India Ram Ah Tuahmi Zofest 2014 Ah FACF Nih Nunphung Laam Hmuhsaknak Le Biatawi Chimnak An Ngeih TCP-Vol.2, No.82 | 2014 December 15 | ===================================================== Mizo Zirlai Pawl (MZP) hruainak in avoi 6nk Zo Hrinthlak dihlak Nunphung (Zo Festival) Puai cu India ram, Assam State Haflong khua Muolhoi sang ah December 4 - 5 tiang an tuah i a nikhatnak ah Fidi Art & Culture Forum (FACF) nih Sunpar Laam in nunphung laam hmuhsaknak le a ni hnihnak ah “Pasawmrel Laam” hmuhsaknak le biatawi chimnak an ngei tiah thawng kan theih. Zofest puai ah Mizoram Chief Minister Pu Lalthanhawla nih forhfialnak le biachimnak a ngeih. Hi puai ah Chin ramkulh, Bangladesh, Manipur, Tripura, Nagaland, Mizoram in siangngakchia phukip le laam phu kip an I tel kho. A hlei in Biate, Hmar, Kuki, Singpho (Kachin), Bawm miphun tibantuk kan unau dangdang zong tampi an I tel kho. Caan karlakah Mizo hlasak thiam in Grace Lalchhanhimi, H.Vanlalhlana, Sangkimi Khiangte nih zaihla dawh saknak an ngeih. Miphun (15) in fashion hmuhsaknak a um i Chin ramkulh, FACF in Salai Van Tha Bik le Mai Naomi Biak Men Sung an i tel. Miphun thilthuam khuah (phun) 15 hmuhsaknak an ngei. Mizo CM zong nih Kawlram in Chin miphun kan i tel khawhmi cung ah aa lawmhnak le Britist cozah nih ramthum ah a kan qhenmi hi a rauh hlan ah ramkhat kan si lai tiah aa ruahchannak kong a chim tiah FACF Coordinator Salai Holy Tawk Tling Thang nih The Chinland Post ah a chim. A nikhatnak a laammi phu vialte lakah FACF laam hmuhsakmi thapetu kan tam bik. Cun kanmah hlan a laammi nakin kan tlam a tling deuh. Voidang kan laammi nak zong in kan i ruang deuh i kan i lunghmuih ngaite. December 5 ah Pasawmrel laam hmuhsaknak zong thazaang an kan pek tuk i kan i lunghmuih ngai tiah FACF Laam komiti lutlai Mai Naomi Biak Tha Mawi nih The Chinland Post ah a chim. A donghnak zan ah FACF Coordinator Salai Tawk Tling Thang nih Chin ramkulh aiawh in biatawi chimnak a ngeih. Zo Hrinthlak nunphung puai zawhding in khual cazin a phanmi 900 an si. Inntek khuami he 1400 hrawng an si. Khual lian ah Mizoram Chief Minister Pu Lalthanhawla aa tel. Kan unau Kachin, Mara zong an i tel kho i Lawngtlai Lai Sianghleirun Siangngakchia Bu (Lai Students Association, Lawngtlai) zong Serlaam hmuhsaknak an ngeih. Zofest tuah lo dingin Hmar People Convention Development (HPCD) nih an khenkham hna caah December 3 ah puai an thawk kho lo. An rak timhtuah ciami Mandat zong an rak thehpiak dih hna. December 3 cu khual paohpaoh Haflong khua, Vengpui sang ah an chiah dih hna. MZP nih hriamtlai bu HPCD an nawlpat than hna i December 3 zanlei sang lawng ah tuah thanding in nawl an onh hna tiah kan theih. December 3 chun ah ramkip le bukip in a rak tlungmi palai le MZP palai lakhruak tonpumhnak an ngei. Cu tonpumhnak ah an ceihmaimi cu puai tuahnak a hmun thial in Haflong thiamthiam ah puai a tlamtlinnak men in maw kan tuah lai, asiloah Mizoram Aizawl ah dah kan tuah lai ti hi a si. Puai tuahnak nawl an onh than hna caah puai a tlamtlinnak ding ah December 4-5, Muolhoi sang ah tuah than ding in bia an chah. Hi Zo hrintlak nunphung puai hi 2002 kum ah Manipur state in an rak thawk i atu kum hi avoi 6nk an tuah a si. Chin ramkulh in FACF hi avoi khatnak bik Kawlram (Chin) aiawh in an i tel a si. Cun avoi khatnak bik khual an tlawn zong a si chih fawn. FACF cawlcanghnak hi tutan hi avoi hnihnak karhlannnak an ngeih a si. Avoi khatnak cu Grace F.K Company sponsor peknak in 2014, Hakha Chin Kumthar (Tho) puai ah entertainment programme in caanhmannak an rak ngei tiah kan theih. Zofest 2014 puai ah Chin ramkulh aiawh in a kal khomi cu, Khonumthung thawngzamh bu in Recharge Lalnuntluanga (Moe Kyaw) he FACF phu in minung 19 an si. Haflong hi Hakha nakin khua ngan deuh minung 40,000 khuasaknak khua a si. FACF Laam chungtel hna cu Assam ramkulh in an rak tlun hnu ah CNF Camp ah zankhat laam hmuhsaknak an ngeihpiak hna i Hakha ah December 10, zanlei sml 5: 30 ah damte in an phan kho than cang tiah kan theih. Hmanthlatu: Khonumthung/Moe Kyaw Photo- 1: FACF Laam hmuhsaknak ngeih lio Photo -2: FACF phu Photo:-3 FACF phu le MZP hruaitu (OC)
Posted on: Mon, 15 Dec 2014 07:15:30 +0000