LURH TLANG CHAN CHIN TAWI Lurh leh Tan tlang te hi Chawnghawih, Khuavang zawlnuin khaw thlang lama tlang hming a sawi atangin Lurh leh Tan hming hi Mizoten kan hriat tan ve a ni a. Mizoram leh Myanmar inrina, Tiau lui kual, Farkawn chhim lama awm a ni a. Tlang hlawm lian pui, hmun hrang hrang a kham rang ropui tak tak leh hmuhnawm tak takte awmna a ni. He tlang hi 6350 ft. a sang ni in, Mizoram tlangsang panga zinga lang phak ani a, ramsa chi hrang hrang cheng in, Sathar, Sakhi, Saza leh adang te pawh an la tam hle. A hmun thlen meuh chuan phul awmna hmun zawl nuam tak tak te, thing lian tak tak dinna te nen lamin tlang dung chu a kat nuk mai a. chhawl hal te tana in tur zotuithiang tui tak mai awm te pawh chu he tlang ti nuam tu te zingami an ni a, a hun laia keifang leh thei rah dang chi hrang hrang awm thin bak ah, vaube par te, tlaizawng par te, fartuah par te, chhawkhlei par te leh nauban par vul te chuan he khawvel nun hahthlak tak ata hi min chhandam dawn ni te pawha hriat theih rum rum khawp in helai hmun hi an ti nuam a ni. Lurh tlanga khamte hi - chalngau, Archhuang, Sainghin tahna, Tlangsam, Lurh khampui, hlumte, Artalh, Lasi kawngkhar leh Tawnvunga kham te an ni. Lurh tlang ah hian Lasi te, Khuavang te, Phung hote pawh an cheng thin a, tunhma chuan Tau-meichher-chhi pawh tam tak hmuh thin a ni. Tlangsam tlang hi Surveyor ho in Lung an phumna hmun a ni a, Tlangsamho chettlatna a nih vanga he hming hi a pu a ni. Lurh tlang sang lai tak hi khaw thlir vel nana remchang tak mai a ni a,khaw thian lai chuan Aizawl-Chaltlang te, Lunglei chhim lama Chawngtinleri puanthuina tlang te,Mizorama tlang sang ber Phawngpui tlang te, Tawi tlang te leh adang te pawh a lang thei vek a, Bangladesh tuikhuah hial pawh a lang thei thin a ni. Khaw chhak lam ah Myanmar(Burma) rama Lentlang dung-Zinghmun tlang chen in mit tlin tawk a lawng bawk. Lurh ah hian Lasi lal a awm hran a, a fapa pawh Laltawnvunga a ni a, Lurh tlang dung ah hian Tawnvunga kham tih pawh a awm bawk a. Zawlneinuin hetia a awi tak atang hian Lurh leh Tan a mi an ni si a; Mizoten biak pawimawh takah an lo nei ta a nih kha. Tin, Lurh tlang hi a sang a, ruah sur thu-ah te pawh hian thu neiin an ngai tlat a, hla thu-ah pawh hetiang hian an tarlang a ni : 1) Lurhpui tlang maw a nuar, tlang tin a hnim e, Samtlang a insut vel e. - (Lalawithangpa) 2) Vawiin chuan kan tap Khaw Far kan vuan, Lurhpui tlang maw a nuar, tlang tin a hnim e; Val ka hnim Lalngo leng vangin. - (Dokapa) 3) Lurhpui tlang hnim lo la, khua hnim rawh, Mual khaw siktui za tam leng dawn a kam e; Ainawnpar Lalhniangi ruang bualna. - (Lalngenga) - heng hla te bak ah hian hla dang tam tak an la awm bawk. Tin, Lurh leh Tan hi sa chung ah pawh thu neitu an nihzia leh a ramte hi pasalthate ram chhuahna a nihzia hla thu atang in a hriat theih a: Saikuti hlaah :- i) Lurhpui tlang leh Tan khaw leng dil ila, Run in thim ruai lenchawm a chawl e. ii) Khua va chuan tang Lurh zo tlang chhipah, Thlang hlei kawlkung a leng nem mawlawhleng kan tuiana. iii) I hawl ang aw, Farkawn tumpang sial khi, Ka lam ang e, pathlawi Saingena. iv) Ram tuan rel lo ka lawm Annempuii, Tawnmang maw tha, Tharsa hawlin a kal Farkawnah. - he hla mai bak ah hian hla dang tam tak pawh ala awm nghe nghe. Farkawn thleng tawh tana Lurh Tlang lawn lova haw leh chu damchhunga in chhirna ani ngei ang tih thu, Farkawn Students Union, Aizawl-a College hrang hrang te leh Art & Culture Dept. tang kawpin Farkawn Tour 2013 a buatsaih tum a zirlai te sawi hian he tlang leh a chhehvel nawm dan tur chu a hril fiah thei mai awm e.
Posted on: Tue, 22 Jul 2014 18:11:23 +0000
Trending Topics
Recently Viewed Topics
© 2015