LWMTHU LEH NGENNA SIAM Dr. Jane R.Ralte, President AMWF chuan tun Inrinni khan Aizawl Press Club-ah Press mite kawmin, Lawmthu leh Mizoram Hmeichhiate leh sorkar hnenah ngenna a siam a. 1. Lawmthu sawina a) The Lushai Hills District (Village Councils) (Amendment) Act,2014-in hmeichhiate tan Seat hauhsakna Dan a siam chu a hman theih ta a. Mizoram Sorkar chuan Gazette Notice Dt.16.12.2014-ah a chhuah danin VC seat 3-ah 1,5-ah 1, 7-ah 2 leh 9-ah 3 hmeichhiate tan a ruat (reserved) a ni. VC awmna apiangah member 1-3 tal chu hmeichhia an nih tawh dawn avangin AMWF chuan lawm awm a ti hle. b) AMC huam chhunga Local Council-ah pawh hmeichhiate tan Seat Reservation awm ngei tura The Mizoram Municipalities (Amendment) Act, 2009-in a ken tel, hman theih tura hma lak mek (process) a ni tih kan hriatin AMWF-in Sorkar chungah lawmthu a sawi a. Hengte avang hian, a bik takin, CM Pu Lalthanhawla, UD & PA changtu, Pu Zodintluanga & LAD changtu, Pu PC Lalthanliana chungah lawm thu kan sawi bawk. 2. Mizoram Hmeichhiate Hnena Ngenna a) AMWF, PMSA, MHIP & Women NGO-ten nghak hlelh taka kan lo thlir, Mizoram Sorkar-in hmeichhiate tualchhung inrelbawlnaa tel ngei tura Dan a siam tak avangin, hmeichhiaten kan hmeichhepuite thlawp leh finchhuah turin hma i la tlang ang u. b) VC & LC election-ah hmeichhiaten an chanvo an chuh ve a ngaih tawh dawn avangin, hmeichhiate kan tan rual sauh sauh a tul leh zual. Hmeichhiate tlinglo anga kan in ngaih thinna te i bansan bawk ang u. c) Reserved Seat-ah hmeichhiaten election an chuh theih tak avangin hmeichhe lehkhathiam,khawtlang thatna duh mi te, zir sang lo pawh pianpui finna nei tha leh khawtlang hmangaihtu tur kan in khawrh chhuah thiam a tul hle a. An thawhpui tur mipate pawhin an sit loh tur, mi inpe leh tlingte in vawrh chhuak turin rilru i siam ang u. 3. Sorkar Hnena Ngenna a) The Mizoram Municipalities (Amendment) Act, 2009 Section 13 (10)-in a phut angin, hmeichhiate tan chairman post reserved hi a taka hman ngei nise kan ti. b) The Mizoram Marriage, Divorce and Inheritance Property Bill, 2014 chu nikum November 12-ah Assembly Session-in a passed tawh chu hman theih turin peih vat nise kan ti. c) Core Committee-PMSA ten 2008-a hmeichhiate hamthatna tur leh ram/tualchhung rorelnaah thuk/tam zawka an tel theihna tura Sorkara an thehluh Charter of Demand point hlawm 10 zinga 7 la tih hlawhtlin loh pawh tih hlawhtlin nise kan ti bawk.
Posted on: Mon, 26 Jan 2015 01:47:01 +0000