Ka lehkhabu Hringnun HLA MAWI chhiar tawhte khan lo ning lo hram ula. (Ka lehkhabuah khan ka dah si a..) Office-a ka computer-ah he hla hi ka haichhuak fuh leh tlat a, ka thuziak hlui hi kan post leh pawp mai teh ang. Eng nge, ka wall a nia, Mark Zuckerberg-a te hian duh duh ziak thei turin zalenna min pe alawm, inthlahrung lo mai teh ang. I STILL WISH THE VERY BEST FOR YOU Pathianin khawvêl a siam dan te, a duan dan leh a enkawl zui zél dan hi mihringin chhuiin chhût thin mah se a chhût chhuak zo lo va. He mihring finna hian ‘A mak mang e! tih mai loh chu a tawpah sawi tur a nei leh lo fo. Mipa leh hmeichhe inkara hmangaihna lo piang ve ringawt mai te, chu hmangaihna chuan dam chhung a han daih ve ngat mai te hi a mak a ni! Kan hmangaih berte hi kum khuaa kan bula kan chènpui theih loh an ni duh riau lehnghâl a. Kan High School kai lai khan heti hian kan sawi thin - First love can never die, but could not marry - tiin! Hmangaih hmasak ber hi theihnghilh an har êm êm mai a, a chhan ni bera lang chu - min hliam hmasa bertu a nih vang hi a ni ngei ang. Kan pi leh pute pawh khan thil dang ang bawkin hmangaihna chungchang pawh hi an lo varpawh hlê tho va. Hmangaih êm êm chunga inneih lohte pawh a awm thei tih an lo hre dîm diam a, Di-hluite chu anhnah tel inpêk thu-hlaah pawh kut a hlâwk a, a tel pawh a lian deuh bîk thin, an lo ti thin a ni awm e. He thu leh hla hi a dik takzet a ni ang, kan pi leh pute sawi hre miah lo sapho pawh khuan, I tan a tha ber ka la duhsak zél che a sin.. tiin lunglèn hla an lo sa ve vawng vawng mek a ni. Khawi nge, ‘I Still wish the very best for you hlaah hian bari bo mapin in inchiah lungleng leh dawn teh ang hmiang. Well you know Im really bad at writing letters You know Im not much better with the phone Day after day goes by and I still think of you Cause I still wish the very best for you A mak ngawt mai, ka thinlunga i thih theih loh êm êm zia hi! Thu tam sawi turin ka lâk tlâk loh va, engmah ka nih lohzia i hriat kha. A ziah lam ti ila, ka ngaihtuahna ang pawh ziak chhuak thiam lo, chini dilna takngialah pawh la hlawhtling miah lo khawpa thuziak lama chhuan tur nei lo ka ni a. Hmai chhan chu sawi loh, telephone hmanga kan inbiak pawhin a sawia sawi lam pawh ka chemkalna a ni lo tih i hai lovang. Kan inbiak hmain engmah ka ngaihtuah lo a ni bîk lo. Kan inbiak loh lai pawh khan i bula sawi tur hi ka ngaihtuah ve nasa thin a, thu tha leh awmze nei tam tak ka ngaihtuah chhuak ve fo. Mahse nang nena kan inbiak hian chutiang zawng zawng chu a bo leh duak thin a. Ka sawi tawh ang, ka tih te, Chuti chuan ka ti ve tawh tak tak ang, ka tih te chu chhem bo ang duak a ni leh mai thin. Chutiang mihring lak atang chuan tawngkam mawi leh thlum i beisei lovang tih ka hria. Chuvangin ka sawi tawp dawn - ni leh thla te ralin, kum pawh liamin, hun leh ni ral zêl hian nang ka ngaihtuahna che hi a liampuiin a ralpui si lo va, i tan hian he ka thinlung hian a tha ber leh a mawi ber a la duhsak zél che a ni. Well Ive been hearing that youve got a baby And that youre happy with somebody new You an I both know sometimes These things dont work out right I want you to know That I still wish the very best for you Ka ngaihven a, hriat ka châk a, hriat tumin ka mit leh beng ka len vél ruai ruai pawh a ni lo, mahse i chanchin hi ka hre ve leh ngawt mai thin! Hlim takin