For di Frikshon Pa Pordon Kiko ta pordon? Pordon ta hustifiká e komportashon di un hende ku a hasi bo hopi daño? Mi pordon ta dependé di arepentimentu di esun ku a ofendé? Ki tal si esun ku mi ta malkontentu kuné, no meresé mi pordon? Kon e siguiente pasashinan ta yuda nos komprondé e naturalesa bíbliko di pordon? Romanonan 5:8-11; Lukas 23:31-34; 2 Korintionan 5:20, 21; Efesionan 4:26-30. Kristu a tuma e inisiativa pa rekonsiliá nos kunE. Ta e “bondat di Dios ku ta hiba boso na arepentimentu” (Romanonan 2:4). Den Kristu, nos a wòrdu rekonsiliá ku Dios, miéntras nos tabata pekador ainda. Nos arepentimentu i nos konfeshon NO ta krea rekonsiliashon. Kristu Su morto riba krus ta hasi esei; nos parti ta di aseptá loke a wòrdu hasi pa nos. Ta bèrdat ku no nos no por risibí e bendishonnan di pordon, te ora ku nos konfesá nos pikánan. Esaki no ta nifiká ku nos konfeshon ta krea pordon den Dios Su kurason. Pordon tabata den Su kurason tur e tempu. Konfeshon, na lugá di esei, ta kapasitá nos, pa risibié (1 Juan 1:9). Konfeshon ta virtualmente importante, no pasobra e ta kambia Dios Su aktitut pa ku nos, pero pasobra e ta kambia nos aktitut pa kunE. Ora nos aseptá i someté na Spiritu Santu Su poder ku ta konvensé nos pa arepentí, i nos konfesá nos faltanan, Dios ta kambia nos. Pordon ta tambe asina krusial pa nos mes bienestar spiritual. Un fayo pa keda sin pordoná un hende ku a hasi nos daño, ounke nan no meresé pordon, por heridá nos mas, ku e ta heridá nan. Si un individuo a hasi nos daño, i e doló krea postema paden, pasobra nos no ke pordoná, bo mes ta pèrmití nan hasi bo ainda mas daño. Pordon ke men lòs un otro hende for di bo kondenashon, pasobra Kristu a lòs nos for di Su kondenashon. Esaki no ta hustifiká e otro hende su kompor-tashon pa ku nos. Nos por rekonsiliá ku un hende ku a heridá nos, pasobra Kristu a rekonsiliá nos kunE, ora nos a heridá E. Nos por pordoná, pasobra a pordoná nos. Nos por stima, pasobra a stima nos. Pordon ta un eskoho. Nos por skohe pordoná apesar di e otro persona su akshonnan òf aktitut. Esaki ta e spiritu berdadero di Hesus. Ora nos fiha nos bista riba e pordon ku nos tin den Kristu, kon esaki ta yuda nos siña pordoná otro?
Posted on: Wed, 18 Sep 2013 19:45:04 +0000