HLA THU A SYMBOL Hla thu kam hnih-khat lek hian thu-a sawi fiah hleih theih loh khawpa thûk a fûn thei a; rakzu thlawr fim tha tak archil zah lek pawhin pa ngaihtuahna a chawk nu vek thei ang hian hla thu tlar khat lek pawhin ngaihdan nghet tak a lo phun tawh pawh a sawh sawn dâwrh thei thin a ni. Chutiang taka hla thiltitheia siamtu, a chakna thahrui herh tuak zinga pawimawh deuh mai pakhat chu “symbol” a ni. Mawl te-a hrilhfiah dawn chuan symbol chu thil pakhat, thil dang sawi nana a aiawh a hman hi a ni a; amaherawhchu tehkhinna leh thil hlimthla mai chu a ni lo. Entir nan, Beram No chu Isua sawi nana hman a ni a, Isua symbol a ni. Hla phuahtu tam tak chuan an ngaihtuahna bawm tawt chhunga an thil vei inbuan let tawp tawp chu a nihna angin dengkhawng takin emaw lungkuai takin emaw an au chhuahpui rawih a, chutih laiin hla phuahtu thenkhat chuan an thil hmuh leh hriatte chu a ruhlanga sawi chhuak mai lovin, an thang chu a ruk thei ang berin an valh a, chhui leh belhchian atan an sawi duh tak aiawh tur thildang an tawktarh thin a ni. Chuvangin symbol hi hla tuam mawitu pakhat a ni a, hla thu tipungtu a ni bawk. Tawngkam pangngai kha symbol-a hman a nih chuan hla thu mawi tak a chang thin a ni. Beram No chu ran pakhat, pawr ve tak a ni mai a, a hming pawh Arte tih aia a mawina a awm chuang lo. Mahse Isua aiawhtu atana hla thua-a hman a nih chuan a no hnep a, a hla thu hliah hliah tawh mai a ni. Symbol-te hi chi hnihah an then a; tlanglawn taka hman, a chhiartute paw’n an hriatthiam nghal ang chi hi Conventional emaw Traditiona symbol emaw an ti a. Amaherawhchu, hla phuahtu thenkhatte chuan hla phuahtu dangin an hmanpui lem loh, a chhiartute tan pawh hriatthiam nghal mai harsa takin symbol an hmang thin a, chutiang chu Private emaw Personal symbol emaw an ti thung a. Sap-ho chuan Rose hi mawina emaw, hmangaihna emaw sawi nan an hmang a; mahse W.B.Yeats-an symbol atana Rose a hmante chu hmangaihna emaw, mawina emaw sawina a ni leh hauh si lo. He hla-puanbu-a themtang pawimawh tak hi Mizote hla-ah hi chuan khawvar lam arsi ang phiar a la ni a. Kawng leh lama ngaihtuah chuan French hla phuah thiam Baudelaire-an kum 1857-a a hla Fleurs du Mal tih a phuah atanga Symbolic Movement intan, France ram atanga luang chhuakin Indopui I-na leh a hnu lama Europe leh America khawmualpui-a hlate a chim hun laia Mizote hla-a la luang lut ngai lo, he hlarua pawimawh tak, khawvel dang daiha awm ang maia tukhaw pawh loh Mizote hla-a a lo luang lut ve chiah mai hi thil mak tak chu a ni. Sap hla phuah thiam William Black-a te, P.B.Shelley-a te khan he hmanraw pawimawh tak hi uar tak leh thiam takin lo hmang tawh thin mah se symbolic movement bupui erawh an kai thet zo lo a chha a ni. Chuvangin Symbolic Movement fa u, French hla phuah thiam Rimbaud-a te, Verlaine-a te, Mallarme-a te leh Valerie-a te chuan val upa chan lo chang deuh mah se, English leh American hla phuah thiam Arthur Symons-a te, Ernest Dowson-a te, W.B.Yeasts-a te, T.S.Eliot-a te, Pound-a te, Dyland Thomas-a te, Hart Crane-a te, E.E.Cummings-a te leh Wallace Stevens-a te leh Mizo hla phuah thiam Patea te, Kamlala te, C.Z.Huala te, Laithangpuia te, Zasiama te, Saihnuna te leh Patea Age-a hla phuah thiam dangte kha khawkhat ni se chuan Zawlbuk buanzawla inbuan rual vel an ni ngei ang. Renaissance tuifawnin Europe leh khawvel pum tih theih deuhthaw a khuh hlup hlup lai pawha a siper pawhin a den phak si loh, Symbolic Movement alh vanglai taka Mizote hla a kang kai ve ta mai si hi a chhan ber chu Bible leh Sap hla lehlinte an ni a. Symbolism hi thil thar a ni lo va. Kan Bible-ah hian an hmang nasa em em a. Chuvangin Patea-te rualin symbol an hman tam takte kha chu khawvel ram danga an rinna nghawngkawl bahpuite pawhin an hman lar tak, Bi-blical symbol an ni a; a thente erawh chu anmahni irawm chhuak te pawh an ni bawk a. An hman lar thenkhatte chu: Salem thar = Vân, Mo = Kristian Eden thar = Vân, Moneitu = Isua Zion = Vân, Arsi = Isua Thlipui = Thlêmna, Vârparh = Isua Rihdil = Thihna lui Beram No = Isua Laithangpuia