KA PU, MANGTHA AW ( Ka pu( ka pa pa) tana ka thuziah hmasak leh hnuhnun ber) A tuk lawkah Lab internal exam ka neih dawn avangin ka thiante games khel lai pawh khelhpui hman lovin kei chuan Mizo te thupui “ A tawpah tih trawk a awm” tiin ka lehkhabu chu ka chhiar nauh nauh a. Nidanga bialnu em em pawh nilo, tihtur awm loh vang leh lehkha zir peih loh vanga ka sms in hmun tin hmun tanga a hrut kual thin chu tawp hmakin ka lehkhabu chu ka bih ve ngar ngar a. Nidangah chuan sms hi dawng hmasa lovin ka thawn chhuak hmasa ngei ngei a, mahse zanin chu ka dawng hmasa ve tlat! Mahse chu ka sms dawn hmasak ber chuan ka rilru chhungril chu fan nghal rawih rawihin ka lehkhabu chhah pui mai chu ka mittui luanna ruam ah min chantir ta si ale! Ka sms ka hawng, “ Ka pu a boral, tunah khan” tia inziak ka han hmuh thut chuan enge ka tih dawn tih hre lovin rei fe chu en ngai en char charin ka awm a. Ka hamhaih tawh em avang khan “ Eng vanga boral nge” tih zawhna chang pawh hre lovin ka phone chu ka bih ngawih ngawih a. Hmun dang daiha lehkha zira awm ka nih avang leh khatiang kan chhungkaw zinga chhiatna lampang thu ka dawn vawikhatna anih avang khan ka buai ani ber mai! Hemi avang pawh hi ani ngei ang le, ka u, Rickya chuan a hnu rei vak lovah chuan min lo call nghal a. Min khawngaih em avang leh ka rilru a hah ang tih a hlauh avanga, a trap insum trawng te khan ka lung hi ava tichhe em! A theihtawpin “ Lungai mah ta che, mihring te chu hetiang hun tawng tur vek kan nia lawm. Vanram atangin min lo vengin min lo thlir reng anga, keini pawhin kan la hmu ve leh thuai dawn alawm, I rilru kha tihah lovin I exam tur chiah ngaituah ang che” tia min hnem hnu phei kha chuan ka rilru ah KA PU kha a lian telh telh tawh mai si a. Lehkha pawh zir chhunzawm thei lovin ka pu nena kan hun hman dun lai ka ngaituah chho tan ta a Ka pu hi mi tawngtam lo leh a mize hrelo tan chuan pa nel awm lo tak mai hi ani a. Thing mistiri nichunga Primary School Head Master anih theih te kha keini a tu te inchhuanna tham ani asin. Mi taima leh a tih tawha chuan mi ti kher kher anih avang hian keini a tute chuan a bulah hian hna hi phur taka thawk thei kan awm mang meuh lova. Kei hi a thawk thei awm chhun chu ka ni deuh ber mai, a chhan chu engang pawn min hau nasa mahse eng atan mah ka ngaih thin loh avang hian ani pawhin min tih dan vak hi a thiam lova. Min tir se tha deuhin a phur ber niawm hian ka kal fua fua a, zawmthaw deuha a bula hna kan thawh palh hlauh chuan ka hming pum hi theingilh ava han har thin tak em! Vawikhat pawh ka pu nen chuan hna kan thawk dun leh a. Kan inhnuai a mau sei ber la turin min tir a, keichuan “aw” tih leh kal ka rual nghal a. Mau sei ber la rawh ti na na chu a sei ber mai, kalkawng kal dan pawh tidanglam thei khawpa sei chu kan inhnuai atang chuan thei leh thei lovin ka keng chhuak ta! A nih lahin ring leng lawngin “ Zuk dah nghal rawh, a chhiat em kha, I mit a del ami? Tha deuh ron la rawh ka tih kha” tia ka hming pum lam paha min han hau chiah mai chu(h)! Hemi ka chhanna avang hian lawm ka pa leh ka unaute pawn HUAI tia min koh na chhan ni. Ti hian, ka pu, a thlahte pawna hauh let ngama an en loh chu ka chhang ta alawm le, “ A sei ber la rawh I tia, hah leh buaithlak em em in a sei ber ka rawn la a, tinge kha tia min vin leh vak si. Inhnuaiah khan a tha ber la rawh I ti lo, a sei ber la