HONG KONG PROTEST-A AN HRUAITUPA: JOSHUA WONG HI TUNGE? Hong Kong khawpui kawtthler lun laia mipui, lungawilohna lantira phu luih luih mai leh fawn hlup hlup mai karah chuan rawlthar ria thelthawl, Tarmit killi, lian angreng tak vuah, lu meh rual hmerhmawr pakhat chu a ding a. A aw thuk raih mai chu mipui hlim thawm chuan a khuhbo hneh hle mai. Mahse mipuite chuan pawi an ti lo: Amah leh a thuchah (message) chu an hria a ni. He rawlthar hi tudang nilovin, Joshua Wong, kum 17 mi lek, student activist, Hong Kong khawpui, China sorkar thuhnuaia awm meka democracy movement-a a meizang hlaptu ber a ni. Joshua Wong Chi-fung hi 13 October 1996 khan Hong Kong-ah alo piang a, United Christian College (Kowloon East) ah a kal thin a, tunah hian Open University of Hong Kong-ah zirlai a ni. Joshua Wong hi a kum lamah chuan Zu i tur emaw motor khalh tur emaw in ala naupang hle a ni maithei, mahse tunah hian Hong Kong khawpui, democracy pumhlum anih theihna tura sulsutu pawimawh, mite rin ber (face of the pro-democracy protests in Hong Kong) leh mipuite chawkphur thiamber pakhat a ni der a ni. May 2011 khan Wong leh a school kalpui, Ivan Lam te chuan tuna Hong Kong protest-a hmalatu pawl pawimawhber Scholarism (student activist group) hi an din a. Thla hmasa 27 September 2014-a Hong Kong democracy a dah tura nawrna (pro-democracy protes) a zirlai sang rualin Beijing atanga 2014 Hong Kong Electoral reforms a siam duhlohna lantir a, political rights nawr a, HKSAR sorkar headquarters an beih tuma mi 78 an man zinga khan man tel a ni ve a ni. Khata an mi man zawng zawng deuhthaw kha reiloteah chhuah leh nghal vek annih laiin Wong hi midang anglo takin nihnih chhung custody-ah kawl niin, Sunday tlai khan chhuah a ni chauh a ni. Wong chuan, Hnam hla sak thawm ka hriat hian ka thinrim hi chet pawh ka che hleitheilo a ni, tiin Nilaini a Chinese National Day holiday hriatrengna hunserh hman anih a hnam puanzar pawhparh duhlohna lantir anih hnu lawk darkar khat velah khan a sawi. Tho rawh u! Sal nih duhlo zawngte u, a ti che u a– engvangin nge vawiinah hian heti hian min tih, eng nge sal nena danglamna kan neih? a ti. Wong hi kum 2 kalta a sorkar-in school-a Patriotic education in zirtir (introduce) tura ruahmanna a siam tuma zirlaiten, Chinese Communist Party ruihchilh tura inzirtina (indoctrination) a ni ti a, an duhloh avanga kawng an zawh (rally) atang khan activist huangchhungah a phusaber (figure) a rawn ni tawh a. Kan hriat tawh angin, tun kar hnih kalta chhunga demonstration neihna-ah khan a hnarkaitu ber (pivotal role) chan a chang a, sorkar building beihna (surprise charge)-ah khan a hruaitu ber niin man a ni a, Beijing lam nena inkungkaih, tualchhung chanchinbu thenkhat ten US hmanrua anga chhuah tumin an hmehbel nasa hle a ni. Anihna diktakah chuan, Wong hi tun thangkhat lian chhunga China rorelna hnuaia Hong Kong-a piang, Beijing dodala harsatna an neih hmasak ber a ni. Kum 1997-a British colony hnuai atanga China hnena hlan anih hma chiah kum khan alo piang a, Hong Kong-ah hian Chinese hovin Hong Kong mipuite, China khua leh tui rinawm (patriotic Chinese citizen) a siam a, hneh tuma nasa tak leh chak taka an beih laia seilian a ni. China sorkar thiltih dan duhloh lantina (protest movement)-a a rinawmna hian he khawpuiah hian politics thilah pawh danglamna leh inpumkhatna tuh a ni. Hmanlai political party tihdan hlui piahlamah Internet lamah thalai rual thinurna ti sosangin — tualchhung sorkar ten mainland lama communist inkaihhruaina laka an lungnihlohna te an auchhuahpui a. He inthlakthlengna (shift) hian Wong chu political star, politician tha tak leh thalaite rilru chawkphur thiam tak ang maiah a siam a. Tunlai tak phei hi chuan amah thlawptute leh ngaisangtuten an bawr loh pawhin television camera leh reporters in an hual khup reng mai a ni. Tuntuma protest neih anih hma pawh khan tutute emaw, mikhual lseh hmelhriat lemloh te pawh hian chibai buk a, a darah vuanin, a exam chungchang leh school lam chnchin hrim hrim hi an zawt awllo a ni. Wong hian amah lehna classmate tena midang an influence dan zang zawng hi ngun takin a chik reng a, July thla lam daih tawh a Beijing lamin inthlan dan tur chungchang (election rules) a rawtna an siam, tuna demonstration an neih chhan ber an tihchhuah hma hauh khan Wong chuan The New York Times in an interview-na ah, Electoral reform is