Hmailam caan thil thleng ding zohzirhnak I. Jh Thangce to Rihli 0 minutes agoDetails Thuphuan 17:11; Dan.7:24,25... Simfengnak I.03. A hmaisa ah, kan Cathianghlim hi a hrampi cu Israel miphun, an hmailam thuhla pawl thawn rak pehparaw vivo ih nganmi, simrelmi le theihternak an si ti kan theihfeng hmaisat atul zet. Cui thuhla parah thumaw vivo in, Leitlun miphun, hrinhnam tintian hrang khalah pehtlaihawknak le peparawknak thukzet a um vivo tikhal kan theih atul fawn. Tui sun in ih Kawhhran khal hi, Israel miphun thawn pehparawknak le kaihhnawihawknak kan nei thukzet fawn. Ziangasikhalle, Cathian theifiang sinsin vivo thei ding cun, Israel miphun le an thuanthu thawn pehtlaihawknak thukpi le kau zet an nei timi Pom hmaisat atul tinak asi. Israel miphun pawng huatih rak huat mei le an mahthawi pehparawmi pohpoh aat- do ih rak dokalh ringawtnak hin, Pathian nung le A thutak theihfeng theilonak ah mi a hruai lut thei tihi, kan hmuhtawnmi an si. Cuticun, kan vun zoh vivo kei afiang vivo ko ding. 1. Dan.7:24,25 Kii pahra cu cui Uknak a uktu ding Siangpahrang pahra pawl an si. Cule Siangpahrang dang pakhat asuak ding; a mah cu adang pawl thawn abangaw lo ding ih, Siangpahrang pathum pawl cu a hlo ding. Cungnungbik Pathian a relsia dingih, Pathian Minung pawl ahrem ding. An zin le Daan pawl le Puai/ an neihmi Daan tampi thleng atum ding; Pathian Minung pawl cu Kumthum le hrek sung a kut hnuaiih Aretha ding. (1). Ki pahra le Siangpahrang pahra... Mi hrekkhat pawl cun, AD. 351-474 karlak hrawngih, Rome Rampi uknak rak laksaktu, Hramlak miphun ( 10 barbarous tribes) pahra pawl ih Uknak kha asi tin an zirh. A rak si theilo hrimhrim. Hi thuhla hi, Thuphuan 17:9-12 sung kan sim asile afiang sinsin ding tin Ka ruat. Asile, hi Siangpahrang pahra pawl cu zo ansi pei??? i). Tui sun Ni ih uknak taktak, thu neihnak thawi Ramkomkhawm Uk-tu ra cangsuak hrih lo mi-nung an si. A Thlam cun an lang rero zo; an din tum reromi confederation pawl khi an si. ... Ziangah tile Pathian in a tumtah famkim ter vivo dingah, an thinlung sungah ruahnak apek haiih cutin an Uknak /thuneihnak cu Sahrang kutah an pek; Pathian ih Thu afamkim hlan tiang in, ( Dan.2:44; 7:24; Rev.17:8-17). Hi pahra pawl cun, Sahrang ( Anti Christ) thawn Thla sawmli le thla hnih,( 42 months), asilole kum sarih harsatnak caan neta lam Ni 1,260 sung an uk tlang ding. Anti Khrih bawm in, Armageddon ah Khrih do dingah an rak tang khawm ciamco ding, ( Dan.7:24-27; 8:25; Thup.13:5; 17:14-17; 19:19-21). Asinnan, theihcia bang in,hi pahra sung in pathum cu, Anti Khrih in an hram ihsin aphawng ding, an Uknak a cemter ding ti asi. Cule hi pawl cu hlan lai Rome empire Uknak ram sung ihsin an ra suak ding. Cui Rom empire/ Europe timi ahcun, Leitlun pumhuap deuhthaw ih ramtin tiang an raktel tikhal kan theih atul. A taktak ahcun, tui sun Ni ih, Arap Khawvel, kan Musalim ram Uknak hngetkhoh zetzet pawl khi, Rome empire Hlun/ a hlan lai ih Rome Uknak sungih rak um theh an si ticu, thuanthu zir le siar zatei theih asi...