God’s Window (Ifasitela likaThixo) Chapter 26 “Ishaye mfana wami sizoma eJona-sburg nje maduze, kudala sihambayo” “Yebo baba, yona inhle limoto, ayifani laleya obuyisebenzisa” “Inhle mpela, kaneno lumfo uthi uzosikhawulela kuphi, ngeke size silingene leliya dolobha singalahleki, kukanti futhi uyena odinga usizo hashi mna” “Bengike ngakhuluma naye wathi, uzosishayela ucingo, asibuze ukuthi sesikuphi, baba” “Inzima indaba yakhe, wazibulalela umfazi, isipoko salumfazi sesibahlupha. He bayomthola phi umntu ozabalalisela lesiya sipoko. Ngoba phela, akekho ongaxosha uzimu, luzimu asebe nalo. Ngizalulalisa amahlayana kodwa lwamfazi uzabhuqa ashaye umzi wonke” “Kunzima” “Mpela mtanami, bengingeke ngiyeke nje uR100 000 yena ezizele apha kuthi” “ha ha ha ha soyidlavaza mpela, siqede singamcedi nganto loyana mfo. Ngeke aze asenze kwanto, angithi ubuye Zimbabwe” “Yebo mtanami kukanti kudala ngangcina ukuzikholisisa ngokocansi lomtu wesilisa, ngeke ngilinde ukubamba izihlalo zalomfo, kunye nalabaya bafana bakhe, bahli mpela. Angikhulumi ngomfazi loyana, ngizamphinda njalo namhlanje. Mhle kakhulu uThandi wami bantu!” Imota kaMfulamfulani yayisidla umango ilubhekise eGoli. Wayesewahlawula uBusani leyomali eyayidingakala. Ngemva kokuhlawula, babeka usuku lapho uMfulamfulani ayezakuyasebenza ngendlini kaBusani ukuze isipoko sikanaNowethu singabahluphi. Wayezafika ebusuku asebenze, awuqede lowomsebenzi kungakahlwi. Lakanye kwaya njengokumisa kwabo, kuthe kubetha ihola letshumi lambili, laye uMfulamfulani engena egumeni likaBusani. UBusani wayesehlala eNorthcliff, elendlu enhle kakhulu, lokwakuphakathi kwayo lindlu kwakukuhle kakhulu ungekutsho ukuthi ngeyomuntu omnyama. Egumeni kwakugcwele izihlahla ezidliwayo ezifana lama olentshi, mengo, banana kunye lezemvelo. Zona ke zazihlala ziluhlaza tshoko langasibi sesikhathi somqando. “Asingenen’ endlini” Watsho uBusani ekhokhela izethekeli zakhe. Umfulamfulane, wayebuye lesinye sezikhonzi sakhe, okuyisona esasitshayel’ imota. Benela ukungena endlini, Umfulamfulane lesikhonzi sakhe, bahle bakhipha impahla ababezigqokile, basala ngezikhindi, kwathi phezu kwazo bagqoka amabhetshu kunye lamalembu amadlozi. Ekhanda lapha, bathwala indlukula, baphinda bagaxa ubuhlalu obuyimibala eshiye tshiyeneyo. Ngemva kokugqoka impahla zabo zomsebenzi, wakhupha igwayi lamakhala, uMfulamfulane, waselivula, walicupha ngesandla, walivuvuzela phansi. “Zinyanya zakwaMbubesi, lina bonshongololo lani bogquzuma, yimi umtananenu, ngikhanyiseleni lingikhokhele kulumsebenzi engiwulande kulindawo. Vulani indlela, livule amasango, lingikhanyisele kakhulu, lingikhokhelele etsi etsi makhosi, iyebo kunjalo” Wabuye walibhema elinye igwayi, wabhemisa uBusani, Thandi kunye labantwana bakaThandi, kwasekusithi elinye walesulela ezinweleni zabo. Bonke babelaywe ukuthi bahambe ze, ngakho babengagqokanga lasibi sempahla yangaphansi kodwa lokhu. Sebeqedile lowomcimbi bangeniswa endlini yokuphumulela, lapho imbiza zikaMfulamfulani ezasezixhwatha khona, levumba selibambile. Bangena bahlala phansi ngobudala babo, kwaqala uThandi, kweza uBusani kwasekulandela abafana bakaThandi. Wangenisa isandla esikhwameni ayelaso Umfulamfulani, saphuma sesiphethe udengezi olwalulensizi emnyama. Wabuye wasiphindisela isandla sakhe, sayabuya sesiphethe usiba lwenungu, lona alusebenzisa ukuthatha insinzi eyayisedengezini. Linsizi wabancidisa yona njalo yayibaba gamu. Sebencide linsizi, bajunywa yibuthongo zange, babekwazi okwenzeka ngemva kwalokhu baze bayaphaphama ilanga seliphumile lakho sebevuswa yizisebenzi zabo. Ekuvukeni kwabo, abesilisa babelele bakhangela phansi kwathi uThandi wayelele wakhengela phezulu echaye imbala, okuzilayo kusegcekeni. Eceleni kwakhe kwakula majazi omkhwenyana amathathu, elehlanyelo kababa, ngitsho laseceleni kwaboBusani, ayekhona amajazi omkhwenyana ayelenhlanyelo kababa phakathi. Ekuvukeni kwabo, amadoda ayesizwa izinhlungu laphemuva esehluleka ukuhamba, kusobala ukuthi uMfulamfulane lesikhonzi sakhe babenze lukhulu kibo.
Posted on: Mon, 22 Sep 2014 13:48:56 +0000
Trending Topics
Recently Viewed Topics
© 2015