KARTA HABRÍ NA SANTANA Bo a dèk Boneiru ku un deken pretu di energia negativo. Ta ami a konfia bo ku e asiento di PHU. Ta p’esei bo ta den Raad awor. Pues ta ami tin ku sikiera purba kita e deken aki. Pero mi sa ku ta solamente bèrdat por kurá bo di e malesa ku ta afektá bo, esta e poder ku a subi na bo kabes. Kiko despues ku bo a logra kore ku Gezaghebber? Aprobashon di e proyekto di kas na Nikiboko ku Gezag tin wantá? Riba su mes e proyekto ei no ta malu. Kas barata pa pueblo ta bon. Pero b’a trapa riba hende pa push’é. Esei sí ta malu. Ta p’esei b’a enkontrá tantu kontratempu. Mi ta konsehá bo pa laga otro hende sigui ku e proyekto ei. Si BC ta aprobá esei awor, un investigashon lo ta inevitabel. Pa no hundi, mihó abo personalmente bandoná tur e proyektonan miyonario ei. Laga otronan sigui ku nan, òf hoga den nan. Bai bèk na ta Santana. E persona ku semper tabata kla pa sirbi hende. E persona ku hopi hende tabata apresiá pa su perseveransia i bon humor. Buska e parti bon den bo mes bèk. Si bo ta sigui trapa riba hende, bo kaida lo ta hopi duru. Si bo stòp awor, bo por skapa ainda. Tur kos ku nos a primintí durante kampaña ku nos lo NO a hasi, b’a hasi nan tur. Anto ku furia. Motibu prinsipal ku mi a yuda bo lanta un partido ta pasobra m’a mira den bo un don natural pa bòltu rabia di hende usando forsa di amor. Ora nos ta skucha bo na radio òf den Raad awor, ta furia so nos ta tende. Nada di amor. Unda el a bai? Anto b’a pèrdè bo kurashi tambe. Na facebook bo ta yama bo mes un ‘leon feros’. Pero un leon feros no ta pidi protekshon di polis. Boneiru ta profundamente dividí entre bèrdè i korá. Anto abo a hasi’é pió. Pero ta e dos partidonan aki huntu a hiba Boneiru den e skual ku e ta aden awor. En bes di bai pa union, bo a reforsá desunion. No por rekonsiliá hende ku brutalidat, mentira i inhustisia, Santana. PHU a skohe e kaminda di harmonia. ‘Pasenshi i konsenshi’, unda esei a keda Santana. Bo ta kòrda? Pero ainda tin salida. Tantu pa liberá bo mes, komo Boneiru. Skucha bon. PHU no kier su asiento bèk mas. B’a hòrt’é, bo por keda kuné awor. PHU lo buska su asientonan nobo trankilo i legítimo durante siguiente elekshon. Pero sintando riba e stul awor, ainda bo por hasi algu bon kuné. Na promé lugá, stòp di alabá bo mes i traha pa bo mes. Bo mes no ta e kousa. Segundo, retirá bo sosten for di UPB. UPB i Demokrat tin ku siña traha huntu ora ta trata kousanan ku ta toka henter Boneiru. Struktura estatal na promé lugá. Mester drech’é. Ademas, ta nan ta representá mayoria. Nan ta responsabel pa solushoná e bruashon aktual. Abo ku UPB ta forma un minoria. Esei no ta klòp. I bo por sa awor ku ta tantu bèrdè komo kòrá tin Boneiru stanká. Laga nan resolvé e situashon. Hasiendo esaki bo ta demostrá ku realmente bo ta independiente. Kisas pueblo lo por perdoná bo e ora ei. Anto, por último. Mihó bo rektifiká e akusashon apsurdo na Robby Beukenboom, Benito Dirksz, Rodger Gijsbertha i mi persona. Bo sa masha bon ku niun di nos nunka no a konspirá pa sekuestrá bo yu muhé! Ami lo lag’é na esun remarke aki. Pero otronan, ku nan rason, lo no akseptá e akusashon ei sin mas. Stòp di hunga e víktima inosente. Pidi diskulpa. Wak den spil, Santana. Ántes un hende humilde a wak bo bèk. Awor ta un ‘leon feros’? Bin bei! Boneiru, 26 di yüli 2013 Michiel Bijkerk
Posted on: Fri, 26 Jul 2013 18:44:19 +0000
Trending Topics
Recently Viewed Topics
© 2015