Lawmte aw, Zomi Innkuan USA kipawlna sapna tawh kei leh inn kuan pih nu Pi Ciin Khawm Cing, July 3-5 sung kihel thei ung. July 4, 7:00 AM hun in ZIUSA Cup bawlung suihna hona nei in thu genna tomno khat ka nei thei hi. July 6, ni ZIUSA Cup Final 2:00 in ki pan a, a khatna Cup ngah Zomi Innkuan Oklahoma (Thangho) Team-te Cup pen kei mah ong pia sak leuleu uhhi. July 4, 7:00PM nitak Khawmpi honna, ZBCM biak-inn ah kibawl in kei mah ong hong sak leuleu uhi. July 4, ni in Zomi Idol USA lasak kidemna pen 11:00AM-4:00PM kikaal kibawl a, kei zong la tawh kisai tha piakna khat ong gen sak uhi. July 5, ni in ZoLia leh ZoTaang USA kidemna om in Zomi Idol USA ah a khatna ngahte ka innkuanpih nu piasak uh a, kei zong ZoLia khatna ngah nungak nu pahtawina ong piasak uhhi. July 5 nitak 7:00pm, in hunpi khat kipankik in kei mah, Zomi Democracy and Human Rights Award ong pia uh a, ka nupa un ka sang uhhi. Ken zong lungdam lua in hanla khat kasam hi. Tua hanla pen; “Ka thang e… ZNC/ZCD hi-ing e, zangdon ah natai ing e, Mual zatam zui ing e, Mual zatam zui ing e, a kuamthuk ah e, ka tup ZODIAL khai ing ei! Tak Kapa Tapa Keimah Gin Kam Lian hi ing ei” naci demdam ing. Bawlung suihna tualpi pen Kawlgam Rangoon khuapi a om tualpite sang hoih zaw hi. Team (18) pha in State (30) val pan Khawmpi siim mimal 1,500 val ong pai uh a, ong paina lampite tai 1,000 val bang vive hi. Pawl khat Vanleng tawh ong pai zong om uhi. Bawlung suidingte pen zo ding a khatna ngah ding cih sang ZOMI-te khawmpi ah kihel limlim ding cih Zomi itna lungtang tawh ong paiciat dan uhi, mipi pawi simte zong Zomite khawmpi ah kihel hamtang ni cih lungsim hi a, a mau Motor leh a mau ann guai tawh ong pai diamdiamciat uhi. Motor khual pan ong pai 400 val bang pha hi. Leitung buppi Zomite pawi bawlna ah hi sang a thupi zaw thei ding pawi omvat nailo ding in ngaihsun ing. Mipi pen Zomi cih kilo limlim leh lungdam in khut beng ziahziah uh ahihteh Zomi khanlawhna khat om taktak hi cih kimu thei hi. ZoLiate kidotna Question-te ah Minam vai a tamzaw in kidong in a dawngte zong Zomi Zogam itna bekbekmah kammal zang uh ahihteh USA tung khangthakte sungah zong khaici pota cih kimu thei hi. A thupi mahmah khat ah na seploh phamawh gam hi in omna zong kigamla mahmah in, kum kibenglet in kimuhkhop theihna tua a hunbek om ahihteh, hanciam takin kipaiciat in thei ing, a pai zoloten zong Online pan na en uh a, hih Online ettheihna zong Kawl gam ah kumpiten zong tu a zah ciang hih zo nailo uhi. A nuntakziate zong Zomi a tamzawte dinmun pen ei gam ah mihau ih cihte sang, neek leh dawn, omnate inn leh lote sang zawpek uhi. Pilna lam ah zong khangnote University minthang MIT cihte ah zong kah theihna ngah mawk uhi. Pawl khatte zong amau omna State sangpite ah Top 10 ah kihelzo natam simsim ban ah, Mangla sakna, Music tumna lam ah zong Top 10 ah kihel nih leh thum bang na om mawk uhi. ZOMI INN KUAN USA kipawlna hanciamna leh a sep zawhnate uh vamu vatel thei ka hihteh thupi sa ing, ZIUSA EC geelna vaihawmna thupi mahmah sa ing, a gengenbek nahilo in, a sepnate uh kimu thei hi. Innteek Zomi Innkuan Oklahoma kipawlna, zindo inntek teng gimna tawlna zong ciapteh huai mahmah hi. Kawlgam Vaigam Leitung kici a om Zomiten ih hih zawh ding thu a hilo UNO ah Member khat din mun ong tutpih Zomi Innkuan USA kipawlna Makaite sepkhiatnate Zomi tangthu ah beingei nawnlo ding cih phawk ciatni. Kei gen thu pen tomin ZOMIte nampi lungsim nei ding, Census lai ih gelh ciatmah bangin Zomi ah kigawm ding, Ngaihsutna thak, ngimna thak tawh khangthakte kalsuan ding, ih lungsim ah Revolution bawl ciatni cih thu limgen ing. Zomite USA leitang ah alom atang ih tunna Topa geelna lianpi khat om ding hi ci in um ing. Kam Lian GS, ZCD Tulsa, OK, USA (tawmvei)
Posted on: Wed, 09 Jul 2014 03:30:19 +0000
Trending Topics
Recently Viewed Topics
© 2015