Hamlet-a lemchan thawnthu-a Polonius-a’n Hamlet chungchang a sawi a: “Though this be madness, yet there is method in ’t” ( A Sap tawng tluangtlam chuan “There’s a method to his madness) a tih ang deuh khan mihlim, thlarau mi kan tih-ah pawh Kulikawn mihlim hlun Pi Rami hi chu kawngkal fel tak neia thlarau mi a ni a, a nu bual ve hauh lo. Thlarau bo man tuma a tha leh tui a sen ral nasat tawhzia te hi sawi tham a tling. Kan inah a dan pangngaiin a rawn dâk zawk a. Ka lo chêr ta deuh nge ni, “Khaw nge Mafaa” min rawn ti a. Keimah ka nih thu-in ka lo chhang a. “Mafaa, how are you? Are you feeling lonely like a cloud?” min rawn ti phawng mai a. Ka khawhar rûk ngawih ngawih lai tak a ni kher bawk nen, thlarau lama hriattirna a dawng emaw ni chu aw, ka ti rum rum mai. William Wordsworth-a poem lar tak a, I wander lonely as a cloud a tih te kha ka hre chhuak uarh uarh a. Ka ngaihtuahna a vâk thui hle. Rei iak kan titi hnu-ah thingpui a duh loh avangin chithlum mum (Doublemint) ka pe a, kan inthlah ta a. Hmanah pawh a chungchang heti ang hian ka rawn update tawh kha: Kulikawn mihlim siniar tawh tak maiin ka lu chunga kut nghatin min rawn tawngtai a. A tawngtai hawn nan: “Love lifted me! Love lifted me! When nothing else could help. Love lifted me!” a han ti tê tê a, chutah duah tak maiin tawngtai hla sei tawk hi a sakin min han sak khum par par a, a hmawr bâwk nan, “Tichuan, Lalpa, Mafaa hi ‘And when I stand upon the other shore, Ill praise Him more and more.’ ti zel thei turin pui ang che,” a han tih leh zauh phei chuan ngaih hi a ngam zui vawng vawng mai nia. Tun hma khan tawng hriat lohah khan “Asssh Shaa da dat kha da da dat Kalvari khei raw lai, bukraw tui hiar maw!” tih vel piah lamah, Sap tawng hi hman an ching ve reng reng, “Holy hemisphere in the highest Hauhnar!” tih te, leh tlema changkang deuhin naupang zirlaibu-a mi, Boat sails on the river, ship sails on the sea tih ang reng te kha an chham thin a. Mahse Vawiina mi tawngtaitu hlathu chham hi chu a kalhmang a dik thlap mai a. Kan lallukhum chu a inchhah hleih leh ta tap mai dawn a nih hmel. Kei chu chung lamah pawh ka chanvo hi a vâwng leh ta lap mai, Pu Hawla chanvo ang vûng a ni leh ta.
Posted on: Sat, 19 Jul 2014 09:24:03 +0000
Trending Topics
Recently Viewed Topics
© 2015