God’s Window (Ifasitela likaThixo) Chapter 43 Sekudlule iminyaka phose engaba litshumi lanhlanu, uBusani abulala owangakwakhe unaNowethu, impilo sinzima kuye loThandi. Bobabili babo bahlutshwa yizilwanyana abazilanda kwazulu kunye lesipoko sikanaNowethu. Sebephelelwe yimali, into nje abasaselayo yindlu le enkulu abahlala kuyo kunye labaqhashi eNorthcliff. Abantwana bakaThandi labo bakulindlu, izimoto ababezula ngazo azisekho sezaphela du, bahlala labafazi babo. Impilo laphe khaya ayisemnandi ngoba phela laba bafana bathethe kodwa abasebenzi bangamavila kanti bazala njalo nje. Nsuku zonke nxa lithi liyatshona elikamlimu, laba bafana loBusani bayaphuma baze baphenduke sekuzakusa, ekuphendukeni kwabo babuya bephethe impahla ezintshontshwe ezitolo ezinkulu ezifana labo Jet, Edgars, Woolworths kunye lezinye izintolo ezinkulu. Lezi mpahla ziya zithengiswe ngentengo ephansi kakhulu kuthi imali etholakeleyo yiyo esetshenziswa ukuthenga ukudla, osepa kunye lokunye. Njengenjayelo, sihlangana labo namhla bevuke bageza badla, baphinda bayolala. Lithe litshona ilanga ngesikhathi sekusiba mnyama kwafika imota ezimbili laphe khaya. Lezimota zazigcwele abesilisa ababebonakala nje ukuthi baziphilisa njengenyamazana. Ekufikeni kwabo bangena kwelinye ikamelo, bagcwala, konke laboBusani laba ntwana bakaThandi bubili babo, babelapho. Zakhutshwa izibhamu, zavulwa zafakwi nhlamvu zabuye zavalwa, akhutshwa njalo lama grenades, akhutshwa ama tear gas ahlolwa ukuthi asebenza ngendlela yakhona na. “Namhlanje madoda, siyagqekeza ibhanga yeFNB le eseSandton kunye le Europa. Ekufikeni kwethu wena Jamludi lawe Chithigazi lizaqonda ngqo emnyango lifike, lisebenzise lumtshina liqume amangilazi la angumnyango- siyezwana? kwakunguBusani lowo, owayeseyinkunzi yesela echasisela ayehamba labo. “Yebo sizwile mnumzane” baphendula kanye kanye oJamludi loChithigazi. “Wena Tholiwe uzabukhangele ohata, kunye lezinyoni eziphaphebusuku, ungabona loba yini utshaye umlozwi wokusazisa, uyezwa” “Yebo boss” “Sigedlemba, Ncibinjana, Thungatha, Mpikiso, Lwando, Jahelidala, owenumsebenzi yikuthungatha imali nxa sesithe sangena, nanku thathani limtshina nyana izasinceda ukuvuli zisefa. Wena Mdojwa laweMathunjwana, lizabe liqaphile ngemibhobho, gaxani liphelele madoda yini amasotsha ethu namhla enyakazelayo liyithelu hlamvu, lingathikazi liyangizwa kahle, livulindlela” “Yes boss” “Okay sizoya ngemoto ezimbili, wena Mqhemani lawe Phunyukabemphethe, lizasalezimotweni, yini abatshayeli njalo, lingazicitshi injini zemota kodwa licime izibane zazo, nxa lisibona sithutsha lihle lilindele ukusuka ngesiqubu esiphezulu, siyezwana” “Sho boss” Waphinda phinda lezi ziqondiso eqinisekisa ukuthi bazwile laba bafana bakhe. Ngemva kwalokhu, baphuma bayangemuva kwendlu lapho okwasekudekwe khona eziqandayo kunye lenyama eyosiweyo. Afika amadoda azitika, abuthela utshwala bethi badingizibindi, bayetshwama. Insangu lazo zazibhenywa kumnandi kunjeyana. Konela ukubetha ihora letshumi lanye ebusuku, zaphuma zombili imota zilubhekise esandton. Zazigijima, zidlula amalayithi omgwaqo ebomvu. Bonela ukufika eSandton bahle baqonda ebhanga yaseFNB. Bafika benza ababekutshelwe ukuthi bakwenze. Besenza konke ababekulandile, ukhona umuntu owayelipholisa phakathi kwabo. Umsebenzi wakhe wawuyikuba cupha ahambise imibiko emahofisini amakhlu. Ngesikhathi besadla inyama benatha lotshwala, wake waphuma lumuntu wayotshayu cingo, wachaza yonke into ababezayenza. Ngesikhathi befika ebhanga kwakukudala amajoni, amapholisa kunye labo mabharethi bebalindele. Basebenza kamandi yonke into yahamba ngendlela, baphuma bangena ezimoteni bazitshaya sebeqonda lapho okwakule Europa khona. Abahambanga ibanga elide, kwatshutsha izimota phambili emuva lasemaceleni, lezi zimota kwakuyizimota zamajoni, egaxe ephelele. Kwakugcwele ke lapha abantwanabakamesisi, sebebomvu ebusweni bengasakhangeleki njalo bengahlekeli muntu. Bawatshaya amalayithi ezimota, balutshaya uphondo kwaba kuncani ndawo. “He madoda nansi ngwe izalel’ ekhaya”.
Posted on: Mon, 27 Oct 2014 15:39:52 +0000
Trending Topics
Recently Viewed Topics
© 2015