemole ki he ‘Otua´. Vakai ki he akonaki ‘a Sīsū na’a´ ne fai ‘i he’ene Malanga ‘i he Mo’unga´, “Pea ko e hā ʻoku´ ke tokanga ai ki he malamalaʻiʻakau ʻoku ʻi he mata ʻo ho kainga´, ka ko e fuʻu lalango´ na ʻoku ʻi ho mata´ ʻoku ʻikai te´ ke ʻilo ki ai? Pea te´ ke lea fēfē ki ho kainga´, ʻE, tuku ke´ u toʻoa mai ʻa e malamalaʻiʻakau mei´ ho mata´: ka tā ko e fuʻu lalango ʻena ʻi ho mata ʻoʻou´? ʻA e ʻafungi, motuʻa toʻo mai mei hoʻou´ mata ʻa e lalango´; pea te´ ke toki sio totonu ke toʻo ʻa e malamala mei´ he mata ʻo ho kainga´.” (Matiu 7:3-5) Ko e fa’ahinga ‘afungi eni ne mo’ua ai ‘a e kau Fālesi´. Ka ki he Pōpilikane´, na’a´ ne tokanga pē ia ki he malamala’i’akau ‘i he mata pē ‘o’ona´. ‘Io, he ko e to’onga mo’ui pē ia ‘a e lotu ‘a e loto ‘oku fakatōkilalo´. Pea ‘oku mo’oni leva ‘a e fakama’opo’opo ne fai ‘e Sīsū ‘i hotau folofola ‘o e ‘aho ni´, “Talaatu, naʻe ʻalu atu ʻa e toko taha ko ia´ ki hono ʻapi´, kuo´ ne maʻu ha tonuhia naʻe lahi ʻi he tonuhia ʻa e tangata ʻe taha´: he ko ia ʻoku´ ne hakeakiʻi ia´ ʻe fakavaivaiʻi, pea ko ia ʻoku´ ne fakavaivaiʻi ia´ ʻe hakeakiʻi.” (v.14) Lotu Hūfia: ‘E ‘Otua, ko e ‘Otua ‘o e fakamolemole, ke ke ‘alo’ofa mai ‘o fakamolemole’i kimautolu mei he’emau ngaahi angahala´. Pea´ ke ‘alo’ofa mai ‘o malu’i kimautolu mei´ he loto ‘afungi´ mo e loto fakamaau ‘o e kakai kehe´. ‘Emeni.
Posted on: Fri, 25 Oct 2013 09:36:55 +0000
Trending Topics
Recently Viewed Topics
© 2015