LEIBA RAPTHLAK TAK ROKHAWM TUR MIN SIAM - PR - Zoramthanga, President MNF “A hnu leha sorkarna siam tur tan leiba nasa tak rokhawm tur congress sorkarin a chhekkhawl a, sum bur ruah dan Mizo mipui leh Delhi-in nakin lawkah an hrechiang dawn,” MNF President, Pu Zoramthanga’n a ti. He thu hi vawiin January ni 7, 2015 (Nilaini) chawhma dar 11:30 a MNF Office, Mizo Hnam Run hawnnaah a sawi. Pu Zoramthanga chuan party mipui kalkhawmte chu kumthar a nih angin rilru thar nen, puanven sawichhinga theihtawp chhuah turin a fuih a. MNF-a nihna nei te chanvo leh appointment insiamfel hun a nih angin, National Core Committee, PAC, Adviser leh General Secretary-te chu vawiina appointment thar pek chhuah a nih tur thu a sawi a, Gen. Hqrs.-a nihna nei dangte chu appointment tihchhuah thuai a nih tur thu a sawi bawk. Pu Rama chuan party-a nihna nei Unit atanga Gen. Headquarters te chu an hmaa tih tur awmte hlenchhuahna kawngah tun aia tan la tura a duh thu a sawi a. Village Council/Local Council, District Council, MLA leh MP-ah te mi duhawm tak tak kan thlanchhuah laiin, a siamtu party hre chang lova mahni kal kala kalte chu an tlo lo va, party rawn na chang hre lote chu a hnu leh atan dah nawn an har duh thin a, a tlin pawh an tling zui duh lo, hei hi political party tinin, ‘party-a chhum hmin loh,’ tih tawngkam kan hman fo na chhan pawh a ni a ti. Sorkar sum dinhmun sawiin, Pathianin naktuk atan sorkarna kan kutah dah dawn ta se, kum khat dang la sorkar tir rih rawh tunah chuan sorkarna kan keng ngam rih lo ka ti ang, a ti. Sorkar leiba rapthlak zia leh dinhmun harsat dan hi Mizo mipui leh central sorkar khuan a la hrechiang tawk lo, a ti. Hetiang rochun tur ringawt chuan kan zuam rih lo a, châk vang ringawta Chief Minister thutthleng luah ngam a ni lo, kum 1998 khan an sum bawm ruak kan rochun tawh a. Kan tawngtaina Pathianin a chhang a, ‘Peace Bonus’ hming phuahin core 182 min pe a. Kan sum harsatna kan siamrem chho thei hram a ni. Finance Minister-in sawrkar hnathawkte a thlamuanna chu December thla hlawh kan pe ang, tih a ni a. Kan pe ang tih ngai lo vin, sorkar hnathawk te’n an chanvo pangngai an chang mai tur a ni zawk. An hlawh pek tam tak pawh, Contractor-te PMGSY bill hren sak hmangin an pawt kual mai mai, a ti. Kum thar phata congress sorkar thawm thar ber leh mipuite hnena an thuchah hmasak chu Buhfai Kg khat, Rs. 9.50 atanga Rs. 5.50 zela ti sanga Rs. 15 a tihsan a nih thu leh, Zu in duh te tan permit neihna tur a dilna form Rs. 20 a hralh te a ni. An sum siam tum dan hian sawrkar sum harsatna a sukiang pha dawn lo a, India Constitution Article 360-na ah khan Financial Emergency a lo thlen chuan India president-in thupuan (proclamation) a nei anga, State-a Finance chu amahin a kutah thuneihna a la thei anga, tih a awm kuau va, chu chu kan hlat lo thei dawn hle a ni. An tawktarh lian ber leh mipui an hnehna pakhat chu NLUP a ni a. Nimahsela, Sazuk kimawi tak pakhat; a inchhuanna ber a kihreu hnawk kara a tan hlumpui ang, a ni. An hman dan leh an sem dan centralin a rawn hriat chian hunah phei chuan scam lian tak a tling lo vang tih a sawi theih loh. Lengpui khua ringawtah pawh NLUP Beneficiaries zingah record-a awm, a taka sum dawng lo chhungkaw 60 chuang an awm, a ti. Heng zawng zawng han thlir hian engkim mai an tluan loh pui a, an hun a herliam mek a ni. Kum 2018-a sorkarna siam turin mipuiin MNF lam an hawi thuap a, chutih rual chuan kum 2018 pawh min thlenpui pha dawn em ni, tih hi mi taum tak ngaihtuahnaah a ni, a ti bawk. Vawiin Mizo Hnam Run hawnna inkhawm hi MNF Vice President, Pu R. Tlanghmingthanga’n a kaihruai a, Upa Lalrinchhana PAC-in hunserh a hmang bawk. (ZOBIAKVELA) Joint Secretary, Inf. & Publicity Department, Mizo National Front Memo No. MNF/3/Pub/2015/1 Dated Aizawl, 7th. Jan. 2015
Posted on: Thu, 08 Jan 2015 02:01:22 +0000
Trending Topics
Recently Viewed Topics
© 2015