Hong Kong siangngakchia hruaitu kum 17 pate Joshua Wong ===================================== (By Van Cin Mang) Oct 13, 1996 kum ah a chuak i atu ah kum 17 lawng a si rihmi Joshua Wong cu vawleicung mikip nih theihmi a hung si colh. A ruang cu ngakchiate a si nain Tuluk cozah cung ah duhlonak a langhtermi Hong Kong sianghleikai pawl le Hong Kong mipi a hruai hna ruang ah ramkip thawngzamhtu hna nih an fuhpanh i a kong an ttial cio caah a si. A min tak ah Joshua Wong Chi-fung timi pate hi Hong Kong mino pawl cawlcanghnak ah zeimawzat a rak tthanghphawh hna. Kum 13 lawng a si lio 2010 kum ahkhan rang tuk in tliktermi tlanglawng dohnak (anti-high speed rail) timi duhlonak langhternak ah a rak itel ve cang. Wong hi United Christian College (Kawloon East) ah a rak kai bal i atu cu Open University of Hong Kong siangngakchia a si. Cun May, 2011 ahkhan Scholarism timi siangngakchia cawlcanghnak phu cu a sianginn kaitti hawi Ivan Lam he an rak dirh. Cu phu hruainak in moral and national education dohaunak cu 2012 kum ah an rak tuah bal. Kan hnu August thla ahkhan Tuluk cozah nih Hong Kong cozah thimnak kong he pehtlai in an biakam an let (2017 kum Hong Kong thimnak ah Hong Kong hruaitu cu Hong Kong mipi duhmi nan ithim lai timi kha Tuluk cozah nih a duhmi pathum a taarmi chung in nan duhmi nan ithim lai tiah an thlen) tikah Wong nih cun siangngakchia pawl a hruai hna i duhlonak an langhter. Cu cawlcanghnak ahcun mipi tampi an hung itel ve tikah Hong Kong palik nih Wong tel in duhlonak a langhtermi minung 78 cu Sept 27, 2014 ah an tlaih hna. Siangngakchia le mipi nih cozah zungpi le headquarter an kulh peng caah a dang a hawile cu amah hlan ni hnih ah an thlah dih hna nain Wong belte zarhpi ni ceo ah an thlah. Palik nih an thlah hnu ah Hong Kong cozah nih cawn nikhat ni ah lam thianh viar ding in a donghnak ni an tukpiak hna. Tikah Kei cu ka hnabei a sei ngai rih ko. Kan cawlcanghnak hi ithlennawnnak (revolution) caah si loin thimnak kongkau ah iremh/hrimh tthannak (reform) ca tu a si tiah Wong nih cun a chim. Tutan Hong Kong cawlcanghnak hruaitu ah nai ruat maw? tiah ABC nih an hal i Hruaitu taktak ahcun kai ruat lo. Duhlonak an langhter chung vialte cu thong chung ah pei ka um ko cu. Hong Kong mipi tthanghphawhnak caah tampi kai zuam rih a hau tiah a leh hna. - abcnews.go/International/hong-kong-student-leader-optimistic-government-deadline-clear/story?id=25978457 - Wikipedia - youtu.be/atG9-sAaVZ4
Posted on: Mon, 06 Oct 2014 05:13:27 +0000
Trending Topics
Recently Viewed Topics
© 2015