Hosanna (On Second Thought, & On Missiological Approach) Naupang chikte kan ni lai khan ‘Palm Sunday’ kan hmang ve a. Kan kohran chu khawtea kohran te a ni leiin mi khawm kan tam nawh. Thei le thei lovin, naupang sande sikul hotuhaiin khek ruol an mi zirtir a.: ‘Hosanna, Lalpa hminga hung chu a eng a’n thawl ie, Ram hung tlung ding David ram chu a eng a’n thawl ie; Achunghnungtaka khin Hosanna’ ti’n kan khek ruol ve thap thap el a; inhawi kan ti ve khawp el. Marka bung 11 thu ni awmtak a nih. A sawt tah, naupang sikul kai ruol khawm kan la ni meu nawh a, ka hriet dan khi chu indik kher naw nih. An mi lo inchuktir dan a ni lei a ni dim, ‘Hosanna’ ti hi chawimawina tawngkam angah ka ngai a; ‘Halleluiah’ ti leh thuhmun ang deuvin ka lo ngai hlak a. Ka ngaidan khi a lo indik tawk naw deu am? Hre inthuk lo, var tak ni bawk lo ta ding chun naupang laia ei ngaidan hei inphet el hlak a awl nawh …. Chu khelah, ka ngaidan anga ngai pawl chu an lo um ve pei bawk a. Chuleiin inthiemnaw bik el thei chu ka ni bik nawh. Hlaphuoktu meu khawmin- ‘Hosanna’ ti zelin aw, Halleluiah, Amen, Lal Krista a lo piang e, Bethlehem-ah chuan; a ti ve tho a nih.Chu cho chu a la ni nawh, Saphlaa khawm ‘Hosanna, hosanna’ To the Lamb that was slain; an lo ti ve. A Saptawng khin chu a zie zie khawm a la um; Lusei tawngin an inlet a- ‘Hosanna, hosanna’ Beram No thah chu; an hei ti lem lem hi chu ‘a harsa’ tawp a nih. Hrilfietuhai chun ‘hosanna’ ti chu ‘tuhin sandam rawh’ tina a nih an tih a. Hi thua hin theologian-hai an insel hriet a ni nawh a, a hrilfienaa hin an inlungruol tawk a ni ring a um. Lalpa Isu chu a inchuktirhai leh Jerusalem khawpui a lut ding a na, a lut vawikhatna ding chu ni naw tawp a tih. Amiruokchu tu tuma a lut ding hi a danglam ding a na; mipuiin amaah beiseina insang tak an nei a, Israel lal dinga siem an nuom hiel ding a nih ti dam, mipui inhawrkhawmin an lo chawimawi dinga nih ti dam a hrietlawk a. Mosie huna le zawlneihai huna Pathienin thilmak a thawhai ang kha a thaw ve leiin Pathien mi ruot a ni khawm an ring deu heu huou ni mei a tih. Iengleia Isarel mipui chun lal an dit em em el am a na? Kum tam tak a ni tah a, David lalram- Israel chu ram pahni- Juda le Israel hung niin, lal hran neiin an khawsa a. Ram dang dangin an run hlak a. Israel lalram tak lem kha chu a um ta nawh a, Juda chu an la um; sienkhawm mania ro inrel ta lovin khawvel sorkar hrat Rom chun a awp a nih. Chutaka inthawka intalsuok ding chun an hratna le theina’n a tlin nawh a, thilmak a hung tlung amanih, thuoitu hrat danglam tak an nei amanih a ngai. Lalpa Isu chu an beiseina thar a na, Rom hne a, Israel lalram indin dingin an beisei a nih. Chuongchun, mipui an pungkhawm ta rak el a. Lal anga lo cheibawlin ‘Hosanna’ chawimawina le chun an lo hmuok tah a nih. Mi lien le mi lal ei biek chun, beisei ei nei a nih. Ei biek-tha a, ei tlawn lungawi tum a. Chutaka inthawk chun ei thil beisei