( ... Will yet be formed inside the old Roman Empire ..). Kan ruahnak ih kan theih ringring dingah, Dan.2:40-44 sung le 7:22-27... Thuphuan sung pawl ih in rak simmi, Ram Uktu pahra, Ki pahra leh Zuklem Pi Kezung pahra pawl khi, tui sun Ni ih Europe kan timi sung lawng ihsin an ra suak/ um lo ding tikhi asi. Rome Uknak sungih rak teldah, tui sun Ni ih adang tei empire run nei pawl khal an tel thluh ti kan theih atha, (cf. Dan. 7:2,17;Thup.17:15-17 zoh.) Cu ciah cu Anti Khrih ih Leitlun pumpi auk theinak hrampi, Pathian ih duhdan le tumtah arung famkim vivo theinak hrang an rak si; Pathian an dokalh tuk ruangah, a Hrem tlang vialvo theinak ding asi,( cf. Dan. 2:44,45; Thup.19:11-20:7....an uklai tak ah, Pathian in ram Uknak arung din suak ding.). ii) Siangpahrang pahra pawl cun, caan khat sungah, caan bangrep cio le tumtah bangrep, hnatuan bangrep an nei ding,( Dan. 2:44; 7:7-8,19-27; Thup. 13:1-3; 17:12-17). Cule kan theihfeng ding ih thupi tukmi cu, THU NEIHNAK, UKNAK CU SAHRANG RA SUAK HLAN AH AN RAK NEI/ CO NGAH, DIN SUAK ZO DING ti hi asi, ( Dan.7:7,8,19-27 zoh). Cutin, cui pawl cun, Rampi Uknak a pasarihnak (7th kingdom) an run suakter ding; an run dinsuak tinak asi cu..! Cule SAHRANG/ ANTI KHRIH in Uknak a run congah le veten, a pariatnak Rampi uknak ( the 8th kingdom) a run dinsuak cih ding, ( Thup.17:8-11). Hi thuhla a hnuailam ah kan run simfiang bet ding. iii) Hi Danial 7:24 sungta hi kan dunglam ah a rak famkim zo ti theinak thu-tansan ding le ngemhnget theitu thilcang a um hrih lo. Cutin kan mai san hnu ihsin, a Thlam ih rungcang fiang thuhla, thilcang mi lawngte a rung um vivo ti kan thei. Mi hrekkhat pawl cun, simzo bang in AD. 4th &5th century hrawng ih Pop pawl Uknak leh Barbarous Lu-zai pawl ih Rome empire an rak uk lai san ahkhan arak famkim zo an ti. Cui Pomdan cu a cang thei hrimhrim lomi Pomdan, ruahnak asi. Khrih ih rungtumsal/ veihnihnak ratsal caan tiang ih thilcang ding hlir an rak sim sungmi ti kan theihfeng atul, ( Dan.2:44,45; 7:19-22; Thup.13:1-7,16-18; 17:9-17; 19:11-20:7). 2. Thup.17:11, cf.15; 13:1,2; Dan.7:2,17. : A rak nung dah nan, tu ah anun nawnlo mi Sahrang cu sahrang pariatnak asi; Siangpahrang pa sarih lakih telmi asi ih, siatralnak a tleng dingmi khal asi. Hi thuhla kan theifeng sinsin theinak dingah cun, dunglam thuanthu kan zoh lo atheih lo ding. Siangpahrang a pariatnak hi, ziangtik caan, khuitawk ram pawl ihsin siar thawk, ngemhngetmi asi pei, ti pawl khi athupi zet ding. SIANGPAHRANG PARIAT pawl: (1). Egypt ... Khuahlan ihsin Ram Uknak hngetkhoh zet neitu le Pathain nung dodal ringring ram, Camsiatnak Ham ih cithlah pawl an si. Cutin, Israel fate pawl ukbet ih hrem hmaisabik ram khal asi fawn, ( 1 Siangp. Bung 14; 2 Siangp. Bung 17; 18:21- bung 19:38; 23:28-37; 25:25,26; 2 Sansiar.14:9-12; 16:7-9; Isai.Bung 30-31; Ezk.29:32..).. Cathianghlim sungah, Egypt timi tongfang cu vei 731 lai alang; cule a zaten Israel mifa pawl thawn pehtlaihaw ih sim-rel mi hlir te an si. Moses Hmang ih hruaisuak, zalen nak pek an sihlan ah kum 80 lai Nasa zet ih Israel rak ukbettu, hremtu ram an si. Babylon san lai, BC 600-500 karlak hrawngih remawknak caan malte sung an neih ti lobak, tui sun Ni tiangah, Egypt ram le Israel pawl an remaw dah kello. (2). Assyria... Khuahlan san lai, Pu Nimrod ih rak dinsuakmi a rak si, ( Semt.10:8-12). Hi miphun pawl khal cun, Pathian ih siannak apek