Ka thin a alh phat mai! KTP member la nih ve reng lai hian tleirawlhovin, “Grand-pa,” min ti palh ang tih hlauvin “android phone” ka hmang ve e ka ti a, ding leh vei bo tawnin. Ka khâl nêl ve dawn chauh a, a buai ta nuai nuai mai a. Apps chi hrang hrang kha a inhawng pup pup a, a inkhar leh pep pep bawk a. An inzawrhnaah pawh, “After sale service duthusam kan pe, an inti bawk a,” tiin kan leina te dawrah ka tlânpui nghal a. Anni chuan company te authorized cell care-ah min tir liam leh. An mechanic te chuan mi pawh râwn buangbâr duh lem lovin an lo reboot pawp mai a. Ka phone memory-a ka thil dah zawng zawng: apps chi hrang hrang, harsa taka ka vai khawm: ebooks, Bible, dictionaries tih ang reng vel te, ka poetry phuah thar diai, ruahtui pawhina a la far hnan miah loh te leh ka suangtuahna lengvak ka hrikthlakna random notes te leh ka contact list-te chu a bo fai leh ta miat mai. Zilh fin theih loh tih takah hmun dang khawiah mah a thla veng (back up) ka dah miah lo leh nghal. Tui thûk leh thûk lo pawh ke khing hniha dai a, teh thin mi kha ka ni a, “Ip, ip, ip,” ti khawpin ka chesual chiang leh hle mai. An siam tha azeng pawh a ni lo leh ta nghal. “Touch problem a nih hi, a screen thlak a ngai. Chah chawp tur a ni a, thla khat nghah a ngai ang,” te chu min la ti ta dah rual a. Tuna duh tawh a, Nau awi mu phawt ang, tih ang chauh a ni. An receptionist nula, pakhat chu tawng pawh tawng hlei thei lo khawpa no leh Vainu, Zo tawng hneh zal mai, kei ai pawha hmuihmul nei sei zawk kha ka liak hrep lek lek. Mahse, ka hauh chak ber an mechanic kha pindan rilah a tawm dum daih si a; ka inbengdai ta hram hram a nih kha. Ka inhrosa phit ka thlawt chiam lo kha a fuh ta angreng viau, hei ina ka thlen hnu-ah ka handset chu a thara min thlaksak tur thu an rawn sawi e.
Posted on: Mon, 21 Jul 2014 12:14:21 +0000
Trending Topics
Recently Viewed Topics
© 2015