KONSIYERTO NI DAVID POMERANZ GIDUGOK SA DUOT SA KATAWHAN Mikabat sa diyes mil ka mga katawhang Dipolognon ug mga dumuduong ang mitan-aw sa gipahigayong Live Concert ni International Singer ug Songwriter, David Pomeranz kagabii Hulyo 1 didto sa Dipolog City Sports Complex. Nahidangat dinhi sa dakbayan si Pomeranz kagahapong adlawa ug kini ma-initong giabi-abi nila Gobernador Uy, Bise-Gobernador Atty. Senen Angeles, Mayor Evelyn Uy, mga miyembro sa Sangguniang Panlungsod sa siyudad ug sa mga Dipolognon. Nasayran nga ang maong libreng konsyerto ni Pomeranz ang gipasiugdahan sa kagamhanang lokal sa Dipolog ilawom sa pagdumala ni Mayor Evelyn T Uy, alayon na sa pagselebrar sa ika-100th Adlaw sa Dipolog kagahapong adlawa July 1. Sa pakighinabi ning tigbalita ngadto kang Mr. Pomeranz, siya ang mipabati sa iyang pagpasalamat ngadto sa mga Dipolognon gumikan sa ilang maayong pag-abi-abi kaniya ug sa suporta nga gihatag atol na sa gipahigayong libreng konsyerto, midayeg usab kini sa kalimpyo, kanindut ug pagkamalinawun sa siyudad sa Dipolognon. Lakip usab nga gipasalamatan ni Pomeranz mao si Mayor Evelyn T. Uy gumikan sa pag-imbitar kaniya atol sa ika-100th Adlaw sa Dipolog. Nahimong malampusong ang nasangpit nga konsyerto diin napuno gayud ang gym sa daghang mga katawhan nga nagtinguhang makakita ug makadungog sa mabugnaw nga tingog ni Pomeranz pinaagi sa pag-awit sa mga gipasikat niini nga mga kanta sama sa Got to Believe in Magic, If you Walked Away, King and Queen of Hearts ug Born for You, nga nakapahugyaw sa mga nanan-away sa maong konsyerto. Kahibaloan nga ang maong kalihokan nga napahigayon isip pagpasalamat sa kagamhanang lokal ngadto sa mga Dipolognon gumikan sa ilang makanunayong pagsuporta sa mga kalihokan ug pagkahiusa alang na sa kalambuan sa Dipolog. Dugang nasayran nga duha na kahigayon adunay nahitabo nga international event dinhi sa siyudad. Una ang bag-ohay lang napahigayon nga International Bamboo and Gongs Festival diin namahimo kining magmalampuson ug ang konsyerto sa International Singer nga si Pomeranz dinhi sa dakbayan diin nahasubay kini sa paglantaw sa dakbayan sa Dipolog ilawom sa pagdumala ni Mayor Uy alang na sa SWIGAPORE 2030.(CIO-ZSM)
Posted on: Wed, 03 Jul 2013 10:10:26 +0000
Trending Topics
Recently Viewed Topics
© 2015