Gayana Yüksel: "BIZIM MAQSADIMIZ – DOĞRU VE OPERATIV HABERLER BERMEK" Timur QURTÜMEROV subetleşti QHA – Qırım haberler agentligi mına endi yedi yıldan berli faaliyet köstere ve bizge Qırımda, Ukrainada em de dünyada olıp keçken vaqialar aqqında operativ sürette haberler bere. İyün ayında agentlik nevbetteki yeñişke irişti – onıñ saytında berilgen haberlerni bir million adam baqıp çıqqan. QHAnıñ faaliyeti, kelecekke maqsadları aq¬qında agentlikniñ koordinatorı İsmet Yüksel ve direktorı Gayana Yükselnen subetleştik. Gayana Yüksel: –Haberler agentligimiz 2006 senesi mayıs 18 künü ilk haberini yayınladı. Bundan evel ise bir yıl devamında azırlıq işleri alıp barıldı, teşkiliy meseleler çezildi. Bizim maqsadımız – obyektiv, kerçek haberlerni Qırımda, Ukrainada ve başqa memleketlerdeki qullanıcılarımızğa öz vaqtında bermektir. Başta haberlerni beş tilde – qırımtatar, türk, ukrain, rus ve inglizce bermek planlaştıra edik. Amma baqtıq ki, bu pek zor iş, çünki tercimanlar kerek, para kerek, kompyuterler kerek. Bunıñ içün üç tilni seçtik – ingliz, rus ve türk. Birinci vaqıtta tek metn ve fotohaberler berip başladıq. 2008 senesi ise videohaberlerge de keçtik. Ket-kete öz haberlerimizni çeşit memleketlerniñ informatsion agentliklerine bermege başladıq. 2011 senesi "Yeşil ada Qırım" leyhası işke tüşürildi. Bu – Almaniyanıñ "Avropa" kanalında türk tilinde yayınlanğan programmadır. 2012 senesinden ise "Qırımdan yansılar" programması çekilmekte. O şimdi Türkiyede TRT kanalında çıqa. Bu programma Qırım aqqında olıp, Türkiyede qırımtatar tilinde çıqqan birinci yayındır. İşimizde Qırım haberlerine, eksklüziv haberlerge çoqça emiyet bermege areket etemiz. Şimdi bizim saytımızda eksklüziv, yani bizim jurnalistler yazğan haberlerniñ fayızı 30-ğa yaqın. Agentlikke kelgen elektron mektüplernen de çalışamız. – QHA haberlerini kimler ve ne qadar adam oquğanı bellimi? İsmet Yüksel: – Haberlerimizni kim oquy, yani saytımızğa kim kirgeni, adam qaç yaşında ol¬ğanı malüm degil. Amma bir kün içinde 30-33 biñ adam saytımızğa kire. Bundan da ğayrı bizim haberlerimizni başqa agentlikler de alıp, öz saifelerine qoyalar. Türkiyede bir agentlik bar. O üç tilde çıqa – ingliz, türk ve arap tillerinde. Onı 10 milliondan ziyade adam oquy. Bizim haberlerimizni de millionlarnen adam oquy. – Ya iyün ayında haberleriñizni millionğa yaqın adam oquğanını nasıl bildiñiz? İsmet Yüksel: – Bu statistikanı bizge GUGL bere. Bizim de öz statistikamız bar – angi haber qaç kere oqulğanı belli. Bizim saytımızda mahsus sayı¬cı (sçetçik) bar. Neticede kördik ki, bir aynıñ içinde saytımız million kere oquldı. – Haberler qırımtatar tilinde ne zaman berilecek? Gayana Yüksel: – Bizge bu sualni yıllarnen bereler. ¬Aqiqaten de, qırımtatarca saifeni yapsaq yahşı olur. Amma şimdi çaremiz yoq. Çünki böyle saife açılsa, onı daimiy sürette toldurmaq, daa çoq vasta ve adamlarnı işke delp etmek kerek olur. Biz daa azır degilmiz. İsmet Yüksel: – Bizim eñ birinci maqsadımız – informatsiya bermek. Qırımda olğan meselelerni dünyağa bildirmek. Qırımda "Yañı dünya", "Qırım" gazetaları ve daa başqa medialar bar ki, olar qırımtatar tilinde çıqalar. – Şimdi QHAda qaç jurnalist çalışa? Gayana Yüksel: – Bizde 25 adam çalışa. Bu – jurnalistler, operatorlar, tehnikler ve diger hadimler. Yaşlar bizde stajirovka keçeler. Olar keleler, keteler. Bu sene men dört adamnı işke qabul ettim ve tek birisini işten boşatmağa mecbur oldım. – Ya ne içün hadimleriñiz devamlı çalışıp olamaylar, bir-eki yıldan soñ keteler? Gayana Yüksel: – Bizde öyle şey yoq! QHAda çoq yıllar çalışqan adamlar bar. Yañı adamlar da kele, biri işni becere, biri beceralmay. Kelgen jurnalistler sıq-sıq deñişip tursa, biz normal çalışıp olamamız. Er yerde olğanı kibi, bizde de tecribeli, çoqtan berli çalışqan hadimler bar. Agentligimiz, aynı vaqıtta, oqutuv meydanıdır. Adamlarnı bizde çalışmağa ögretemiz. Eger yaş adam bizge kelse, işni ögrense, soñra barıp diger yerlerde çalışsa, biz buña quvanamız. Bizden çıqqan hadimler çoq yerlerde çalışalar. Meselâ, Ayder Acimambetov Müftiyatta çalışa, Lenyara Abibulayeva QMC Nazirler Şurasında çalışa. – Bazıları QHAnı "Türkiye casusları" dep adlandıralar. Ne içün? Gayana Yüksel: – Bilmeyim. Bunı olardan soramalı. Şimdi biz ingliz casuslarına da çevirildik (küle). Çünki ingliz tilinde de çoq haberler beremiz. İsmet Yüksel: – Ne içün biz haberlerni türkçe beremiz? Türkiyede 5 million qırımtatarı yaşay. Bizde türk tilinde haberler olmasa ya da bizim agentligimiz olmasa, Türkiyede Qırım haberlerini de alıp olamaz ediler. Hadimlerimizge: "Sen bunı yaz, bunı yazma", – dep aytmaymız. Ne aqqında yazmağa isteseler, şunı yazalar. Men bellesem bu pek doğru, yeter ki adam öz işine ciddiy yanaşsın ve namuslı olsun.
Posted on: Thu, 25 Jul 2013 12:27:31 +0000