Fam Nêbî-Ne hat Femkirin ZANA AZADÎ Civaka Demokratîk ê Kurd yê Ewrûpa(CDK), 15ê Hezîranî Ewrûpa de yew kampanya da destpêkerdiş. Name û şîyarê na kampanya Kurmancî “Ne hat Femkirin”, Kirdkî-Zazakî “Fam Nêbî” ya. CDK, meqsedê kampanya hina diyarkerd. Na kampanya “tekoşina statû girewtiş, qebûl kerdişê ziwan û nasname Kurdana”. “Polîtîkayê înkarkerdiş û helenayîş de çîye kî en zêde yeno şixulnayîş ziwan o. Ewrûpa de şixulnayîşê ziwanî de ne hetê qisekerdiş, ne zî hetê nuştiş de ti astengnayîş çîno.Tiya ra pê herkes, kam hew lehçe Kurdî weş şixulneno, wa pê a lehçe qise bikero. No derheqî de yew astengnayîş esto, o astengnayîş zî kurm û hîşa kî dagirkeran viraşta. Wa herkes Kurdî (Kurmancî, Zazakî, Soranî, Kelhurî, Hewramî) qise bikero. Ayê kî Kurdî nîzanî, wa Kurdî bimusê. Ayê kî tayî zanê, wa Kurdî yê xo raverberênê. Ayê kî nîzanî Kurdî bi nusnênê, wa nuştiş bimusê. Wa şar, qij, cinî, wendekar û esnafê ma her ca de Kurdî qise bikero. Seba naye bi şîyarê “Fam Nêbî” kampanya ameya destpêkerdiş. Ma vîr meker kî ziwanê dayî ê însan de kemayi zî bibo, gore ziwanê dagirkeran hina weş û rindik o”. Beyanatê CDK hina dewam kena. “Ziwan nasname însanano”. “Eger no vatiş raşt yeno qebulkerdiş se, gera ma zî tîya ra pê, pê nasname şarê nê, pê nasname xo bi ciwîyî”. Wexto kî ma ewnenê na beyanatê, tiya re pê gera yew Kurd (Zaza, Kurmanc, Soran, Kelhur, Hewraman, Lor û Lek) çîz û vizo nîkero. Kam kî tiya re pê vajo ez Kurdî tayî zana û hina destpêbikero û ziwanê dagirkeran qise bikero qet nêbeno. Kam beno wa bibo, wexto kî Kurdê ma ra pê ziwanê Tirkî, Farisî, Erebî, Almani, Îngîlîzî, Fransî û Îtalî qise bikero wa Kurdê ma vajênê “Fam Nêbî”. Zerrê Şarê Kurdî de, kam beno wa bibo, wexto kî pê lehçe Kurdî qise nîkerd, wa yew Kurd êyê ra qise mekerenê. Zerrê Şarê Kurdî de, kam beno wa bibo, ver lehçe Kurdî, ziwanê dagirkeren bimuso, wa herkes êyê lanet bikero. Zerrê Şarê Kurdî de, kam beno wa bibo, eger Kurmancî qise keno, wa Kirdkî-Zazakî- bimuso. Zerrê Şarê Kurdî de, kamî benê wa bibenê, qijanê xo ra Kurdî qise nîkerênê, wa Şarê Kurd înan lanet bikero. Zerrê Şarê Kurdî de, kam beno wa bibo, wa nika ra seba boykot kerdişê ziwan û mektebê dagirkeran xebat bikero. Wa hina xebat bikero kî, wexto kî mekteb destpêbikerênê, yew kes zî qijê xo nî bişirawo mektebê dagirkeran. Çi Bakurê Kurdistanî beno, çi Rojhilatê Kurdîstanî beno şerm nîya kî Şarê Kurd qijanê xo şiravenî mektebê Tirk û Farisan. La çira Tirk û Faris, qijanê xo ra Kurdî nî musnênî? La çira Ereb, qijanê xo ra Kurdî nî musnênî? Şarê Kurd heta ewro ser nayê fikir kerdo? La çira, zerrê cîhanê de tenê ziwanê Kurd ameyo qedexekerdiş? Humarê Şarê Kurd 50 mîlyon esto, la ziwanê Şarê Kurd ameyo qedexekerdiş? La çira, ma vengê xo nîvejenî? La çira, ma pê ziwanê xo perwerde nîvînenî? La çira, ma pê ziwanê xo nînusnenî? La çira, ma ziwanê xo qise nîkenî? La çira, ma qijanê xo ra Tirkî, Farisî û Erebî qise kenî û pê destê xo qijanê xo kenî Tirk, kenî Faris û kenî Ereb? La çira, zerrê Ewrûpa de tayî Kurd estî yew qise Tirkî nîzanî, la qijanê înan Tirkî qise kenî? No tewşî seyî beno? Yew seyî pê ziwanê dagirkeran zurrîyetê xo qirkeno? Fam Nêbeno. Fam Nêbeno. Ziwanê neyaran Fam Nêbeno.
Posted on: Wed, 19 Jun 2013 10:20:13 +0000
Trending Topics
Recently Viewed Topics
© 2015