mi dang nen hun in hmang a, nautê pawh in nei hial tawh tih ka lo hria. Ka lawmpui che a, ka lawmpui che u. Engkim hi kan duh danin a kal vek thei lo va, kan duh loh zawng taka a her chang a awm ve thin tih hi kan pawm a ngai a ni. A enga pawh chu ni se, a tha ber nei turin duhsakna ka hlan reng che tih hre turin ka duh che a ni. So dont you think because were not together That I wont wish the very best for you Even though your love shines on some other Baby I want you to know That I still wish the very best for you I hmangaihna chu ka tan beisei phâk a ni tawh lo va, he khawvêlah hian dam reng pawh ni ila kan inkawp leh tawh ngai dawn lo. Chuti chung chuan i laka ka rilru putdan hi a la pangngai reng mai! A pangngai reng ti ila, a dik chiah lo. Hmânah kha chuan ka hmangaih che a, ka hmangaih avang che khan neih che ka duh a, ka tum a, inthen ka duh ngai lo a nih kha. Chutiang chu a ni lo zo ta vek e tihna pawh a ni chuang lo na a, chutiang chu a ni chiah tawh lo lawi si! Ka thinlung kil khat hi chu i hauh reng a, chu chu zêp thu a chéng lo. Mi dang i nei a, tang dang i bel a, ka tel lovin i tlei tawh tih ka hrechiang êm êm a, chuvangin hmâna neih ka duhna che ang duhna thinlung kha ka pu tawh lém lo. I hmangaihna chuan mi dang lakah par a chhuang tawh zawk a, i thinlung atangin paih chhuah ka ni tawh hial maithei. Chuvang chuan nang neih leh then inkarah hian ka thinlung hi a thên vêl tawh lo va, ka tum loh deuh hian ka lo hrechhuak leh mai thin zawk che a; ka hriat chhuah chang apiang che hian duhsakna sang ber bawk ka hlan zél tho che zu nia! So love and be loved by another You dont have to feel were going to lose You are free to roam and rediscover Someone who will share your ways with you I tan buaina leh lungngaihna tur a awm rêng rêng lo va, harsatna siamtu che pakhat mah a awm lovang. He khawvêlah hian i duh duhin lengin leu vêl la, i chen ngai loh nun thar chu hmuchhuaka chèn zél turin i zalèn takzet e. Mi dang hmangaih la, mi dang hmangaihna pawh dawng ang che. I hmangaih chu nangmah hmangaihtu ni se, i nunkawng tinrenga i belha i beina tur, i hlimna leh i lawmna pawh zêp leh khêk nei lo va i sawipui tur ni se - chutiang tur chuan duhsakna sang ber ka hlan a che. [He hla satu Morna Anne Murray hi 1945 June ni 20 a piang, Canadian singer a ni. Kum 2012 thleng khan Anne Murray hian khawvel pumah album copy maktaduai 54 aia tam a hralh tawh. Canada ram, Nova Scotia-a Springhill khuaa piang a ni a. A pa James Carson Murray chu doctor niin, a nu Marion Margaret Murray chu nurse a ni. Pianpui unau panga a nei a, an unau zingah hmeichhe awmchhun a ni. Kum naupang tein piano a zir a, kum 15 a nihin zai a zir bawk. High School a kai lai atangin mi hmaah a zai ve tan chauh a. Chuti chung chuan Canadian zaithiam zinga khawvel hriat hlawh ber a ni chho va. Canadian zaithiam dang Alanis Morissette, Nelly Furtado, Céline Dion, Sarah McLachlan leh Shania Twain te tana sulsutu pawimawh tak ni a ngaih a ni. Kum 30 mi a nihin Bill Bill Langstroth nen an innei a, fa pahnih an nei. A fanu Dawn Murray chu zaithiam tak a rawn ni chho va, 2008 khan Nobody Loves Me Like You Do chu an nufain an sa dun (duet) a, a hit hle.Murray hian Studio album 32 leh lawrkhawm (collection) album 15 a tichhuak tawh.]
Posted on: Tue, 15 Jul 2014 05:26:51 +0000
Trending Topics
Recently Viewed Topics
© 2015