KHAW NGE I AWM? (Jeremia 17:4-7) Lalpa chuan heti hian a ti Mihring rinchhana, mihring ban chakna ringa, LALPA hawisanna thinlung neitu chu anchhedawngin awm rawh se, Thlalera hnim buk to rire ang an ni a,...................................... Lalpa ringtu, a rinchhan Lalpa ni erawh chu a eng a thawl e, Tui kianga thing phun, luikama zung kai, khaw lum lo thleng pawh hlau lo, a hnahte hring reng si, khaw khen kum pawisa lo, Rah chhuah thulh chuang si lo ang hi an ni ang. A TO A TO: Nang leh kei kan lo pian chhuah hian kan pian chhuah pui sual chhung khung a hun leh hmun a zira rawn to chhuak mai tur kan kawl sa thlap mai a, chu kan chhung a sual chi awm tlat mai chu, mihring dana thil chhia kan tih ang hlir hi a ni ngawt lo a, thil tha tangkai, fel leh nalh tak tak te pawh a ni ve tho, chumi hmang chuan mi tam takin fak an lo hlawh tawh a, chumi hmang chuan mi tam takin ropuina an hlawh chhuak tawh reng a ni, he khawvelah hian zawng a va hman tlak tehlul em. Chu mi hmang chuan sakhaw mi tak a nih theih a, kohhran upa leh rawngbawltu kawr pawh a hak theih vek, Pastor, thalai hruaitu engkim mai hi chumi hmang chuan an hlawh chhuak thei tho mai, mahse chu chuan chawlhna tak tak a thlen ngai lo, chutiang mi chuan a thil tiha Pathian tih lawm a tum a, a tih that loh chuan a ngaih a tha lo va, a lan danah chuan mite aia tha leh fel ni mahsela thlamuanna tak tak a nei ngai lo. Chutiang mi chu Khawngaihna thu kan tih tello a chhandamna thu han sawite hian thil tih an rawn lek chhuak vat thin, eng dang vang a ni lo, an rinchhan kha mi hring chakna ah a in nghat tlat a, an mahnia chi awm sa lo to chhuak kha an in tun nun nan an hman tlat avangin an chet ve loh chuan an ngaih a tha zo tlat thin lo. thlaler a hnim buk to rire ang maiin anmahniin tui hna an in zawn chawp a ngai a, an chaw lakna ber chu an thil tih that leh that lohah a innghah tlat avangin an tih peih loh ni a lo thlenin an chau a, an ro leh mai thin, chawlhna a lut lovin chawlhna an zawng chawp thin a ni. A PHUNA PHUN: Thinlung thar ka pe ang che u a, in tisa a ta thinlung, lung anga sak chu ka la bo ang a, thin lung tisa anga nem ka pe zawk ang che u Lalpa;n a ti a ni, a awm sa hi Lalpan a duh lo va, a thar min pek a tiam a ni, chu ngei chu Kristaah pek kan ni ta a, kan thawh chhuah ni lovin amah Lalpa zawkin Kristaah min phun ta zawk a ni, chu chanvo changtu/Amen tu chuan an pianpui thatna ber pawh silhfen bawlhhlawh ang lek Lalpa mit hmuhah chuan a ni tih an hria a, an thil tih a Pathian tlawn lungawi an tum ngai lo, Kristaa Lalpa lungawina chu an lungawina a ni a, an thil tih aiin an tan Lalpa thil tih chu an dah chung nung zawk a, an in pekna aiin an tana Lalpa in pekna chu a hlut zia an hria a, an inhlanna aiin an tana Lalpa in hlanna chu an chawisang thin. Kristaah Phun an nih tlat avangin an zung kaihna chu chung lamah a ni a, an chaw lakna pawh an thil tihah ni lovin Kristaah vek a ni a, Harsat manganna an tawh chang pawhin leh an nun a khaw kheng a lo thlen chang pawhin an innghahna chu Krista a nih tlat avangin an nghing ve ngai lo va, an nunah sual rawn inlar ve thin mahse an awm na Krista eng atangin chiang takin an hmu fiah a, an hneh leh mai thin, Thing kung luikama zung kai ang maiin rah chhuah an thulh lo va,an chaw awmnaah phun an nih tlat avangin, an thil tha tihte hmangin than len an tum lo va, Phun an nihna chu an than lenna leh thil tha tihna a ni zawk a, chakna ni lovin, thil tihtheihna ni hek lovin, Lalpa thlarau zawk chu an hriam hreiah an hmang tawh zawk thin.
Posted on: Sat, 02 Aug 2014 10:38:59 +0000
Trending Topics
Recently Viewed Topics
© 2015