hian Sap hlaphuahtute zinga Yeats-a dinhmun hi Mizo hla phuahtute zingah hian a luah mai awm mang e. Mitdel a ni na vang vangin Laithangpuia hian a suangtuahna mitthla-a a hmuh chu thil thleng tak tak angin chhiartute mitthla-ah a tarlang iai iai thei a. Chu bakah a sawi tur tifiah leh zual thei turin symbol a hmang thiam em em mai a. Amah chu Sipai emaw Lal Sipai emaw a intih ang ngeiin tum ruk ngawt Sual Sipai-te nen an inkhuai nuai a. Chung an indona chanchin chu “Rinna Kohna” I, II, III & IV ah leh “Inralthuam tura Kohna” I & II-ahte a puang chhuak a. (Lalnghakliana, Chhandamna Sipai Pawl Mizo Hla Phuahtute Kutchhuak) Heng thlarau lam indona a an hmelma Thim Lal a tih chu Setana a ni a, a sipai thawm na zet-te chu Sual Sipai, Sual thli, Sual tuipui, leh Zathangral tiin a vuah. Laithangpuia’n a hla, Salu lawmna Hla-a Chanchin tha sawi nan Zion Ni a hman laiin hla phuahtu thenkhat : Rokunga(Kan chatuan Pa Lenna Runah). Suakliana (Hosana Ti Zelin Aw), Ralngama (Lal Pian Hun Lawmawm)-te chuan Chanchin tha sawi nan Eng emaw Enna emaw an hmang a, chutih laiin Zasiama chuan Eng chu Thlarau Thianghlim sawi nan a hmang thung (Vawiinah Lal Davida Khua). Rev. Chhawna Hla, Nunna Luipui a lang, tihah chuan tui leh lui chu kawh hrang daih a neihtir a. Chang khatna leh chang thumnaa Nunna luipui a tih chu Chanchin tha a sawina a ni a. Chang khatnaa Nunna tui chu Isua thisen sawi nan a hman laiin chang thumnaa Nunna tui erawh chu a thisen ni mai lovin amah Isua tihna a ni thung a, chang hnihna a tuifim chu ngaihdamna sawina ni awm tak a ni. Kamlala hla, Vawiinah Lal Davida Khuaah tih chang ngana han chhiar rual rual chuan kawla ni chhuak tir eng mawi tak kan mitthla-ah a lang nghal a. Kawla ni lo chhuak saw en teh, Leilung a rawn en e; Chutiangin kan tan a eng, Lo eng zual zel rawh se. Mahse a thunawn kan han chhiar chuan kan suangtuahna khawvela ni chhuak eng mawi tak lo lang chu thil eng mawi danglam takin a rawn thlak a - Ni lawmawm chu a lo chhuak ta, Lawmin i au vang u; Zawlnei zawng zawngte’n an thlir kha Tûnah keinin kan hmu. Tuan leh mang ata tawh Ni chu tuk tin a chhuak a, thilsiam tinrengten an lo lawm tawh thin a, Zawlnei-te pawhin an lo hmu fo tawh a; mahse an hmuh ve phak loh, an hmuhchak em em hmu bik niin min hrilh si. Chu Ni chu Isua a ni tih Kristian-te chuan kan hai awm lo ve. Zofa-te chuan Rihdil khi hring khua leh mitthi khua daidanna lui, mitthi thlarau zawng zawngten thlarau khawvel an luhna khanthuamah kan lo ngai tawh thin a. Chuvangin kan hla phuahtuten symbolical word-a Rihdil an hman pawhin kan rilruah an sawi tum a chiang nghal thin. Amaherawhchu, kan hla phuahtu tam takte chuan Rihdil aiah Jordan lui an hmang uar zawk a. Siamkima erawh chuan heng symbolical word-te hi thil hrang daih sawi nan a hmang thung. A essay, Rihdil leh Mizoram tiha min hrilh dan chuan Rihdil leh Jordan lui chu an indo chiam mai a. Jordan lui chuan Rihdil neih ve loh hmanraw thar tha pui pui a rawn phawrh ther ta fek fuk mai a, chung a hmanrua-te avang chauh chuan zawi zawiin hnehtu nihna a chang ta a ni. Hetah hian Rihdil chu Mizo nunphung leh zeizia (Mizo-na) sawina a nih laiin Jordan lui chu “Khawtlang nunphung leh zeizia” sawina a ni a. Tin, Rih dil chuan Mizo Sakhua ai a awh a, Jordan lui chuan, Kristianna ai a awh a tih theih bawk awm e. Rokunga symbol hman tlem zinga changkanna emaw, ram changkang emaw sawi nana Raltiang ram a rawn hmang hian Mizote symbolist pakhatah a hlangkai ve kan ti thei hial awm e. Amaherawhchu Patea te rualin symbol an han hman hak bak, an hnu lamah kan hmu zui ta mang lo hi chuan kan hla kalh a tikim lo deuh. William Blake-a symbol hmante chu sawifiahna tel lo chuan hriat thiam mai harsa tak an ni a. Mizo hla phuahtute symbol erawh chu a awmzia hriat a har lo hle a. Chang khat-a kan hriat thiam loh pawhin chang dang chuan a symbol kha a rawn tifiah leh tho thin a. A nihna takah chuan Mizote hlaah hian private symbol a awm lo a tih theih hial awm e.
Posted on: Sun, 14 Jul 2013 08:53:24 +0000
Trending Topics
Recently Viewed Topics
© 2015