vekin kum 175 sung Israel tefa pawl rak hremsiat theinak, ukbet theinak pek an rak si,( 2 Siangp. Bung 15-17,19,23,24 zoh). Cathianghlim sungah Assyria ti hi vei 175 cekci alang, ti asi. Cule Israel tefa pawl thawn an rak pehparaw vivo tlangpi. Anti Khrih thawn Israel tefa pawl an run hrem in an run do ciamco sal fawn ding, ( Isai. 10:20-27; 14:25; 31:4-9; Micah 5:5,6). (3). Babylon... Babylon Siangpahrang khal, Judah pawl hremsia ding leh kum 70 sung ukbettu dingah rak ruat asi, ( 2 Siangop.20; Isai. 39; Jerimiah 24; 25:11..). Babylon timi tongfang cu vei 284 lai, Cathainghlim sungah a lang. An zate deuhthaw thotho in, Israel tefa pawl thawi peparaw ih nganmi hlir an si. Danial Cabu sungih, Nebukhadnezzer ih Larawknak hmuhmi, Milem zukpi ih Lu kha asi. Danial ih san ihsin kan siar asile a pakhatnak Ram Uktu tinak asi cu...! Danial in Pathian Hnen ihsin Laarawknak a hmuh caan ahkhan, a mai san hnu ih thil thleng ding vial a rak hmuhter theu. Ziangahtile Hmailam thil thleng ding ti asi ruangah asi. A maisan hlan ih Thup le Hla, ram Ukawknak, Israel fate pawl hrang thawn pehparawmi pawl Pathian in Laarnak a rak hmuhter lo. Hmailam hrang lawnglawng arak hmuhter.......! Mi hrekkhat pawl cun, Gentiles pawl caan, (... The times of Gentlies) timi kha, hi Babylon Uknak ihsin a thawk tin an rak sim, ruat sual pang theu. A taktak ahcun, Gentile pawl caan timi, Israel pawl Uk bet le hremsiat an si tirten arak thawkmi asi. A tlun ih kan nganzo vekin, Egypt Uknak ihsin arak thawk ih, Khrih ih veihnihnak ratsal caan tiang asi ding. Cui Ni ihsin thawk in, Pathain Thutiamkam cu Israel fate pawl parah/ Pathain hnamthlan pawl parah a ruang famkim thlang ding. Cucu Kum 1,000 Uknak kan ti rero theu cu asi. A hleicetak in hi kum 1,000 Uknak cu Israel pawl hrangih ruatsakbik an si. Asinan, Abraham hnen ih Thukam cia vekin, Khrih ih ruangah,( Gal.3:16; Semt.12:1-6), a mah Zumtu pohpoh cun, ziangtik lai caan khalah, Pathian zangfahnak an congah ringring ding. Cui ruangah, kum 1,000 Uknak sung khalah, Leitlun miphun tin sung in, Pathain Ukan, cucu Vanram Uknak( the kingdom of heaven) asi, an congah cio ding asi. Hi thuhla thawn pehparaw in, run ngan vivo leh asi ding. 4. Medo-Persia: ( Dan. 2:32,39; Cule Savom tin 7:6 ah kan hmu; Tuu-cang 8:20 tin kan hmu). Hi Medo-Persia pawl hin, Irael miphun pawl kum 100 lenlo lai an rK ukbet fawn. Tui sun in ih Arap ram laili, Iran le Irak ram khai an si. Cule UAE ram pawl khal, hi Medo-Persia ram ihsin rungsuak hlir an si. Cathainghlim sungah vei 58 lawng alang. Asinan athupi hlirte an si, ( 2 Siangp.17:6 18:11; Isai 13:17; Dan. 5; 10: 13-21; 11:1-2; Eza 1:1-8; 4:1-9; bung 9; Neh. Bung1-13). 5. Greek: ( Dan. 2:32,39; Tlavang tin, 7:6 ah siseh, Me-cang tin, 8:5,9,20-25 ah siseh, kan hmu). Cathianhlim sungah vei kua(9) lai lawng alang; Thlunghlun le Thlungthar an tawnawknak hrawng thilcang asi ruangah asi hamng. Asinan, Meccabees timi, Apocrypha sungah cun vei tamtak alang tin an sim. Cule, Dan. 8, 11, 12; Thup. 6:1-8; 13:1-18; 17:9-17; 19:19-21 sung pawl ih kan hmuhmi, Ram Uktu pa khin, Ram Uknak a pariatnak a run dingsal dingmi cu, hi Kreek Uknak hi asi ding........A ti damsal ding atimi Thup.17:11 takhi, hi