God’s Window (Ifasitela likaThixo) Chapter 25 Kusenzeka konke lokhu kuBusani, kogog’ umaNdiweni impilo yayisiya ilokhu iguquka kancane kancane njalo abazukulu bakhe babekhula bengamanga. Wayeselazo inkomo ezimbalwa umaNdiweni kwesakhe isibaya njalo amadonki, kunye lembuzi kwasekwaba khona. Ekulaleni lapha wayeselala lize lingene emlonyeni ngoba phela wayezithengele ingubo kuzwa, ezazifudumala njalo zizinhle. Kuthi labazukulu bakhe, basebelazo ingubo labo, sebathengelwa lemibheda yokulala, angikhulumi ngezigqoko wawungekutsh’ ukuthi zintandane. Labo basebefana njengabo bonke abantwana kukanti logogo wabo wayebakhonzile kakhulu, engafun’ ukuzwa ngabo. Dukuduku, ugog’ maNdiweni wakha indlu yesamende eyayifulelwe ngamazenge, lokhu kwenza omakhelwane baqale ukungunguna. “He umaNdiweni liyambona ukuthi semcwaba kulezinsuku, ngeke utsho ukuthi nguyelwa obegqoka amanikiniki ehambe thanyela phansi ngepatapata alithunyezelwa nguBusani ngomnyaka kampeyane” “Engekela njani yena ukuba ncwaba, angithi bathi utshitsha kulinyanga yakhe, ngitsho le edume kakhulu. Bathi phela yamnika abafana bokusebenzisa, and asikakuboni sizafa siphele du sonke. Ngizwela omakhelwana bakhe ngoba yibo azaqala ngabo. Phela okungabafana akusebenzi mahala, kuzafuna ukubongwa ngegazi kumbe ngomfazi, kutsho uzakutshadisa lokungabazukulu bakhe lokhu” “Uqinisile ntombi, sengananzelela nxa inyanga iphela uvuka kusesele eyegadi bhasi eyakoBulawayo lokungabazukulu bakhe, aphenduke ngenye imota eqhutshwa ngumlungu. He he he usalukazi lo uzasibonisa amanyala kumbe sekhombe okulikhiwanyana lokhuyana, okucake ingathi ngumkhobo kumbe vele yiwo umkhobo wakhe asebenza ngawo” “Mhlawumbe, phela lokhe aqala ukuba lokungama sentinyana, akasanamatheli kumngane wakhe unamaDade, kumbe ufihla khona okungondotshi kwakhe. Ngingakakhohlwa mkhozi, unamaDade lo uthi, uke wavakatshel ulesisalukazi, uthi into ayibona endlini leyana enkulu akakaze ayibone. Uthi besahleli kwatshutsha inkalakatha yenyoka, eyafika yangena emnyango, nansiyana iqonda ekhabathi le entsha yafika yangena phakathi, yazigoqa” “Ah ntombi , indab’ engaka manje yindaba elokhu etshitsha khonale, umbone sephuma ephethe otshukela, mpuphu lokunye okunengi nengi, kumbe sesiyacela inyoka leyo, ukuze laye zimkhiphele” Babezisusa omakhelwane, besola behleka benyantuza, kodwa lanxa kunjalo babehawukela impilo eyayisiphilwa ngumaNdiweni labazukulu bakhe, inengi laselithanda ukuza cela itshukela, lithi nxa lingena endlini kamaNdiweni lithalaze le la le. Nxa bethe baphiwa leyotshukela, babebonga bagomele baze batsho ukuthi ukwanda kwaliwa ngabathakathi, kodwa babethi bengasithela bambize mthakathi umaNdiweni. Lokhu yimpilo, umuntu ngeke wazi kufunayo, sinjalo abamnyama umona lenzodo kubuzwa kithi. Kusenzakala konke lokhu, umaNdlo laye waqala ukusebenza esibhedlela ecedi cedisa lapho. Bamthanda kakhulu ababemphethe. Lomtanakhe uPinki wayelokhu ekhula, emuhle ehawukelwa ngabomama abanengi. Wayethi angacabanga impilo ayeyiphila umaNdlo, zehle zodwa atshone sehlulukelwe. Kodwa wayaziduduze ngokuthi umlimu wayekubone kufane ukuthi aphile leya mpilo ukuze afunde kuyo. kulesisibhedlela Kwakulejaha elalingudokotela njalo libuya KwaZulu Natal, lubhudi babenbiza bro Khula ngoba igama lakhe seliphelele lonke kwakungu Khulubuse Mkhize. Lubhudi wayelobuntu ungeke watsho ukuthi ubuya khonale kukanti wayeziphethe kuhle. Ngokuya kwesikhathi, wajwayelana lomaNdlo. Khula: Sawubona dadewethu MaNdlo: Yeb mnewethu Khula: unjani uPinki Pinki wami MaNdloe: Uyakhula mnewethu, ngikwenzele ijuicy Khula: Cha dade bengicela ungiqhube ezitolo MaNdloe: kulungile mnewethu, asambe Lakanye baphuma ngalelo langa baya ezitolo, uKhula wafika wabathengela lokhu lalokhuyana, kusukela ngalelo langa kwaba yisiqhelo, umaNdlo wayengasazihluphi langokuthenga ukudla endlini yakhe ngoba konke kwakuthengwa nguKhula. Kuthe ngokuya kwesikhathi uKhula waqala ukubathatha ebasa emabhayisikopo, ezoo lapho kulenyamazana khona, kwesinye isikhathi wayebathatha bayebona ulwandle, babhukude kube mnandi kube njeyana.
Posted on: Fri, 19 Sep 2014 13:39:56 +0000