Lunghlu ka chhar Kristian chhungkaw ṭha tak (ti mai ang, chaklo teh mah ila) aṭanga seilian ka ni a; ka nu leh pate hnung zuiin inkhawm ka ṭhulh khat khawp mai. Inkhawm ka ṭhulh chuan setana beihna ang hiala ngai ṭhin ka nih avang in ka tan chuan ruihhlo ngai piangtharin ruihhlo an tih leha an da nghal thuak ang deuh mai hian rinna kawngah chaklo ta deuh leh in siamṭhat ngai hle in ka inhre ṭhin. Chutiang mi chu ka ni a; Chawlhni zan ṭumkhat chu ka nu leh pate chuan inkhawm an remchang lo tlat mai. Inkhawm ngei ka duh avangin kan ṭhenawm hnai a Kohhran upa chu ka zui ve tawp mai. Tichuan, ka inkhawm ta a; kan ban hnu chuan kan upate ho chuan tihtur an neih avangin hawnsan mai a ngai, engemawchen kawtah ka’n nghak zet na a; nghah chhuah tih a awm theilo. Inkhawm bang leh kawng kal vel nen chulai velah chuan mi kan zi deuh luai luai a; chutah tak chuan a ni khawvela thil hlu ber mai leh suangtuah pawh ka la suangtuah phak ngai loh chu ka hmuh tak ni. Hmanhmawh takin ka tlan hawng a; ka ṭhianpa hnenah ka thil hmuh chungchang chu sawiin ro kan rel ta. Zan a rei mai dawn avangin haw in ka mu ta a; thil ka suangtuah nasat em avangin ka mu tlem kher mai. Engtinnge kan tih ang? Naupang mai kan ni a, ngaihtuah thiam a har khawp mai. Burma lamah an kalpui ṭhin niin ka hria a; kan kawmchhak lama mi awmpui Manga hi tunhmaa sumdawng ṭhin, a sumdawn na aṭanga helai hmun rawn thleng ta hi a ni a; a ni chu innghah nan kan hmang ta ngawt a. Mahse, hetih mek lai hian rin ngam har kan ti viau lawi si. Ka ṭhianpa pa u hian tunhmain ramhnuaiah lungmawi hi a chhar a; ah a tum lai takin a kalpuipa chuan a’n thlek ve a; ‘a! engmah a nih loh hi’ tih pahin a paih ta daih mai. A paih ka’n ti tak na a, a paih lo nge ni, an hawn hnu lawk hian Silchar-ah a zin a; a rawn hawn leh chuan tunhma lama eng ni bik lo khan in lian ṭha tak a din ta uaih mai. Ka ṭhianpa pa u khan thil awmzia a hmuh thiam ve tho avangin a rilru na chuan a at phat ta. Engengemaw chhuangin lunghlu siamchhuah tumin a bei ta ngat ngat mai. Heihi kan hre bawk a; amah hi hralh tur chuan a ṭhat kan ring deuh bawk. An chhung hnai tak a nih bakah in khata cheng hote an ni bawk a, kan ring zual. Hetih hunlai vel hian kan ṭhenawm a mite hian an choka chu an extend-a; in compound-te hungin mawi takin an siam a; chungte chu kan ngei vel. Anni aia mawi leh ṭha in, zauh satliah mai lovin a thar ṭha tak nei thei turah kan inngai a; kan hmusit angreng zawk hle. Pathianin Eden huan ata kan thlahtute a hnawhchhuah khan anchhia lawhin rim taka hnathawk a ei hmu turin a ti a nih kha. Kha vang kha a ni mahna, mihringte hian hnathawh hi kan lo hobby ber mai, mi thatchhia kan tih takte pawh hian pawisa chhar ila emaw lucky ticket–ah a nuai tel man ila chuan tih an suangtuah nikhua hian an pawisa chen dan tur lam aiin farm nuam deuh emaw motor lei a khawi khuaah emaw service tir emaw an ngaihtuah ṭhin. Chuvang a ni mihringte hian hnathawh hi kan lo hobby ber mai e, kan tih tak ni. Keini pawh hetih lai vel hi chuan vawk vulh kha kan chak ber mai a; cheng tam tak nei turah kan inngai nachung khan a liantham erawh kan la suangtuah phalo deuh a ni. Vawk in sak dan tur, a ban phun dan tur thlengin kan suangtuah a ni. Manga emaw a pa u emaw kan la be chuanglo. Rilru erawh a hlimin a lungawi takzet a ni. Hrilh hmaa kan lunghlu chu entir phawt ṭhaa kan hriat avang chuan zingah mi thawh hma in exer lak pah niawm takin Biak In veng lamah chuan kan tlan chho va; mi’n min hmuh hlau takin ka lunghlu awmna lam chu enlo niawm takin ka’n en a, zei taka din hnaih a lak kan tum nak chuan chu YMA notice board thingphel leh thingphel inkara thil inzep chu saidawium keh mai mai a lo ni si.
Posted on: Wed, 11 Sep 2013 14:38:45 +0000
Trending Topics
Recently Viewed Topics
© 2015