Heart Story of the Day November 19, 2013 Dear Mama Lou, Tawga lang ako sa panglan nga James, 25 years old nagtrabaho sa usa ka opisina dinhi sa Mandaue. Maminaw gyud kami sa inyong programa matag adlaw pina-agi sa among gamay nga radyo sa opisina, ang Win Radio ang among kauban sa among trabaho aron dili malaayan. Ni padala ako aning akong tampo kay na problema ako karon sa gugma, problema sa akong lovelife, ambot kung valid ba kini nga lovelife kay ako raman ang ni bati niini, wala pa sad ako naka sulay ug relasyon, wala pa gyud ko naka ingon. Manggiuwawon ako kung pagbati na ang hisgutan apan sa ubang butang wala koy problema. Ganing sa akong trabaho sa sales maayo man ang akong performance, usa man ganing ako sa kanunay ma recognize sa among kompaniya kay dali ra ako maka kuha sa akong quota. Apan kung pa atubangon na ganing ako ug babaye unya mopadayag sa akong pagbati, daw sa malanay gyud ko, mawala ko sa akong kaugalingon, kan-on ug pildohon ko sa kauwaw. Mao nag hangtud karon wa gyud koy uyab. Sige lang ug pangibog wa gyuy agi. Naa koy office mate si Tessa, sama ra sad nako ug idad, gwapa, hilomon ug simple ra ang kinaiya. Mga butang nga akong na uyonan diha kaniya. Soud kami isip higala kay kauban man kami sa sales team. Barkada ang among trato sa usag usa uban ang among mga ka team. Kanunay kami mag uban sa mga lakaw labi na nga sama kaming walay mga kabilinggan. Bisan pang taudtaud na sad kaming soud, wa gyud kami naka hisgot kabahin sa uyab-uyab. Wala sad ko nangutana diha niya sa iyang kaagi kaya alang kanako personal ra kaayo kini nga butang. Apan angkonon ko, naa gyud koy pagbati kaniya, di lang ko ka ingon, ako lang gi antos ang tanan, malipayon ug kontento na lang ako nga higala kami. Ni atong mi aging mga simana, ni abot ang akong gikahadlokan, naay nanguyab ni Tessa, taga laing departamento, gwapo, sakto sa barug, maayong manabi. Unsa may akong ikasarang ani? Mag unsa man sad ang akong pagkagusto, unsaon pag depensa nga dili man mi uyab, wa man ganing ko naka ingon. Ang akong ginabuhat karon, akong galgalon ug lakaw si Tessa aron dili sila magka date sa maong laki apan usahay maka ipsot gyud. Makita ko hinoun nga walay gusto si Tessa kaniya apan mahumok unya ang baruganan tungod sa iyang pagkapursigido. Daw sa nagtinga na gyud ang akong paglaum nga ma angkon nako ang gugma ni Tessa. Tambagi intawon ako ninyo unsay akong angay nga buhaton aside sa pagpangamural nga mahibaloan lang ni Tessa nga aduna akoy pagbati kaniya. Usa pa sad, iya ba kaha akong sugton. Maglisod man gyud ko ug sulti, dili man ako maayo sa mga pulong kung kabahin na sa pagbati. Tabangi intawon ako ninyo. Daghang salamat, James
Posted on: Mon, 18 Nov 2013 15:09:53 +0000
Trending Topics
Recently Viewed Topics
© 2015