Ka tunu (niece) Prudence hian a phone-ah hian a ngaithla fo va. “Mawi phian ei!” ka ti liam mai mai thin. Ka lo chîk chiang ngai hlei law. Hman ni-ah kan veng tlangval vengva Mala Pachuau hian min rawn râwlrûk a. Ka pu duh tak V. Thangzama, damlai Mizo zinga songwriter ropui ka tih ber maiina kum 2005-a a phuah, “Khawngaih Chhandam Hla” tih a lo ni reng a (A satu Zohmangaihi aw nen a inrem em em mai bakah, a remna tabla leh instruments dang pawh a inchawih tlang e). Vintage V. Thangzama hi a ni ringawt. A mâwl, mâm, mar, mawi zaih mai. A thu leh thlûk a luang tluang dap a. Bialnute in kawng angin a zâl dam raih mai. Chord harsa taka han luh luih tumna hnuhma awm si lo va, a han kai kual zauh thin te hi alawm tawrh tihar thintu! Hla-thu un, khirh leh hlarua (poetic diction) a hmang hranpa hauh lo lehnghal. “Lunglai i her”, “Sul ang min tum”, “awmkhua a har” “mi tawnah” tih vel ringawt hi emaw hla ti-hla-tu titute tan chuan, “Heti ang thu thlûk nei” lo tihsak mai pawh awl zat e! Mahse, a thu hi han en teh mah u, a va prosaic lovin, a va poetic si em! Ka ngaithla nawn awn awn a, a satu aw a chhân hma chuan ka beng ka tikham dawn bik lo rengs! KHAWNGAIH CHHANDAM HLA Hun hlimawm ber a thleng dawn ta, Khawngaih vanga chhanchhuahte tan; Kan lei hun chhiar a kim dawn ta, Khualzinte lawma kan chawlhna. Kawng tluana min hruaitu ber chuan, Kawng chin a hria, kawng min hawn ang, Ka zin hla hlui a tawp hun chuan, Khawngaih chhandam hla ka sa ang. Lal hmaah kei ka lan hun chuan, Min hriat ang hian ka la hria ang, Chhandamtu hmel ka hmuh hun chuan, Khawngaih chhandam hla ka sa ang. Kan dam chhung nun hahthlak takah, Thlipui leh sualna hrang karah, Hlim taka kal a va harsa, Mahse ka hnaih zual hahdamna. Zai la, ka thla, zai kawng tluan la, Min khawngaihtu’n min hruai zel e, Chawimawina ni a chhuak dawn ta, Hmachhuan lui ral kan kai dawn e! Kawng tawp a lang thei rii riai e, Hla mah se min hruaitu ka hria. Amah ang thian ka tawng lo’ng e, Tu hriat sen loh min hmangaihzia. He kawng zawha hliam leh tlute, Mittui nena zawh zotute Hnehtu chanvo an lo pek ang Krista zarah ka chang ve ang
Posted on: Thu, 17 Jul 2014 06:41:36 +0000
Trending Topics
Recently Viewed Topics
© 2015