LPS PROFIGHT-A TEL TURIN MI 270 INBUK..FIXTURE HAWLA STADIUM LEH LPS OFFICE AH EN THEIH THUAI A NI ANG... Zoram hmung hrang hrang leh state pawn atangin LPS Pro Fight-a tel tumte Hawla Indoor Stadium, Republic Vengthlangah nimin khan an inbuk a, championship hmachhawn turin boxer 270 ziah luh an ni. Aizawl chhung bakah Mizoram khawpui dang leh thingtlang khua atangin champion tum an fuan khawm a, weight then hrang panga zingah lightfly champion Laldinmawia title chhuhsak tuma inbuk tam berin boxer 97 ziah luh an ni a, heng zinga 34-te hi boxing hmel hriata tawn hriat nei tawh niin mi 63 erawh la khel ngai lo leh hruihrual chhunga inhnek la hmachhawn miah lo an ni hlawm. Bantam champion Michael Zodinpuia kawnghren chhuhsak tumin mi 83 an tel dawn bawk a, an zinga 28-te chu boxing-a hnuhma nei tawh niin 55 erawh la khel ngai lo leh tun tum Pro Fight atanga hmingchher tum an ni a, lightweight-ah mi 39 ziah luh niin champion lai Anthony Lalduhawma bei thei turin khel thang tak boxer 10 vel an awm a, mi dang 29-te erawh boxing-a hmelhriat la hlawh lo an ni. Middleweight-ah boxer 32 an tel thei a, khelh thang tak 20 awmin la khel ngai lo 12 an awm bawk a, champion lai Zarzoliana dinhmun a derthawng thei viau tura ngaih a ni. Lightheavy-ah fighter 19-in champion lai Abel Lalawmawia kawnghren chhuhsak tumin inhnek an hmachhawn dawn a, pa lian inhnek hi tum dang zawng aia hmuhnawm tura ngaih niin, Pro Fight hnuhnung bera title chuhna inhnek hmachhawn tawh Dailova leh a hma kuma title chuh phak J Vanlalhruaia bakah, tunhnaia vawi hnih ngawt state championship-a Abel Lalawmawia hnehtu Lalmuankima, senior boxer M Hunter Hnamte leh Mizo infiamna huanga hriat hlawh tak LR Bawllianaten champion thar nih an tum dawn a ni. Mi 300 chuang an inbuk theih beisei a nih laiin form thehluh, inbuknaa inlan lo 83 ngawt an awm a, hetih lai hian sipai boxer, state pawn lam atanga Pro Fight-a tel ngei tuma inbuk engemaw zat an awm a, Pro Fight vawi thum neih tawha champion lo ni tawh Laldinsanga, ZD Lalchhuanawma, Vanlalhruaia, Lalnunhlua, Lalmuanpuiate an tel kim vek dawn a ni. Inrinniah fixture siam a ni ang a, peih fel a nih ve leh LPS Office leh Hawla Indoor Stadium-ah tar chhuah a ni ang. Khel ngai lote a tir lamah an inhnek dawn a, ni 49 awh tur championship hi zan lamah vek khelh a ni dawn a, September 30-ah khar tura ruahman niin zan 30 chuang hret inhnek nan hun hman a ni ang. Kar leh thawhleh zana tan turin Mizoram Boxing Association leh LPS Vision-in thawhhona tha tak neiin kawng hrang hrangah inbuatsaihna a kalpui zel a, inhnekna hmun tur basketball court-ah ring hun fel tawh niin tul dang pawimawhte pawh a zualpui chei fel a ni a, a hun takah engkim peih fel hman a nih tur thu a buatsaihtuten an sawi. Republic Vengthlang Games and Sports Association-in venhimna lam hna tha taka kalpui ngei tumin hma an la bawk a, zu leh ruihtheih thil laka fihlim lo leh mi dang tibuai zawnga khawsa turten a hmunah inhnek en tum ve lo mai se an duh tih an sawi a, mipuiten nuam ti taka hun an hman theih nan khawng leh khauh takin venhimna hna kalpui an tum a ni. Pro Fight vawi lina a hlawhtlin theih nan D3 Business Enterprise, Mana Motors, State Chilh Protection Society, Johnson Diesel Sales and Services, Rbh Genenral Enterprise (Kirlosker Generators)-ten championship sponsor-in, RC Shirts House, The Y2Goal Agencies, Rin Rin leh Pro Hub-ten mamawh an tumsak bawk a ni.
Posted on: Sat, 09 Aug 2014 04:44:03 +0000
Trending Topics
Recently Viewed Topics
© 2015