KOMUNIKADO DI PRENSA Gobièrnu di Kòrsou tambe ta sigui e desaroyonan positivo di nos Beisbolista Coco Balentin Willemstad – Basa riba e maneho nobo di su gabinete, kual ta enserá duna tur atleta, digente i deporte en general e atenshon i balor necesario, nos Promé Minister, sr. Ivar Asjes, na nòmber di Gobièrnu di Kòrsou ke hasi un apelashon na nos komunidat pa sigui tur e desaroyonan positivo di nos atleta di Beisbòl Wladimir “Coco” Balentien na Hapón. Ku gran satisfakshon i orguyo Gobièrnu di Kòrsou a tuma nota i sigui tur e akontisimentunan ku ta tuma lugá rondo di e prestashon úniko di Coco Balentien. Relashoná ku esaki Gobièrnu di Kòrsou ke motivá i stimulá henter nos komunidat pa huntu nos: 1. Ban sigui e desaroyonan positivo aki di nos atleta di Beisbòl Coco Balentien di aserka; 2. Ban hisa nos Bandera di Kòrsou tur dia for di awe, na kas, skol i tur instansia, sperando pa Coco Balentin konektá e homerun di viktoria total, kaminda e lo vense e rekòrt di mas ku 55 homerun; 3. Ban unifiká i demostrá Patriotismo pa esaki por sirbi komo un stimulashon i motivashon energétiko pa Coco Balentin sa ku Kòrsou den su totalidat ta kuné. Logrando e éksito aki Coco Baletien lo bira un Heroe dor di pone su mes i tambe Kòrsou riba un plano Mundial, debí na e echo ku e lo vense e.o e gran Beisbolista Sadaharu Oh, kende na aña 1964 a konektá e kantidat rekord di 55 homerun konektá den un temporada di liga Haponés. E apelashon ku Promé Minister Asjes ta hasi ta den kuadro di e esfuersonan ku Gobièrnu di Kòrsou a bin ta hasi pa sigui edifiká nos Nashon. Laga nos tur ban partisipá i asina duna nos kompatriota Coco Balentien e atenshon, rekonosementu i honor ku e meresé.
Posted on: Wed, 04 Sep 2013 01:11:57 +0000
Trending Topics
Recently Viewed Topics
© 2015