Home deptt. ye Kohima ngo Dimapur District kuma dolo alughi tsa lo yekipithi tsu Dimapur, Amthaqhi 20 (SZN): Home Department General Administration Branch-I ye yekipithi vecheo no Amthaqhi 9, 2013 tsala lo Cabinet kukuputsa shikeu lo xakutha shikeu kiqi lono ‘R. Ezong Committee on Inter-District Boundary between Kohima and Dimapur District’ wu phukulu yephe vea. Yekiphe hipau lo akhoto shi Kohima District lo Peren qholo Jalukie sub-Division (Itehi ye Peren District shivea) ngo Dimapur District lo Dhansiripar Sub-Division tsa lo xukuami qqo pelo panno kukumsu tsulu peni keu ghenguno yephe pe puani. Alughi ye R. Ezong Committee wu phukulu kiqi lono kije pe puani. Point 0-1. Itehi kije pe pua keu lughi ye Point-0 lo Dhansiri (Demakhi) ngo aghoki aghulo lakhi Munglumuh ngo Jalukiekam phu kuma dolo qou akeu lono huthu ani. Alughi hipau ahu-u iqhoghi kelo yeghikulu laghi katha kelo itaghi aghoki lakhi aghulo qou ani eno aghoki atughu-u kuma kusho lu akeu no Point-1 shiani. Point-1 lono alughi ye ahu-u kudau Old Forest Rest House kudau iqho ve ani, tiye Old Forest Rest House toni ke zulo Point L akeu toni kelo meter 300 qhalo no kipelau kudau wuve ani eno iphi akuthonehu lakhi aghi keu kutolo iphi nani. Akuthonehu hipau ngo yeghikulu laghi kuma kove no alughi ye Daniel phu kudau iphi ve ani ikemu iphi aphu to mphi lono itaghi kipelau kudau anato akeu lo iqho ve no tile no apeu aghoki kini akeu veche susu iqi no apeu aghoki hikuma kusholu akeu kutolo iqi ani. Tithiu alughi ye aghoki ahu-u kudau iqho ve no Jalukiezangdi ngo Shikavi kuma muta dolo yeghikulu laghi akeu kutolo iqhoghi no itaghi tile no apeu R. Ketsiangkeiuki (Laidiling Disa) kutolo iqi no tile no Point-2 sasu kusholu ani. Point-2 lono alughi ye ahu-u R. Ketsiangkeiuki phu lono vekukhu lakhi qhalo Pokhaho phu kutolo iphi ani. Tile no alughi ye R. Ketsiangkeiuki qhive no aghoki aghulo akeu lono apeu iqi no anato lakhi akeu lo ikughi ani, tithiu itaghi alughi ye apeu iqi no tile no R. N/Disa- Point-3 kutolo ikighi ani. Point-3 lono alughi ye ahu-u kudau R.N/ Disa veche susu iqho no Old British/Forest road mark Point-4 kutolo iqho ani. Tiye Jalukie Sangtam ahu-u vekukhu 2-3 qhalo ani. Point-4, alughi ye ahu-u no kipelau kudau Ballu Nallah/H.Disa lo qo ilo akeu ghoki mutsa lono wu no Point-5 sasu kusholu ani. Tithiu alughi no R.H. Disa ghoki ahu-u apeu kudau no veche susu Xekiye phu apeu anato lakhi lo iqho no tile no Point-6 sasu kusho lu ani. Anato hipau qhive no itaghi alughi ye ahu-u kudau no anato pape susu R. Tsuhaureu lo iqho nani, tithiu itaghi alughi ye akiqhe lau meter 800 qhalo no ahu-u kudau iqho nani, tile R. Tsuhareu qhive no alughi ye ahu-u kudau Shikuto phu lo ilo akeu yeghikulu laghi lo iqhoghi nani. Yeghikulu laghi hipau pape susu meter 700 qhalo no iphi Zutovi phu to mphi lo aghoki aghulo akeu lono aqhou iqi ve no kipelau kudau R. Nkwareu (Langlung) sasu kusho lu no tile no Point-7 shiani. Tile no apeu no ahu-u R. Nkwareu tomo ke kutolo vekukhu 1 qhalo iqho no tile aghoki aghulo lakhi sasu kusholu nani. Hile no alughi ye itaghi ahu-u iqho no aghoki pape susu Mhainamtsi ngo Kiyevi B phu kuma dolo PWD Approach Road akeu kutolo iqho no yeghikulu laghi tipau sholu kelo alaghi lono meter 400 qhalo anato lakhi akeu lo iqho nani. Anato qhive no apeu aghoki akeu pape susu iqi no Balu Nallah lo qo-ilo akeu ghoki sasu kusholu nani. Tile no ahu-u kudau iqho kelo Vihoto phu toni ke zulo kipelau kudau vekukhu tuxa qhalo lono R. Disagaphu (Hechiangru) ghoki sasu kusholu no tino Point-8 shiani. Point-8 lono alughi ye aghoki ahu-u iqho ve no R. Disagaphu ghoki chekutha veche susu anato lo ikughi nani. Tiye Point- lono vekukhu 3 qhalo ani. Anato hipau lono aghoki lakhi aghulo katha susu meter 800 qhalo iphi no Point-9 lono R. Khova (Tahai) sasu kusho lu ani. Alughi hipau mula pe pua keu ye ayezah kipe eno yehpekimije mi qqo no peitha ni keu ghenguno mula pe puani ke thono ayeghi shou ampeu momu aphu qqo dolo azu-u no ampeu shisu ighi ve keu peive akeu kumo. Hipau kikime lo Home Department ye ishi Amthaqhi 30, 2013 tsala lono yekipithi hipau tsu akeu lono atsala 30 dolo no Chief Secretary ngo Home Commissioner Nagaland kuma dolo khiu-khiu lau mu pulomo keu momu akumcho shi kepu aghi aye tsutsu peni keu pithi ani.
Posted on: Fri, 20 Sep 2013 23:00:23 +0000