Happy Thanksgiving to all my families, relatives, and friends in America. Enjoy your delicious meals with thanksgivings to our God. (Filipai 4:4) Ko e kii feimeatokoni pe ena naa hao atu i hoomou ngaahi tepite mohu o e aho ni. Fakatauange ke mou mau kotoa pe ha aho Tuapulelulu lelei mo hotau Eiki ko Sisu Kalaisi. Sisu Emeni. Tu’apulelulu, Novema ‘aho 28. Lau Folofola: ‘Aisea 2: 1-5, 1 Ko e folofola naʻe hā kia Aisea foha ʻo ‘Amosi, ʻo kau ki Siuta mo Selusalema. 2 Pea ʻe hoko ʻo pehē ʻi he kuonga ʻamui´, ʻe fokotuʻu ʻa e moʻunga ʻo e fale ʻo Sihova´ ko e ʻulu ʻo e ngaahi moʻunga´, pea ʻe mahiki hake ʻi he ngaahi foʻi maʻolunga´; pea ʻe tafe ki ai ʻa e ngaahi kakai kotoa pē. 3 ʻIo, ʻe ‘oange ʻa e ngaahi kakai lahi, pea te nau pehē, Haʻuā, ke tau ʻalu hake ki he moʻunga ʻo Sihova´, ki he fale ʻo e ʻOtua ʻo Sēkope´; pea te ne ako kiate kitautolu hano ngaahi ʻalunga, pea te tau fou ʻi hono ngaahi founga´: he ko Saione ʻe ʻalu mei ai ʻa e fakahinohino´, mo e folofola ʻa Sihova´ mei Selusalema. 4 Pea te´ ne fakamaau ʻa e vahaʻa ʻo e ngaahi puleʻanga´, pea te´ ne sivi ʻa e meʻa ʻa e ngaahi kakai lahi: pea te nau tuki huo ʻaki ʻenau ngaahi heletaa´, mo e ngaahi hele ʻauhani´ ʻaki honau ngaahi tao´: ʻe ʻikai ofa heletā ha puleʻanga ki ha puleʻanga, pea ʻe ʻikai kei fai ha akotau. 5 Fale ʻo Sekope ´, haʻuā, ka tau laka ʻi he maama ʻa Sihova´. Veesi Fakalaulauloto: ‘Aisea 2: 4-5, “Pea te´ ne fakamaau ʻa e vahaʻa ʻo e ngaahi puleʻanga´, pea te´ ne sivi ʻa e meʻa ʻa e ngaahi kakai lahi: pea te nau tuki huo ʻaki ʻenau ngaahi heletaa´, mo e ngaahi hele ʻauhani´ ʻaki honau ngaahi tao´: ʻe ʻikai ofa heletā ha puleʻanga ki ha puleʻanga, pea ʻe ʻikai kei fai ha akotau. Fale ʻo Sekope ´, haʻuā, ka tau laka ʻi he maama ʻa Sihova´.” Kaveinga: Ko e visone ki he melino ‘a e ‘Eiki´. Poupou: Ko e visone´ ‘oku ne o’i kitautolu ke tau laka kimu’a, pea ne fakaava ha ngaahi founga fo’ou ke tau sio ki ai mo mo’ui’aki. Pea ‘oku fa’a ‘omi ‘e he visone ha ngaahi faingamālie fo’ou ke tau sio ki ai. Pea ‘i hotau folofola ki he ‘aho ni´ ‘oku ‘omi ai ‘e ‘Aisea ‘a e ‘amanaki ‘e malava pē ke ‘i ai ha melino ‘i māmani, “Pea te´ ne fakamaau ʻa e vahaʻa ʻo e ngaahi puleʻanga´, pea te´ ne sivi ʻa e meʻa ʻa e ngaahi kakai lahi: pea te nau tuki huo ʻaki ʻenau ngaahi heletaa´, mo e ngaahi hele ʻauhani´ ʻaki honau ngaahi tao´: ʻe ʻikai ofa heletā ha puleʻanga ki ha puleʻanga, pea ʻe ʻikai kei fai ha akotau.” (v.4) Na’e tui pē ‘a e toko lahi ‘e malava pē ke laka ‘a e ngaahi pule’anga´ ‘i he “maama ‘a Sihova.” (v.5) ‘Oku mahino ngata’a kiate kitautolu ‘a e visone ‘a ‘Aisea´ he ‘oku te’eki ke lava ‘e he ngaahi famili ‘o e fa’ahinga ‘o e tangata´ ke nau ako pe ‘e fēfē ha’anau mo’ui mo nonofo fakataha. Pea ‘oku tau fanongo mo mamata pē he ngaahi ‘aho´ ni ‘a e kei faingata’a ke mo’ui mo nonofo melino a e pule’anga mo e pule’anga; na’a mo e matakali mo e matakali ‘o ha pule’anga pē ‘e taha (eg. ‘Eulaki, ‘Afikenisitani, ‘Isileli mo Palesitaine, etc.) Na’a mo e fa’ahi Lipapilika mo e Temokalate ‘i he Falealea ‘o ‘Amelika´. Kaekehe, ko e visone ‘a ‘Aisea´ ‘e ‘i ai pē ‘aho, “pea ʻe ʻikai kei fai ha akotau.” (v.4f) Pea ‘oku fakamahino ‘e he palōmesi ne fai ‘e he ‘Otua´ kia ‘Aisea´, ‘a e me’a ‘oku lolotonga hoko ‘i he taimi ni´ mo e me’a ‘e hoko ‘i he kaha’u´. Koia ai, ‘oku taau leva ke tau ‘unu atu ‘o laka ‘i he kaveinga ‘oku ‘i ai ‘a e fakatu’amelie´ ki hono ngāue’i ‘o e kaveinga ko ia´, “te nau tuki huo ʻaki ʻenau ngaahi heletaa´, mo e ngaahi hele ʻauhani´ ʻaki honau ngaahi tao´.” (v.4e) Tatau pē mo ‘Aisea, ne pehē pē ‘a e ui ‘e Sīsū ‘a hono kau muimui ke nau mo’ui ‘aki ha ma’oni’oni ‘oku ma’olungaange. Na’e mahino ‘aupito ‘a e fakahinohino ‘a e lao´ ‘i he taimi ‘o Sīsuu´, ke ‘oua na’a fefakafakapō’aki ‘a e taha mo e taha. Ka na’e ui ‘e Sīsū ‘a e kakai ki ha tu’unga ma’olungaange ‘o ako’i kinautolu ‘oku ‘ikai ngata pē ‘oku hala ‘a e fakapoo´, ka ‘oku hala fala’ulungaanga foki ke taaufehi’a. Kia Sīsū, ‘oku mahu’ingaange ‘a e ongo’i fakaeloto´ ‘i he ngāue ‘oku tau sio ki ai´. ‘Oku mahu’ingaange pe ko hai kitautolu ‘i he ngāue ‘oku tau fai´. Ko e me’a eni ne tokanga ki ai ‘a e poto ko Solomone´, “ʻI he meʻa kotoa ʻoku´ ke tauhi´, muʻomuʻa ʻa e lama ʻo ho loto´, He ʻoku founga mei ai ʻa e ngaahi meʻa ʻoku ʻasi ʻi he moʻui´.” (Palōveepi 4:23) Ko e hala eni ‘oku fungani hake´ ke ‘uluaki lama ‘a hotau loto´. Lotu Hūfia: ‘Otua ‘o e melino, ‘alo’ofa mai ‘o tokoni’i kimautolu ke mau mo’ui ‘o hangē pē kuo ‘osi pule ‘a ‘ofa ‘i he’emau mo’ui´. Pea tuku mu’a ke mau mātā ha ‘aho ‘e toka lingolingo ai ‘a e melino ‘a e ‘Afiona ‘i ho māmani´.
Posted on: Thu, 28 Nov 2013 10:45:33 +0000
Trending Topics
Recently Viewed Topics
© 2015