LÊNG MIN ZÊMTU LÊNGZÊM HLA Zu leh zai zêm khat zentir a, khuang khuahkirh thin kohhran, khapna leh khuahkhirhna khawng khek khawk kengkawha Kanaan kai tum, phûr thar laia kan biak Pathian ai pawha duh fir leh fet peih zawk, sâwn pai leh thlâk thulh chuang lawi si lo Mizote zingah hian lêngzêm hla (love song) hi Gehena rim nam dawn dawna chhuah ching kan la ther fur a. Han en maia mi pangngai âwm taka lang zingah pawh, “Lengzem hla hi sual a ni,” tia lo aupui lûng lûng tâwk an la awm ta fo mai. Heng mite nen hi chuan kan Bible hman a in-anglo a nih ka ring. Bible hi version hrang hrang vawi ruk ka lo chhiar chhuak ve tawh a, eng version-ah mah - “perversion”-ah te a nih nghal loh chuan - hetiang hawi zawnga a inziahna âwm ka la hmu fuh ve thei lo. Ka mit dik tawk loh vang pawh a ni mahna. Kan lehkhabu rinpui bera, “.... a ropui ber chu hmangaihna hi a ni,” (I Kor 13:13) a tih lawm lawm laia hmangaihna hla (love songs - `lengzem hla’ tia kan vuah) hi “sual a ni” lo la tih pawr huarh te chu a! Kan Bible-ah hi chuan Solomon-a lêngzêm hlate chu “Hla chungnung ber” (“Song of songs” - Mizo Bible lehlin thara “Hla chhuanvawr” an tih, hla tha fawr bik) ti hiala dah a ni a. Krista leh a kohhran leh, Pathian leh Israel inkar thu hmehbelna (allergory) anga sawi rem ni bawk thin mah se a nihna takah chuan Solomon-a leh Sulam Lenmawii teho inchhaina hla, lêngzêm hla fir a ni a. Bible-a hum a luah aia neu chuang lo chu Lêngzêm hla hian hringnunah hmun a chang a; a la chang zel ang. A chhan: Mihring hi chhang chauhin kan nung lo. He’ng Lêngzêm hla tluangtlam, mipa leh hmeichhia induhna leh inhmangaihna puanchhuahna mawi tak tak hi mi hla thu leh thluk rû khawm a “Pathian hla min pek” kan tih thlak ve zen thinte ai hi chuan a ngaih pawh ka ngaisang zawk hrim hrim. Mizo lengzem hla sawi bawrhbang a, Setan-a AK47 ang hiala chhuah thintute ina an hla tih-rîk fo thin, Sap hla tawphnawk pui pui “I was gonna eat yo pu$$# (a nihna angin ka ziak râwt ngam lo) too but then I got high” tih ang chi ni lo hi chu kan hringnun kalh tikimtu a ni a, han hnualsuat phal chi ziazang a ni lo. Ni e, lengzem hla pawh hi kan Bible ang bawka chhiatpui leh hman khaw loh theih a ni tih chu ka pha hauh lo. Kan Bible ngei pawh mi sang tam tak (ni lo, sing sang sawmsarih tam tak zawk)-in an lo chhiatpui tawh a - David Koresh te, Aum Shinri Kyo te, Jim Jones te, Branch Dravidian te - a, sawi thui a ngai lo. Nghehna (integrity) nei lo mihring “Keia tan chuan love song hi sual a ni,” ti chuan sa-in ngaithla malek sela a ni mai. Miin nula hmeltha a hmuh apianga uire duhna thinlung a pu thin a nih chuan chumi chuan a mitmu chu kher chhuak mai rawh se; mit khing hnih neia Gehenaa an paih ai chuan. “Ui sa ei chu zu in a awl em mai, chuvangin ui sa ei hi sual a ni,” kan ti dawn em ni ang? Kristiannain kum za chuang min chenchilh a, chumi chhung chuan chuti zat vel bawk kohhran pawl hrang hrang a ding a, Krista thu bul hril tawh lova puitlin lam pan tur kan nih tawh tehlul nen,“Piangthar tan `love song’ hi sual a ni em? Lengzem hla sa chung hian Pathian fa a nih reng theih ang em?” tih ang zawhna mawlmang tak tak kan chai a la ngai hian kan pawnlânzia a hril lo maw? Piangthar tan hian contractor a nih theih em? Kohhrana rawngbawltute tan officer nih emaw politics-a inhnamhnawih emaw hi a thiang ve tho em? Krista neitute tan sumdawn hi sual a ni em? Zu in leh hmeichhe ngai kher lo hian truck driver a nih theih em? Hemi han sawi takah chuan kan pu Hnuna’n, “Tirhkoh Paul-a pawh kha Silchar tlang dunga truck khalh thin chu han ni ve ngat se Korinth khuaa mite hnena lehkhathawn tur a awm ka ring bik lo,” a tih kha ka hrechhuak rum rum mai. Kan theihnghilh hauh loh tur chu mi zawng zawngin pastor hna kan thawk vek thei lo va, evangelist-ah a nih loh paw’n a thuihruai counsellor-ah kan tang vek thei hek lo. Eizawnna thenkhatah chuan Krista êng lanchhuahtir a khirh viau a ni thei; amaherawhchu ên chhuah a harsatna ber hmun hi kan ên chhuah mawi theihna ber tur a ni dawn lo’m ni? Khuangin zu a kengtel tlat nia an ngaih tlat avanga biak ina khuang lakluh an khap hun chu a liam tawh a, tunah chuan lengzem hlain sual a pai tel tlata ngaihna leh inzirtirna a lo chhuak leh ta a, hma kan la sawn thui lo khawp mai. Thil sual a nih loh chuan