HLAKUNGPUI MUAL LUAHTUTE; J.F.LALDAILOVA (1925 -1979) Lehkhabu lehlin hmanga Zofate Châwmtu, Mizo ţawng dik ngai pawimawh, chanchin bu enkawltu ţha, Dictionary rotling siamtu, nung reng tur a ni. Mizoram Catholic Kohhran dintu Peter Thangphunga leh Pi Saichhûngin January 9, 1925-a fapa an neih chu a hmingah Laldailova an sa a. Baptisma a chanin a kristian hmingah Joseph Francis phuahin J.F.Laldailova tih a ni hlen ta a. Kum sawm mi lek a nihin kum1935 khan Chittagong-ah High School a lut a. Mizo dang awm ve lo mahse naupang tumruh mi a nih avangin chhel takin a zir a. Țum 22 exam a beihah ţum 17 pakhatna a ni. English Literature-a a tui avangin Mizo ţawng hloh vek khawpin a zir a. Indopui II-naah sikul khar a nih avangin pawl 8 thleng chauh a zir a. Mizo rama a lo kir lehin Mizo ţawng a hranpain a zir leh a. Mizo ţawng pawh a ni tluka duhtui leh thiam an awm lo ang tih khawp hiala thiam a ni. Mizorama a lo chhuah hian an chhungkua an harsa hle a. Chutih lai chuan Boys’ M.E.School-ah 93rd Brigade an inkulh a. Peon hna thawktu tur an duh tih hriain a pa nên an va dil a. Major-in a sapţawng thiam zia a hriatin, “Sap ramah hetiang hi tirhchhiahah kan hmang ngai lo, lehkha zirtir leh zawk rawh u,” a ti a. Mahse an inchhungin a tlin miau si loh avangin a chhun zawm thei ta chuang lo va. Royal Air Force a zawm a. Rimawi a ngainat avangin tawtawrâwt ham a zir a, a thiam hle. Band Master a ni pha. Lêngkhawm hian a lung a tilêng thei êm êm a; Chheih zai leh Tlânglâm zaite pawh a thiamin a ngaina hle a ni. Lehkhabu lehlin lamah ei zawngin, Thu ngaihnawm bu leh Chanchin bu a enkawl a. Bible lehlina a famkim lo lai leh duhthusam lo laite huaisen takin a sawisel thin. Mizo-English Dictionary leh English-Mizo Dctionary a siam a. Tun thlengin zirlaite tân a ţangkai êm êm a ni. Mizo zawng zawng English min zirtirtu ber a ni. October 1978 khan hrisêl lohna a neih tâk avângin Dibrugarh leh Silchar-ah te a inentir a. Dibrugarh damdawi in aţangin dam ţha ang reng takin March 12,1979 khan a lo hawng a. Mahse rei vak lo hnuah Civil Hospital-ah thla khat zet a awm a. May 24,1979-ah beidawng takin mahni in lamah a hawng a. June 7,1979 zing dar ruk-ah William Shakespeare-a ţawng kulmût pui pui pawh Zoţawng nalh taka Zofate lehlin saktu, zirlaite Dictionary-a châwmtu chuan he khawvel hi a chhuahsan ta a ni. Amah awm tawh lo mahsêng a lehkhabu rotling a awm chhung chuan JF-a tih hi a ri reng ang. (Comment; J.F.Laldailova hi Mizo zinga thu leh hla-a lama sulsutu a nihna leh translation lo tihmasatu a nihna zawnah sap tawng hi thiam hle turah kan ngai tlangpui a,a dikna chen pawh a awm ngei a,a sap tawng thiam dan kha a kal khat a, practical & theoretical lexicographer lam rawng a kai zaw mah niin a lang a,William Shakespeare thu leh hla Mizo tawnga a dah hi chu a thahnemngiahna a ropui rual rualin a ba sa ngam deuh em ni chu aw? tihtheihna lai a tam mai a, a sap tawnga a thawnthu thatna & hlutna 20% em pawh hi a Mizo version hian a phawkchhuak zo lo a ni.Chu chu amah J.F ngei pawh khan a hre chiang a, a ziak reng a! J.F-a khan Sap tawng aiin Mizo tawng a thiam zawk a ni. Tunlai Mizo zingah J.F-a te, Siamkima Khawlhring te leh Zikpuiia pa te aia Sap tawng thiam tak tak academic zawng pawhin an awm ta a, heng kan Sap tawng thiamte hian an Sap tawng thiam hi an utawk tur vawn em ni chu aw! ka ti deuh a, beisei ang hian English thu leh hla ril leh ţhate hi Mizo tawngin min lehlinsak tlat lo mai a, Sap tawng basa ngam deuh PL-a te bawk an che leh thin a, an ni hian letling lo phei se Mizo thlaite hian khawvel thu leh hla tha kan chhiar pha ngai dawn lo tihna a lo ni reng mai!)
Posted on: Mon, 22 Sep 2014 10:57:09 +0000
Trending Topics
Recently Viewed Topics
© 2015