Ko e kii punifavai pe kae toki fai ha fakamakona ki Saione. Fakatauange pe ke mou sii mau ha aho Sapate kelesiia ia Sisu. Sisu Emeni. Sapate, Tisema, ‘aho 28. Lau Folofola: Kataki toe lau pē ‘a Luke 2:22-40, 22 Pea ʻi he hokosia ʻa e ʻaho ke fakamaʻa kinaua´, ʻo fakatatau ki he lao ʻa Mosese´, naʻa´ na ʻave ia ki Selusalema ke ʻatu ki he ʻEiki´ — 23 ʻo hangē ko ia kuo tohi i he Lao ʻa e ʻEiki´, Ke ʻilonga ʻa e tama tangata ko ha ʻolopoʻou, ʻe lau ia ko e tapu ki he ʻEiki´ — 24 pea koeʻuhi´ foki ke na fai ʻa e feilaulau´, ʻo hangē ko ia ʻoku tuʻu ʻi he Lao ʻa e ʻEiki´, Ko e ongo kulukulu, pe ko ha lupe mui ʻe toko ua. 25 Pea ta naʻe nofo ʻi Selusalema ha tangata naʻe hingoa ko Simione; pea ko e tangata tauhi tuʻutuʻuni ia mo lotu moʻoni, heʻene nofo ʻamanaki ki he taukapoʻi ʻo ‘Isileli´; pea naʻe faʻa haʻelea ia ʻe he Laumālie Maʻoniʻoni´. 26 Pea kuo valokia ia ʻe he Laumālie Maʻoniʻoni´, ʻe ʻikai te ne mamata ki he mate´ kaeʻoua ke´ ne mamata ki he Misaia ʻa e ʻEiki´. 27 Pea kuo ʻalu ia ki he Temipale´ kuo Laumālieʻia, mo e ʻoange ʻa e tamasiʻi ko Sīsuu´ ʻe heʻene mātuʻa´ ke fai kiate ia ʻo fakatatau ki he anga ʻo e Lao´. 28 Pea maʻu ʻa e tama ʻe ia ʻo hapai, mo´ ne fakamālōʻia ʻa e ʻOtua´, ʻo´ ne pehē, 29 ʻEi, ta ko hoʻo tukuange ʻeni hoʻo pōpula´ Ke ʻalu kuo fiemālie, ʻO hangē ko hoʻo folofola´: 30 He kuo mamata ʻa hoku mata´ Ki ʻao fakamoʻuiʻanga. 31 ʻA ia naʻa´ ke teuteu Ke hā ki ho kakai kotoa pē; 32 Ko e Maama ke tatalaʻaki ʻa e fakapoʻuli ʻo e Senitaile´, Pea ko e Langilangiʻanga ʻo ho kakai ‘Isileli´. 33 Pea tutuʻu ʻa ʻene tamai´ mo ʻene faʻee´, ʻoku´ na ofo ʻi he ngaahi meʻa naʻe leaʻaki ʻi he tama´. 34 Pea naʻe tāpuakiʻi kinaua ʻe Simione, ʻo ne pehē kia Mele ko ʻene faʻee´, ʻE, ko e ngafa ʻo e toko taha´ ni ko e holomotoetuʻuʻanga ʻo ha tokolahi ʻi ‘Isileli, pea ko e fakaʻilonga´ ka leakovia: (ʻio, naʻa mo koe ʻe ulu ha heletā ʻi ho loto´:) 35 koeʻuhi´ kae toki fukefuke ai ʻa e fakakaukau ʻa e loto ʻo e tokolahi. 36 Pea naʻe ʻi ai ha fefine palōfita ko ʻAna, ko e ʻofefine ʻo Fanueli, ʻa ia ko e toko taha ʻi he haʻa ‘Aseli´. Pea ko e fefine ʻeni naʻe fuoloa ʻaupito: naʻa´ ne maʻu husepaniti ʻi heʻene finemui´, ʻo na nonofo ʻo fitu taʻu; 37 pea kuo nofo uitou ia ʻo valungofulu mā fā taʻu: pea naʻe ʻikai mahuʻi ia mei´ he Temipale´, ka ne tauhi ki he ʻOtua´ ʻaki ʻa e ʻaukai mo e lotu ʻi he pō mo e ʻaho. 38 Pea naʻe tuʻu mai mo ia ʻi he taimi pe ko ia´, ʻo´ ne tali fakafetaʻi ki he ʻOtua´; pea ne lea ʻi he tama´ kiate kinautolu kotoa pē ʻi Selusalema naʻe nofo ʻamanaki ki he huhuʻi´. 39 Pea kuo ʻosi ʻe na fai kotoa pē, ʻo fakatatau ki he Lao ʻa e ʻEiki´, naʻa nau foki ki Kaleli ki honau kolo ko Nasaleti´. 40 Pea naʻe tupu ʻa e tamasiʻi´, ʻo´ ne fakaaʻau ke mālohi, he fakafonu ia ʻi he poto; pea naʻe toka kiate ia ʻa e ʻofa ʻa e ʻOtua´. Veesi Fakalaulauloto: Luke 2: 32, “Ko e Maama ke tatalaʻaki ʻa e fakapoʻuli ʻo e Senitaile´, Pea ko e Langilangiʻanga ʻo ho kakai ‘Isileli´.” Kaveinga: Ko Sīsuu´ ko e Maama ‘o māmani. Poupou: Na’a´ ku lele ‘o fai ‘eku ‘a’ahi ki he taha ‘o e kau tangata’eiki ‘o e Siasi na’a´ ku ngāue ai; pea na’a´ ne lea mai, “Faifekau me’a pē mu’a, ‘oku ‘ikai ko ‘eku akonaki eni kiate koe, kae tuku pē ke´ u huhua atu hoku matu’otu’a´ na’a ‘aonga atu ki ho’o ngāue.