kohhran upate hian biak in kawngah te hian lengzem hla hi sa kal rut rut sela a mawi ang em? te kan han tikawkalh leh hê hû mai thin a. Bual ina ruak ngalngata inbual hi fai a chiang bik a, sual a ni hek lo. Amaherawhchu, sual a ni lo ve tih vanga kawngpui lun laia saruaka ka inbual phur phur kher a tul lem lo vang. A hun leh a hmun thliar hrang thiam rual chu kan ni ve tawh lo maw? Piangthar tan “love song” hi sual a ni em? tihte phei hi chu, “Piangthar tan Sherlock Holmes-a thawnthu bu ang te hi sual a ni em?” tih anga chhan buai pawh ngai lo a ni. Ka thianpa Zorock - Rosangliana pawh a lar vanglai tak khan Umpling KTP leader inpe zo tak nih a thulh chuang lo va, kei misual hian belhchian dawl ka ti a, ka ngaisang em em a, a buzawlah pawh ke ngatin ka zu zawng chhuak reng a ni. Kan kristian tirh atang khan kan lêngzêm hla satute hi mi piangthar tha tak tak vek lo ni ngat sela zawng hetiang zawhna mawlmang tak tak hi kan buaipui tawh lo vang. Heng thu kan sawi mek lai hian Kum 1988 “Jesus is the Answer” Crusade Aizawla an hman tuma Billy Graham Evangelistic Association-a an rawngbawltu Danny-a’na inkhawmnaa “Red River Valley” a sak ang khan biak inah te pawh “Aw Bawihte, Aw Bawihte,” i ti ve chuah chuah ang u ka tihna a ni lem lo (Khami Robert Cunville-a Crusade tuma zaia rawngbawltu Danny-a hming hnuhnung kha Arnold Schwar-what-ever-a hming phel ang bawka chhinchhiah har chi a ni a, ka chiang tawh tlat lo). Tunlaia kan zaithiam lar, Pathian hla leh lengzem hla sak pawlh chi ni lova ngai intite pawh hi eng ang taka inserh thianghlim nge maw an lo nih chiah le? Hman deuha thangthar hmeichhe `gospel singers” lar em em pahnih chuan an concert-na leh TV lamah te lêngzêm hla, a Saptawngin (“My heart will go on”, “To Daddy” - hei hi Mizovina lêngzêm hla kan tih huang ami tho hi a nia aw) an sa ve leh tho va, an demawmna kei chuan ka hre lem lo. Amaherawchu Sap hla a nih avang maia lêngzêm hla sa ngai lo ang hrima hawi thianghlim luih talh an tum a nih erawh chuan kan Kristian dana hi ennawn a tul ngei ang. Tun hnai lawka Kolasib-a Youth Icon 2006 Top Ten Tour kha ka lo thlir ve thiak thuak a. Khatah pawh khan Youth Icon in-el laia Pathian hla chauh lo chu sa duh reng reng loho khan lengzem hla ngialngan tak tak an rawn sa sap sap hlawm a. Zotawng ni lo, Saptawnga an sak tak avang khan a thianghlim thar ta thut tihna em ni ang? Chuti a nih chuan “Mizo tawng” zawka hi a ni lo maw sual chu? “O, give it to me straight from the heart,” an tih a mawi ang a, “Aw, i thinlai lungruk kipte’n min hrilh rawh,” an tih chu sual kan tihsak si ang maw? Thil tam tak hi chu a dawngsawngtu azira thaa sual a nihna chen pawh a awm ve bawk ang. Kan Pathian lehkhabu thianghlim Bible meuh pawh hi Catholic kohhran theologian lar Don Bruno Maggioni chuan, “A zahmawh rawngkai lutuk a naupang ban phâkah phei chuan a daha dah loh reng reng tur,” a lo ti ve mek bawk asin. A nih he’ng hla: “Our love is like a ship on the ocean, We’ve been sailing with a cargof full of love and devotion” tihte leh, “Ami iangin sawi leh hril ka thiam lo, Thinlaiah, aw, ka hmangaih che.” (PS Chawngthu) tih hlate hian sual rim a nam a nih si chuan sual awmzia hi a bul atanga zir leh turin ka pawnthuah ka têl that leh a tul ngei ang. BJ Thomas te leh Cliff Richard-a te anga mi bik ni tura thilpek dawng bik, “Pathian hla hi ka thlurbing dawn,” tia Pathian rawngbawl nana inserhhrang hmak thei an awm chuan a tha thlawt e. Mahse, an chutih avanga anmahni anga thilpek dawng ve lote hnualsuat leh sawihnawm phah nan an hman erawh chu a tul miah lo vang. Anni pahnih ngei pawh hian an Pathian hla album-ah ngei ngei pawh, “Nang leh kei leh Isua” (You and me and Jesus) tih hawi zawngin kristian lengzem hla an la sa vawng vawng tho. “Lal pahnih rawng i bawl kawp thei lo,” tia love song sâwt pûng pûngtute hi Pathian hna leh sawrkar hna thawk kawp an ni duh fu a nia. Khaw’nge kan sawi tam ta bawk a, hahchawlh nan lengzem hla hlui, hlui thei lo: Di Biahnemi, If Not For You, You are so beautiful tih hlate leh Will You Still Love Me Tomorrow? tih hlate ka’n in-awihtir vang vang tawh teh ang. - Extracted from Thlaler Aurawl (a miscellany) By Mafaa Hauhnar (2007)
Posted on: Mon, 08 Sep 2014 05:49:52 +0000
Trending Topics
Recently Viewed Topics
© 2015