a generational war. tiin alo sawi tawh a ni. Chen Yun-chung, Lingnan Unicersity, Hong Kong-a associate professor of cultural studies chuan Mr. Wong leh a rualpui, high school activist te ngaihdan leh inpumkhatna (idealism and organizational skills) hian sorkar leh kum upa lam thlengin rinloh lamah a keuh (outflanked) a ni a ti. An rilru sukthlek (mentality) hi rual u te sukthlek nen chuan a hrang hlauh a, finna leh hriatna tha tak nei, X-Men te ang maiin, mutant ka ti mai, a ti. Hong Kong mipui te rikrap thei tak tak tur inghirnghona ala thleng thei reng. Mahse, chutih rual chuan heng hruaitu danglam tak tak te hi suangtuahna khawvela khawsa mai mai an nih bik ka ring lo. An duh ang hi an hmu vek dawn lo tih chu an inhre tho maithei a, mahse a tam zawkte hi chu bei zel turin an inpuahchah sauh sauh a ni, a ti. A chhuah theihna turin, Judge in habeas corpus a chhuah sak hma khan thuneitute chuan Wong-a chu zanhnih an hreng a. Pro-democracy Labor Party Chairman, kum 57-a upa, Lee Cheuk-Yan chuan tunlai te a thalaiten duhlohna entirna (youthful protest) nasa taka an kalpui mek hi mak a tiin a rilru a khawih hle a ni ti. An hmel hi en teh u, an la naupang a ni, tiin tun Thawhlehni khan Lee-a chuan a dinna dawhsan atangin, tun mipui pungkhawm te chu a hrilh a. Putar te chu an thi mai dawn a, nimahsela thalai te hi chu an dam ang a, anla hneh ngei ang, a ti. Thalai pungkhawm te hnenah chuan au-rinna hmangin thu a sawi chhunzawm zel a, a thusawi chu sawi nawn leh in, mipui lawm a hlawh hle. Wong-a hi, zu in phalna leh zalenna a neih theih nan kum 18 la tling chiah lo mahse, political lamhawia mi hneh taka thusawi thiam tak a ni a. Kum 14 mi lek, High school kallai chauh a nih in, Beijing mipui tlemte in hruaitu atana an thlan chhuah chawp Hong Kong a mi, Leung Chun-ying-an a kalpui tur a tan a rawt Patriotic Education do turin, a thiante nen pawl pakhat Scholarism tih an din a. A tirah chuan internet-hmanga an hmalakna chu an khaw mipui te chuan naupan-ât thiltihah an ngaih sak a. Mahse, zirlai tamtak in an zawm tak zelah chuan an zirtirna kalphungin mite a thlak danglam a, dotu pawl lian tak a lo ni ta reng mai a ni. Kum 2012 a kawngzawh pui tak an neih hnu khan, Hong Kong Sorkar chuan an thiltih tum chu an dahtha rih a. Chuta tang chuan Scholarism chu voter ten an duh zawng ram hruaitu an thlan theih nan, democratic election neih nawrtu rawn ni chho in, tunah chuan khawvelin athlir ta thup mai a ni. Kar hmasa khan zirlai te class kal tur an lo dang bet (boycott) bawk a. Kum nga kalta khan, mipui te hnenah hian zirlaite an la in rawlh ang tih hi hrilh ta la, tumah in an awihlo ang che, tiin The Times magazine chu tun July thla khan a sawi a. Zirlai te tan, kan thil neih chu kan thil tih tuma tumruhna leh kan ngaihdan luhlul taka pawm tlatna hi a ni. tiin a sawi a, Zirlai ten hma an hruai loh chuan, tu in nge hruai chuang ang? a ti. Hong Kong chanchinthar lakhawmtute chuan film-star te leh zaithiam te an ngaihven ang bawk in an ngaihven a, July thla phei kha chuan Wong-an University entrance exam a pek khan ngaihven a hlawh nasat lutuk avangin, News conference a neihpui phah ta ringawt a. (Hong Kong in a duh khirh zia ngaihtuah in, Wong-a result chu a laihawl ang a ni a, chu bakah, ralkhat atanga zir theihna (distance learning) kalpui thei University-ah a in ziak lut a ni.) Wong-a chuan politics-a a tui em em na chhan chu a nu leh pa, Grace leh Roger Wong-te atanga a dawn anih thu a sawi a, anni hi khawtlang rorelna diklo vei em em tu te an ni a, an fapa hi an chhuang hle a, mahse lansarh/lar loh an thlang zawk. Wong-an thalai rilru pu chunga hma a lakna avanga rilru hneha awm tawh tamtak te chuan Hong Kong-a awm traditional democracy camp te ai chuan inrem harsa an ti tlangpui. Chinese sorkar in an duhthusam hi a tihhlawhtlinsak that duhloh chuan he nawrna hi an kalpui zel ang a, an inkar daidanna hi a zau belh zel ang a ti. Amah interview tum te leh message hmanga biak tum te chu a chhang duhlo. Kumin kumtira Hong Kong Online Publication nen an inkawm na ah, Wong-a chuan, Do pawh indo hma a inrem tum chu a ât-thlak a ni, a ti. Inbiakna neih hi pawi ka ti lo, mahse chumi hma chuan bargaining chips in neih hmasak a tha ang. Chutiang in neih loh chuan, engtinnge in indo theih ang? a ti.
Posted on: Thu, 02 Oct 2014 17:01:30 +0000
Trending Topics
Recently Viewed Topics
© 2015