´” Pea ne´ u tangutu pē mo e tokotaha ne ma oo´, kae talanoa ‘a e tangata’eiki ki he anga ‘o ‘ene a’usia ‘a e ‘ofa ‘a e ‘Eiki´ mo ‘ene vakai ki he ngāue ‘a e Siasi´. Pea ne´ u lau ko e tāpuaki ia kiate au. ‘Oku fonu ‘a e Tohitapu´ mo e Siasi´ ‘i he talanoa ki he kau tangata’eiki toulekeleka mo lelei, pea ‘oku kau ai ‘a Simione. Na’e ‘ikai te´ ne hangē ko e kau tangata’eiki ‘o hono taimi´, Na’e ‘ikai ha talanoa na’a´ ne kau ki he fa’ahinga lotu ne mo’ua ai ‘a e kau Falesi´ pe ko e kau mamahi’i-fonua´ ‘a ē na’a nau feinga ke liukava’i ‘a e pule fakaaoao ‘a e kau Loma´. Ko e taha eni ia ‘o e kau tangata’eiki tokosi’i lelei ‘o hono taimi´, “Pea ta naʻe nofo ʻi Selusalema ha tangata naʻe hingoa ko Simione; pea ko e tangata tauhi tuʻutuʻuni ia mo lotu moʻoni, heʻene nofo ʻamanaki ki he taukapoʻi ʻo ‘Isileli´; pea naʻe faʻa haʻelea ia ʻe he Laumālie Maʻoniʻoni´. Pea kuo valokia ia ʻe he Laumālie Maʻoniʻoni´, ʻe ʻikai te ne mamata ki he mate´ kaeʻoua ke´ ne mamata ki he Misaia ʻa e ʻEiki´ ……… ” (Luke 2:25ff) Pea tane’ine’i ke´ ne ma’u ‘a e monū’ia mo e tāpuaki ke ne fai ‘a hono fakatāpui ‘a e Valevale Tapu´ ‘o fakatatau ki he lao ‘o e lotu fakasiu´, “Pea ʻi he hokosia ʻa e ʻaho ke fakamaʻa kinaua´, ʻo fakatatau ki he lao ʻa Mosese´, naʻa´ na ʻave ia ki Selusalema ke ʻatu ki he ʻEiki´ — ʻo hangē ko ia kuo tohi i he Lao ʻa e ʻEiki´, Ke ʻilonga ʻa e tama tangata ko ha ʻolopoʻou, ʻe lau ia ko e tapu ki he ʻEiki´ …….. ” (vv.22ff) Pea ‘i he’ene mo’ui fuoloa ke´ ne fai ‘a e fatongia mahu’inga´ ni, na’a´ ne fakapapau’i ai kuo hoko mai ‘a e palōmesi ‘a e ‘Otua´; he na’e tataki pē ia ‘e he Laumālie Ma’oni’oni´ ke fakakakato ‘a e ngāue mahu’inga´ ni. Pea ‘oku tau sioloto atu ki he taimi na’a´ ne hapai ai ‘a e Valevale Tapu´ mo ‘ene fakahoko ‘a e fatongia´, “ʻEi, ta ko hoʻo tukuange ʻeni hoʻo pōpula´ Ke ʻalu kuo fiemālie, ʻO hangē ko hoʻo folofola´: He kuo mamata ʻa hoku mata´ Ki ʻao fakamoʻuiʻanga. ʻA ia naʻa´ ke teuteu Ke hā ki ho kakai kotoa pē; Ko e Maama ke tatalaʻaki ʻa e fakapoʻuli ʻo e Senitaile´, Pea ko e Langilangiʻanga ʻo ho kakai ‘Isileli´.” (vv.29ff) Pea ta ko e Valevale Tapu´ ni, ko e Fakamo’ui’anga´ ia mo e Maama ‘o māmani kātoa´ – ‘a e Senitaile´ mo e Siu´ fakatou’osi. Ko ‘etau ma’u ‘a e Maama ko ia´, pea ‘e faingofua pē ke fili ha taha ‘o kitautolu ko ha tangata’eiki ke fakahoko fatongia ma’ae ‘Eiki´, ‘o ka me’ite mai ‘a Loto-Tatau. Lotu Hūfia: Ke tau hūfia mu’a ke ‘alo’ofa mai ‘a e ‘Otua´ ‘i he ngaahi teuteu ‘oku tau fai ‘o kau ai ‘a e teuteu malanga ‘a e kau malanga Pole’o´, pea mo e kau failotu ‘o e fakahekeheka ‘o e ta’u fo’ou ‘oku tau hanga ki ai ‘i he Uike Lotu´. Pea ‘oua foki na’a ngalo si’i ngaahi fāmili ‘oku nau teuteu ‘a e ngaahi fielaulau fakaafe ‘o e ngaahi ‘Aho lotu´ – ke tāpuaki mo fakamonū’ia mai ‘a e ngaahi teuteu kotoa pē ‘i he Huafa ‘a hotau ‘Eiki ko Sīsū Kalaisi´. ‘EMENI.
Posted on: Sun, 28 Dec 2014 08:21:01 +0000