Formula Jurisjurandi in Motu Proprio “Sacrorum Antistitum” a Summo Pontifice Pio X Præscripta: JUSJURANDUM ANTIMODERNISTICUM Ego N. N. fírmiter ampléctor ac recípio ómnia et síngula, quæ ab inerránti Ecclésia magistério definíta, adsérta ac declaráta sunt, præsértim ea doctrínæ cápita, quæ huius témporis erróribus dirécto adversántur. Ac primum quidem Deum, rerum ómnium princípium et finem, naturáli ratiónis lúmine "per ea quæ facta sunt" hoc est, per visibília creatiónis ópera, tamquam causam per efféctus, certo cognósci, adeóque demonstrári étiam posse, profíteor. Secúndo: extérna revelatiónis arguménta, hoc est facta divína, in primísque mirácula et prophetías admítto et agnósco tanquam signa certíssima divínitus ortæ christiánæ religiónis, eadémque téneo ætátum ómnium atque hóminum, étiam hujus témporis, intellegéntiæ esse maxime accommodáta. Tértio: firma páriter fide credo Ecclésiam, verbi reveláti custódem et magístram, per ipsum verum atque históricum Christum, cum apud nos dégeret, próximo ac dirécto institútam eandémque super Petrum, apostólicæ hierarchíæ príncipem, ejúsque in ævum successóres ædificátam. Quarto: fídei doctrínam ab Apóstolis per orthodóxos Patres eódem sensu eadémque semper senténtia ad nos usque transmíssam, sincére recípio; ideóque prorsus rejício hæréticum comméntum evolutiónis dógmatum, ab uno in alium sensum transeúntium, divérsum ab eo, quem prius hábuit Ecclésia; paritérque damno errórem omnem, quo, divíno depósito, Christi Sponsæ trádito ab Eáque fidéliter custodiéndo, suffícitur philosóphicum invéntum, vel creátio humánæ consciéntiæ, hóminum conátu sensim efformátæ et in pósterum indefiníto progréssu perficiéndæ. Quinto: certíssime téneo ac sincére profíteor, fidem non esse cæcum sensum religiónis e látrebis subconsciéntiæ erumpentem, sub pressióne cordis et inflexiónis voluntátis moráliter informátæ, sed verum assénsum intelléctus veritáti extrínsecus accéptæ "ex audítu", quo nempe, quæ a Deo personáli, creatóre ac Dómino nostro dicta, testáta et reveláta sunt, vera esse crédimus, propter Dei auctoritátem summe verácis. Me étiam, qua par est, reveréntia subjício totóque ánimo adhaéreo damnatiónibus, declaratiónibus, præscríptis ómnibus, quæ in Encýclicis lítteris "Pascéndi" et in Decréto "Lamentábili" continéntur, præsértim circa eam quam históriam dógmatum vocant. Item réprobo errórem affirmántium, propósitam ab Ecclésia fidem posse históriæ repugnáre, et cathólica dógmata, quo sensu nunc intellegúntur, cum verióribus christiánæ religiónis origínibus compóni non posse. Damno quoque ac rejício eórum senténtiam, qui dicunt christiánum hóminem eruditiórem indúere persónam dúplicem, aliam credéntis, aliam histórici, quasi líceret histórico ea retínere, quæ credéntis fídei contradícant, aut præmíssas adstrúere, ex quibus consequátur, dógmata esse aut falsa aut dúbia, modo hæc dirécto non denegéntur. Réprobo páriter eam Scriptúræ sanctæ dijudicándæ atque interpretándæ ratiónem, quæ, Ecclésiæ traditióne, analógia fídei et Apostólicæ Sedis normis posthábitis, rationalistárum coméntis inhaéret, et críticem textus velut únicam supremámque régulam haud minus licénter quam témere ampléctitur. Senténtiam prætérea illórum rejício, qui tenent, doctóri disciplínæ históricæ theológicæ tradéndæ aut iis de rebus scribéndi seponéndam prius esse opiniónem ante concéptam sive de supernaturáli orígine cathólicæ traditiónis, sive de promíssa divínitus ope ad perénnem conservatiónem uniuscujúsque reveláti veri; deínde scripta Patrum singulórum interpretánda solis sciéntiæ princípiis, sacra quálibet auctoritáte seclúsa, eáque judícii libertáte, qua profána quævis monuménta solent investigári. In univérsum dénique me alieníssimum ab erróre profíteor, quo modernístæ tenent in sacra traditióne nihil inésse divíni, aut, quod longe detérius, pantheístico sensu illud admíttunt, ita ut nihil jam restet nisi nudum factum et simplex, commúnibus históriæ factis æquándum: hóminum nempe sua indústria, solértia, ingénio scholam a Christo ejúsque Apóstolis inchoátam per subsequéntes ætátes continuántium. Hæc ómnia spóndeo me fidéliter, íntegre sinceréque servatúrum et inviolabíliter custoditúrum, nusquam ab iis sive in docéndo sive quomodólibet verbis scriptísque deflecténdo. Sic spóndeo, sic júro, sic me Deus ádjuvet et hæc sancta Dei Evangélia.
Posted on: Sun, 14 Jul 2013 07:43:34 +0000
Trending Topics
Recently Viewed Topics
© 2015