ram Uknak asi ding. 6. Rome: ( Dan.2:33,40; ..Uknak dang thawn abangaw lomi Uknak..7:7,8, 23,24). Thuphuan 17:9-17 kan zoh asile, Sahrang Lu sarih le Ki pahra nei, timi kan hmuhmi ih, A Lu paruknak cu, hi Rome Uknak hi asim duh. Cui Lu pasarih cu Tlang pa sarih le Siangpahrang pasarih khal an si tin kan fiang,( cg.9 zoh). Cutin, hi Rome pawl cun, Israel miphun pawl cu kum 200 leng lo an rak hremsia, an ukbet thluh, ( Kawhhran tel in..). Hi ram uknak sung ihsin, Uktu dang, a pasarihnak leh a pariatnak Uktu ding an rasuak ding. Cuti ti ruangah, Rome miphun, Europe ti tengteng ah kan ruat lo atul; atlun lamah kan rak ngan zo. 7. Rome Uknak dinthar salmi ( Revised Rome) Thup.17:10,11 kan zoh tikah: (1) Siangpahrang 7 lakah, panga an tlu/ cem zo, pakhat in a uklai; adang pakhat cu ara hrih lo, ( hihi tui kan simmi Revised Rome cekci hi asi) . Arat tikah, caan reilote sung lawng Uknak a nei ding...ti pawl khi an si. Cuti asile, Tui uklai atimi cu a paruknak asi tikah, simzo bang in, Rome empire kha asi. ( Thuphuan ngan lai san, khai lai caan ahcun, Rome empire in Leitlunpi arak uk tikha vun mangsauk sehla maw...!). Cule, a ra hrih deuh lo, a rat tikah caan reilote sung lawng Uktu ding cu, Ki pahra pawl an si tinak asi. Cui pawl cu, sim rero zo bangtuk in, Leitlun ramkom dinsuak reromi, ( Confederation) ti afiang mei. Cucu, Lu sarihnak, ram Uktu pasarihnak tinak asi. Tuisun niah, cui Ramkomkhawm pawl cun, Leitlunpi cu, an mai duhdan le an tumtahdan vek cekci in Uknak an nei thei hrih lo fang hi asi. Asinan, Sanghrang Lu pasarihnak, ram Uknak pasarihnak cu kan mai san rori ah din thawk rero zo asi ticu, kan mit hmuh, kan hna theih a si ko lo sawm....! Caan tawite sung lawng an uk ding tikhal cing ringring sehla...! (2) hi thuhla cu, kan sim dingmi, Sahrang Lu/ Uktu a pariatnak ding khi asi. 8. a rak nung dah nan, tu ahcun a nun nawnlomi Sahrang... Ti asi tikah, Bible scholar tampi cun, Kreek ram Uknak, kha Anti Khrih in arun tinlungsal mi Uknak asi tin an zum. Cutin, cui Uktu pasarih lak ihsin ara suak ding ti asi tikah siseh; cui Sahrang cun, a Lu ah hriamhma natnak, Thihnak thlak a tuar nan, nuntersalmi asi, ( Thup.13:3,12) ti asi tikah siseh; a pariatnak Uktu, damter salmi cu, a hlan ih Uknak rak congahtu Siangpahrang panga sung ihsin ati fawn thawn, Kreek empire nuntersalmi assi theibik ko. Cui Uknak a pariatnak ih Uktu ding cu, Sahrang tin kan thei zo. A mah ih run dinsuakmi, asilole a Uknak cu a pariatnak Uknak tinak asi bik cu...! Hi Ukank pariatnak cu, kum sarih harsatnak atlen hnu ih Rungsuak dingmi, Uknak a pariatnak asi. Anti Khrih le a ho pawl in, Leitlun Ramkom tinten an Bum-aa thei ding ih, ( cf. Dan.8:22-25 Leitlun thuanthu ah, a hrekkhat lai cu arak famkimnak tla aum abang nan, Anti Khrih ih thuhla thawn pehparaw vivo ih simsungmi an si), cutin A hnenah, thuneihnak, huham zaten an up thluh viar ding, (Thup.17:12,13; 13:4,7-18 siar.). A mah cu Leitlun Mitin in an be ding. Leitlun Siangpahrang-lem arun tuan ding. A tak arung thlen tikah, ti cemral leh siatsuah asi ding... Amen. Siartu zate hnenah, Pathain malsawm um koseh. Khrih ah.. Jh. Thangce Lal
Posted on: Sun, 27 Oct 2013 21:01:07 +0000
Recently Viewed Topics
© 2015