KANCHANDPUR POLICE STATION GARAGE ******************************* Dosda Pastor Quarters kawtkaiah chuan vai tawngin kan riat ve nasa ta mai. Vaitawng chi thum inchawhchawrawi ka hmang a, sentence khatah pawh Hindi-Assamese-Bengali a inthil tlar kim deuh vek zel awm e. Ka chiang em em hranpa bik tawh lo. Dosda vela lu um thing met met kara thiam chhun ve sawlh sawlh English han chelek ngaihna lam a awm lo! Pastor a lo fel a, a tunu Malsawmi a fel hle bawk a. Zanriah min kiltir a; pawnah Tripura Police-ten min nghak ran hlawm a. Flat-tire pawh Petromax chhi ri sur surin, kan siamtha ta sauh sauh va. Thliin a rawn chhem alh phurh chang lah a awm. Tichuan, Kanchandpur lam panin kan tlan kir leh ta a. Truck-in min rawn zui bawk a. Phai pheiah kan vung hle a, kan hmanhmawh luatah a wheel-nut kan lo kilh nghet em em hman lo kha, kan chesual teuh hle. Police Thanna-ah chuan, an garage-ah ngei kan park lut a. Kan kutah min hlan phal zui ta si lo. Tichuan, azan azanah, Mizoram lam panin kan kir leh ta a. Kal lama kan kawng zawha kir leh ngam rual ni tawh hek lo —Naogoan lam hrut pheiin, Badarpur lamah ... muang marin kan tlan a. Ruah lah a tam. Mandatory Signs bak kawng min kawhhmuhtu dang an awm lo. An kawngpui lah a tha eltiang a, leirawhchan a intung zawng ngata remkhawm chungah tire a lir ri per per a ni ber e. Cachar District kan han lut chiah chu —rickshaw horn ri tup tup nen, scooter tawng tawh tak meikhu chhuah ung hlat hlata tlan tawn sek nen ... Panchgram Paper Mill kan pel phei zel a, Arunachal kan thleng chiah chu Traffic Police-ten min lo ham ding ta ... kan truck ken lah kha public carrier a ni tih a registration plate atangin a hriat em em mai si! Fin kherek chu kan chhuah ngial na khan; chirhdiak kan tah berh vel kha ruahsurin a lo tleng fai titih deuh kher bawk lahtak a! Kan va han inman chiang tak em! Kan harsatna kan han sawi ngial pawhin, Durga Puja a hnai tlat tawh si! Document leh Driver License chu an kekawr khaki mawng ipte-ah an bilh lut hmak ta mai a. Silchar khaw chhunga Police Station (Rangirkhari)-a sawi fel tura tih kan ni ta. Pawisa lah kan haihchham titih tawh bawk si, Vai thluak nge Mizo thluak a ni tawh mai! Kan han che sawn leh chiah chu, kan zawi hnawk hian a hriat. *********** Rangirkhari Police Station kawtkaiah chuan truck chu kan han park ta ngei a. Zan thim min han nghah thlentir lui ngei a. Thanna chhungah chuan an thil tar velte chu ning hman hluiin kan thlir kual kan thlir kual a ni ber. Tihfel tuma va pan lahin min um e duh der lo mai a. An bang nghengin kawisawi deuhvin ka ding kha, an ASI khan min vin zui leh a, pawna chhuak turin mi han hrawk zui tuar a. Ngeng takin, dawp rawngkai lo thei lo siin hreh zetin ka chhuak zal zal a. Ka chhuak fel ta tihin, vin tawkin min han ko lut leh a. Ka va tlawm chiang em! Tlawmna Nun ka pass chhuak hman thuak a ni. Nia, a va han tlawm theih ngai ve le, tiin ka tuihnih leh duh tlat ... mahse, ngaihtuahna chi khat ka hmang ta. Mizoram House a hla lo bawk a, a kiang lawka MIZO HOTEL neitu nula kha, 1979-a Silchar buai hun laia Aizawl-a rawn insaseng, zirtirtu hna ka hnarah ka lo khung hlauh tawh a. Chu nula hming chu ka hre reng si se tawh lo nain, kan thian Gorkha Rana kha a rukin ka tir ta a. Hriat samkhai ka nih theihna turin, Hmana Aizawl-a zirtirtu-a thuntu che khan a mamawh che, tiin va sawi la —a rawn kal mai ang, rawn inzui ula, ka ti a. Pawn thim, ruah tla suap suap karah chuan a relh ru a, an va insawm hlawhtling a. A lawmawm duh khawp mai. MIZO HOTEL neitu nula leh Police Thanna-a OC leh a hnuaia pulit-lubawkte chu thiam takin an han inkawm ta a. Chutih lai denchhen chuan, Documents chu Aizawl lamah, man chawi tam vak lovin kan siamtir thei, Driver License pawh chuti bawk ... Rana, truck saw va tinung la, ruah a sur bawk a. An inbiak tui lai chuh khuan ... ka rawt put ru zauh ang. Hlira pawh hi hrilh la, phei vat ru ka ti a. Thanna dawhkana an inkawm hlim dar dar lai chuan, kan relh bo ta diak a. Kan relh bo dawn tih pawh kan thiannu chu kan hrilh chuang lo. Documents leh Driver License kha chu kan ui phal lo khawp mai! Khami kuma keini khanglang atanga thil an phut ruk, TEKA TEKA ... an Puja tum dan kha chu a flop ve chiang khawp ang! Ruahpui-vanawn hnuaiah, kawlphe inkap de tawn zuai zuai karah—Lailapur kan va han thleng rang tak em! Kan front-wheel nut a dul tih kan hre leh a, kan han herh tight ang pengpawng a ... tlangram kawng kawia kan tuai kual chho chiah mai chu—a thawventhlak chiang khawp mai. Ram thianghlim par rimtui kan hip chho ta a ni deuh ber. Vairengte kan han lut chiah mai chu —RAM TIAM a ni hliah hliah ... zanriah kil meuh chuan kan hai chim hem hem hle bawk. Mahse, kal lai kan ni, i chawl lo vang ... Aizawl thlen te te hnua Kanchandpur-a kan thil kha lak a la ngai miau si! ................. Thil awlsam tak chu a ni hauh lo mai! Tripura Police chauh kan hmachhawn tawh dawn lo!
Posted on: Wed, 21 Jan 2015 14:13:04 +0000
Trending Topics
© 2015