GATE MAN By Owen Blakka Ellis Me is a gateman keyman watchman security expert. Everybody have to pass troo me. Me nuh partial, cater or curry favour. Everybody have to show ID You could be manager governor or prime minister. Me solid more dan rock If you nuh respect me and brandish ID, di main gate going just stay lock Me is a gateman keyman watchman security expert. Me have power and carry weight. You know how much big management and admin people get discipline when me a Hold di front gate? Me mek dem murmur an grumble an beg an explain an complain an wait Me mek dem lose dem temper, cry eye water, an get inside all two hours late Woman walk pon chalk line, man get vex an resign, troo di power of my key and me Me nuh use conscience or play ease up, me nuh give bly an me nuh cry cree Me is a gateman keyman watchman security expert. Me teach big neck people lesson fi free Anybody pass me learn quick quick, me nuh tek argument, me only tek ID Even the nice personnel management lady she, one indian lady name Miss Lee Me know her good good cause is she interview me and give me di bunch a key But she come work last Thursday bout “Morning Rocky, oops I left my ID” Me just look pon her tough and say “oops not enough, dat nah go go work inuh Miss Lee” She turn red an start stutter and splutter, den she reason, den she plea Me just kiss my teet and show her wha the sign say: “Staff Must Show ID” She miss two meetings, cancel three appointments and go back home a Clarendon fi her ID. Cause me is a gateman keyman watchman security expert. People have to respect me Even the big Chairman and CEO guy. Him drive up wid him chauffeur inna him criss SUV Yeah is fi him picture hang up inna di guardhouse an di place name after him. But him never have nuh ID! So mi give him di drill but dem park up deh still, till fight bruck and seven more security intervee. Me haffi tump dung two, kick dung two an karaachi di adda tree Me is a gateman keyman watchman security badman. Nobody can stop me. Is last week dem fire me, but me thief the bunch a key Copyright 2005
Posted on: Sun, 27 Oct 2013 12:41:44 +0000
Trending Topics
Recently Viewed Topics
© 2015