KOMUNIKADO NOCHI WILLEN Kralendijk – E loke ta pasando ta inakseptabel, intolerabel i ku tur medio demokrátikamente ku nos estado di derecho ta pernmití mester par’é. Ta a bin ta mustra riba violashonnan di prinsipionan di bon gobernashon ku ta tacha integridat di gobernashon, gobernantenan i tambe sierto empleadonan públiko. Hasta un korant kual su kolumnista ta un ferviente miembro di UPB na vários okashon a denunsiá korupshon den gobernashon i den e aparato públiko. A hiba kehonan pa Ministerio Públiko ku e petishon pa investigá i alabes aktua den kuadronan legal penal. Na 2007 ku yudansa di diferente hende a skirbi e famoso ` Zwartboek`, kual a keda entregá na tur órgano di Reino, pero tambe na Ministerio Públiko. Ministerio Públiko a tene redada den kas di diferente polítiko aki na Boneiru den e kasonan ``Fidji i Zambezi`. Fundashon Bon Gobernashon mester a bai te serka Korte Komun di Hustisia pa logra ku ta perisguí polìtikonan sospechá den 8 kaso. Porfin Korte Komun ta sentensiá pa persekushon. Apesar di e loke ta deskribí aki, kasonan di malgobernashon, di violashon di prinsipionan di bon gobernashon ta kontinuá manera nada no a pasa i ta kulminá algun siman pasá den kulpabilidat di froude i falsifikashon di dokumento dor di un dipuitado, miembro di e aktual Bestuurscollege. I den tur esaki, apesar di tin tur konosemento dokumentá, e órganonan ku mester aktua, entre kual Konseho Insular, eks gezagèbernan, Representante di Reino, Gobierno di Reino, komishon pa asuntunan di Reino, tur a para man krusá i mira e kosnan aki tuma lugá bou di nan nanishi. Awe un gezaghéber a tuma e kurashi i e firmesa pa trese integridat den gobernashon i kuné restablesé e konfiansa di un pueblo den su gobernashon komo garantia pa su desaroyo i bienestar i atrobe e órganonan ta parse di ta para man krusá i ta para mira kon ta bai hiba e gezagèber matadero. Ironia di e situashon ta ku esnan ku ta fungiendo komo e `burdugunan` di e gezag ta dos diputado, kual uno ta sopechoso di aktonan penal, e otro ta kulpabel di aktonan penal, sostenè pa 5 miembro di Konseho Insular ku huntu no ta yega 500 voto, pues no ta gosa di ningun pero ningun legitimidat di sosten di voto popular, kual ta e fundeshi riba kual demokrasia ta funshoná. Kon 5 miembro ku no ta yega huntu 500 voto por tin e mínimo na pretenshon di ta representa mayoria di e pueblo ku a bai vota. Ta p´esei e úniko opshon segun ami ta ku pueblo ta tuma su mandato popular den propio man i eksigì rèspèt di primeramente e dos diputadonan pa tuma nan retiro inmediatamente i di e 5 miembronan konsernì pa para inmediatamente tur akshon kontra e aktual gezaqhèber. I si esaki no tuma lugar, antó mester disolvé Konseho Insular i yama dentro di e kuadro legal un elekshon nobo pa pueblo papia den un elekshon liber i sekrekto kiko e ta pensa di e actual situashon. Ta esaki ta e úniko manera e ora ei pa solushoná e krisis gubernamental kreá ku argumentonan falsu, fofo, sin base i kompletamente di mala fe pa ku un pueblo humilde manera esun di Boneiru. AWOR TE ORA PA BERDADERAMENTE KU E PUEBLO SO POR SALBA SU MES 8 di yuli 2013 Norwin Willem
Posted on: Tue, 09 Jul 2013 02:28:49 +0000
Trending Topics
Recently Viewed Topics
© 2015