KOMUNIKADO DI PRENSA 8 di Yüli 2013 SOSTEN MASAL NA GEZAGHEBBER DR. LYDIA EMERENCIA Movementu Awor T’e Ora a tuma nota di un avalancha di atake, insulto i menospresio públikamente hasi den direkshon di gezaghebber di Boneiru, señora Dr.Lydia Emerencia. Movementu Awor T’e Ora ta konsiente ku gezaghebber tin un funshon sumamente importante i delikado den nos komunidat komo promé mandatario i mama di nos pueblo. Tin diferente faktor ku a kondusí na e guera ku tin kontra di Gezaghebber kende ta trata na tur manera posibel di práktika bon gobernashon transparente. E diferente faktornan ta lo siguiente: - Gezaghebber ta para pa integridat, bon gobernashon i transparensia; - Gezaghebber konforme konsehonan ku e la risibí, a pone un paro tras di konstrukshon di e kasnan modelo na Kaya Son Montuno; - Gezaghebber no a duda pa aktua na momento ku diputado Kroon a trata na manipulá ku informashon i/òf dokumentonan pa gezaghebber a firma un pèrmit pa taxi sin ku e konsehonan al respekto tabata kompletu; - Gezaghebber a anunsiá ku pronto lo bini un investigashon imparsial den WEB N.V.; E puntonan aki a kondusí na malkontentu formal serka e diputadonan den Kolegio Ehekutivo i lidernan di frakshon di UPB i di frakshon Santana. E diputadonan a orkestra un ambiente di deskonfiansa kontra di Gezaghebber di Boneiru pa asina por logra retirá e Gezaghebber for di den su funshon. Aparentemente gobièrnu ta deseá un Gezaghebber ku ta bai di akuerdo ku tur loke ta riba mesa pa asina por sigui ku e mesun tipo di maneho kual gobièrnu a tuma komo kustumber pa hasi i deshasí. Movementu Awor T’e Ora a tuma nota den medionan di komunikashon ku tin 2 opshon pa Gezaghebber skohe for di dje. E promé opshon ta ku Gezaghebber tin ku anunsiá su retiru promé ku e reunion di Konseho Insular Djamars dia 9 di Yüli 2013. E di dos opshon ta ku si Gezaghebber no skohe pa baha boluntariamente konforme e promé opshon, ku frakshon UPB huntu ku Frakshon di Rafael Santana lo pasa un moshon di deskonfiansa kontra di Gezaghebber pa asina por inisiá e proseso pa retirá NOS Gezaghebber. Pa e motibu aki Movementu Awor T’e Ora a disidí ku ta basta awor i ta pidi komunidat kompleto pa hasi akto di presensia Djamars dia 9 di Yüli 2013 masalmente for di 6or di atardi na sala di reunion di Konseho Insular pa asina tene un manifestashon pasífiko komo muestra di sosten i apoyo na NOS Gezaghebber. Si abo tambe komo siudadano ta para tras di integridat i ta kontra di mal gobernashon i korupshon, presentá masalmente pa asina NOS demonstrá ku e pueblo aki no ta akseptá mas abuso den su kontra ni kontra di NOS Gezaghebber. Movementu Awor T’e Ora ta sugerí tur esnan ku ta deseá pa presentá ku bòrchi òf spandoek, pa hasi esaki ku palabranan no ofensivo pa asina nos mantené e rèspèt komo siudadanonan sivilisá. Pa mas informashon por tuma kontakto libremente ku Movementu Awor T’e Ora na un di e numbernan ku ta menshoná mas abou. Pa mas informashon por tuma kontakto via e-mail aworteora@gmail / johan.giskus@gmail òf por yama na 540-8709 / 795-8709. Movementu ‘Awor T’e Ora’, ing. Johan (Jopey) Giskus Kordinadó
Posted on: Mon, 08 Jul 2013 20:36:03 +0000