turin nih kha min tirh, I duh leh zuk la mai rawh” tia ring tak maia kan chhang chu(h), min hauh a hnekin min nuih vur vur a, chutah ka pa leh ka unaute ka en, an lo khi sung hlawm a. Ka pu chuan inthiam lo leh inthlahrung deuhin, “ Ka tihpalh anih kha, a tha ber khu zuk la leh mai rawh, kha kha chu tikhan dah la” tia min chhan hnu chuan, pu te nge nge kan lo zah thin mange, thinrim treu hnu pawn kan la leh lawp lawp zawng ani e Khitiang kan hun hman tawh zawng zawng ka ngaituah let hnu hian ka pu khan thil tamtak min lo zirtir ani tih ka hre chhuak a. Hnathawna reng rengah zawmthaw taka thawk lo turin leh kan tih tawh chu tha deuha hlen chhuah ngei ngei duhna rilru keini a tute lakah min lo tuh reng tawh a. He a thil zirtir ka hriat chhuah hnu phei chuan ka va ngai lehzual tak em. A dam laite khan lo hrethiamin lo hlan let mawlh mawlh thei ila ooo. A tuk maiah an vui liamin he lei ft 6 hnuai lamah, a ruh leh taksa te chu ran chi hrang hrangte ei turin an thlah tawh dawn si ale. Kei lah chu a hmel hmu thei lovin, zoram pawnah amah ngai em em in ka awm reng ani si ale, ava hreawm tak em! Chutia kan inngaihtuah lunghnur lai chuan ka rilru ah hian, “Ka pu tan engmah tih theih ka nei tawh lo. Amah ka chhuanzia leh hmangaihzia tih lang thei turin a kuang zawnin a thlan chhungah pangpar ka vawm ve thei si lo. Chuvang chuan naktuk an thlahna program a an chhiar theih turin thlahna thu kan ziak ange” tiin ka rilru chu ka siam fel ta a A tu leh fa tana a thil tha tih zawng zawng ziak dawn ta ila, naktuk an vuina program hunin a daih dawn si lo. Chuvang chuan ka pu tana ka tih theih tawpna ber tur tiin ka pu ka duh leh hmangaih em em chu tihian lehkha ka thawn ta a “ Ka PU duhtak, I damlaia kan tana I tawrh na zawng zawng kha he kan damlai ngei hian rul dawn pawh ni ila, kan rul seng lovang. Keini I tu leh fate thil min zirtir tumin, kan hnathawhna leh kan thil tih na reng reng ah min hauin min vin thin a, keini chuan chu I thil min zirtir tum chu hrelovin I hnung lamah selna leh huatna tawngkam kan chhuah thin, hemi avang pawh hian KA PU min ngaidam ang che aw, kan lo mawl em vang ani. I damlai ngei kan hmangaihna leh duatna kawng tin renga I hnena kan hlan let leh hman loh che avang pawn KA PU khawngaih takin min ngaidam dawn nia. Tunah chuan kan mit te varin I dam laia kan hnena hriat tir I tum chu I boral hnu ah kan hmu fiah thiam chauh si a. Mahse KA PU, heng thil tha zawng zawng, nangmah ngei pawh tawrh huama I tu leh fate min hmangaih zia lantir nana min zirtir avang hian I hnenah Lawmthu ka sawi mawlh mawlh e. He khawvela hian piangin hun a bul atangin hmang tha leh dawn pawh ni ila, nang lo chu KA PU tia koh duh chuang ka nei lo. Tunah, he lei khawvelah inthen mahila, inthen tawh lo na ram, Van Kanan atang khan min lo thlirin I tu leh fate hi kawng tinrengah min lo vengin min lo hual him reng ang che. Ka Pu, kan hmangaihzia leh keini I tu leh fate’n kan rilru chhungril ber I chang dawn ani tih entir nan he hla thu hmang hian ui tak chungin kan han thlah ang che. Ka Pu, Mangtha aw Vanram ngaihtuah hian min tilawm a Kan thlen khawmna tur khi Rangkachak kawtthler chu fang rualin Kan lawm hla kan rem ang Inthen a awm lo’ng Kan inthen tawh lo’ng Vanram nuamah khian Inthen a awm tawh lo’ng ”
Posted on: Fri, 19 Jul 2013 17:05:19 +0000
Trending Topics
Recently Viewed Topics
© 2015