chu hmu ei tum hlak a. Chu char chu a nih, mi beidawng ruol Israel mipui khawma an beisei chu. Isu chu lal anga cheibawl a, a thilthawtheina hmanga Israel sorkar inngir an tum a. Chulei tak chun ‘halleluiah’ tia chawimawi lovin ‘hosanna’ ‘tuhin sandam rawh’ (tuhin mi sansuok rawh) tiin, chawimawi malamin oral memorandum an lo submit tah a nih. Hosanna umzie chu ‘tuhin sandam rawh’ tina a nih ti ei hriet kha. Ngenna, petition, application, memorandum a nih. Hlaphuoktuhai hin ieng ngaituona neiin am hla an phuok aw ti ka ngaituo hlak. An thumal hmang ding ngaituo chet chet lovin, hrechieng hmasa lovin hla hi an phuok thlak ve mei mei hlak khawm a hawi ka ti chang a um. Ei hriet seng angin, Pastor Thangngur kha thil chik mi, mi fimkhur, Pathien thuawi tha a na; tawng thua khawm a fimkhur a, a uluk em em ti chu a hlahaiah ei hmu thei. A thi khan Hmar thu le hla kungpui a tliek nia ngaiin, ‘Hmar Bungpui a tliek’ an ti hiel a ni kha. Ama khawma ‘hosanna’ hi hla-thuah a zep ve zau a. Hosanna rawl a danglam tah, ‘Hemde rawh’ tina-in, Sukelna puon sen leh … a lo tih a. Jerusalem mipuiin beiseina leh ‘hosanna’ tia an hmuok-pa ngei ngei ‘kraws-ah hemde rawh’ tia an khekkhum nawk el thu a tarlang a. ‘An beiseina um sun chu kraws-a hemde dingin an ngen nawk thu a hril a nih. Mani beiseina ngei vawhlum tumtu chu mani inthat tum ang char ni mei a tih. Hitaka a hmang dan hi chu chawimawina nek hmanin beiseina ni lem sien a hawi a. Pastor Thangngur ngei ngei, ringzo a um ma ma ie. Lusei tawnga- ‘Hosanna, hosanna’, Beram No thah chu’ an ti hi ka ngaituo po leh ka nui a’n za lem deu hlak. Lusei tawng vekin ziek suok inla chu, ‘Tunah chhandam rawh, Tunah chhandam rawh, Beram No thah chu’ tia ziek ding ni awmtak a nih. ‘Beram No thah ‘tur’ … bek chu ni sien, an la that hman naw chun ‘tunah chhandam rawh’ ti chun umzie a nei a. ‘Beram No thah chu’ chu iengtin am tuhin sandam thei ei ta? A’n hnu ta deu a nih. Annawleh ‘Beram No thah chu’ chawimawiin ‘hosanna’ tiin ei khek ding am a nih? Chu chu chawimawina ni thei a tim? Annawleh Beramte that ta hnung kuomah, ‘tuhin sandam rawh, tuhin sandam rawh’ tia khekin bohmanghai sandam dingin ei tir ding am a nih? Bohmanghai kuomah sandamna chanchintha intlun a, sandamna huong sunga hung thuoilut chu Ama mawphurna ni lovin eini mawphrna lem annaw’m a nih? Palm Sunday zat tum-kau leh ei khek-ruol hin umzie a hau naw el thei. Jerusalem-a Isu an chawimawi dan kha ei ‘enact’ amanih, ei ‘dramatize’ a ni chun a tha. Naupanghaiin an hrietthiem el thei. Amiruokchu theitawp insuo a Palm Sunday ei hmang a, ei khek inring lei le naupangin inhawi ei ti leia thaw tha ta vieua ei inngai el chun baksam ei nei ni ngei a tih. ‘Tuhin sandam rawh’ tia khek chu eini mawphurna a ni ta nawh a, ‘tu hi hun lawmum, sandamna ni a ni leia bohmanghai sandam dinga theitawp insuo hi ei mawphurna lem a ni sih a.
Posted on: Tue, 08 Apr 2014 10:50:52 +0000