MAGKUWENTU KUMU TUNGKUL KING HAU. Ena kaila kekatamu na malaut ne aratang ing Holy Angel University. Atatandanan kupa anyang first year high school ku kanita, magklasi kami king SB building ampo king SC building. Simpli mu ngan kanita. Ing uniform kanita kayi mu gray pants ampong white polo with HAU badge on the left chest pocket. Gang nanung shoes okay mu. Black o kaya brown leather o rubber shoes (sneakers). Ding college students kanita maka maung lamung blue or black patse lalaki ampo maka white T-shirt o polo shirt. Kareng babai naman makablack skirt la ampong white blouse. Makanyan man, partikular ne ing HAU kareng uniforms dareng students na kanita pa. Asnang kamuran ing tuitions naning HAU kanita. Kaya asnang karakal magenroll. Private ya pero affordable naman kareng kerakalan kareng pengari. Ing usung bag kanita detang ESPRIT o kaya KHUMBMELA nung ali ku magkamali. Medyu malambat na e. Eku na makaying atatandanan. Akit me ing HAU kanita, simpli yamu. Itang dating college library and HS library, tambayan mila kanita deta, ali para mamasa, para magpa-aircon. Patse gatpanapun na, mag PE la ding students kanita king oval (baseball field). Akit me ing oval kanita, malawak ya. Ding classrooms mu kanita, kin lang gym. Required kami kanitang magshorts ampo pang mag white T-shirt king PE class. Ala naman makaying gastus kanita. Masaya. Itamu ing asabi ko. Ing second year mi kanita ing peka masaya ampong makatakut. Masaya kasi masanting makipagpatinteru kareng boycotters ampo makatakut uling gang ating boycott kanita, pilit dala pamurin paluban ding students kanita. Neng kayi rugo, ing polo mung susulud na pigkasakitan ng ima mung pipyan na sulud mu palub klasi king abak only to find out na madinan yang grasa. Excited kang muli king bale kaybat na nita para magkwentu king milyari keka, pero sermun ing ibye ng mamu at sabyan na, “Yan na ing amanwan ko eh. Ot paluban dakayu pa kasi.” Migkaboycott kanita dahil king tuition fee increase. Ding college students kanita ila ding pasimunu. Meging sikat ya ing lagyung Francis Pangilinan kanita lalu na kareng babaing students ampong kabadingang. Mapogi ya kasi. Apin ita. Eku balu kung nanu ing meging resulta naning boycott kanita. Pero ing balu ku, blacklisted la ata ding boycotters kanita. Tapus ding alwa ali la ata meka graduate. Eku sure. Pero ita ing dimdam ku kanita. Lungub ku kanita king klasi, alang makaying students pero ating mestru. Tuluy ing klasi. Apin ita ing dahilan kung bakit patse mumuli ka atin kang grasa. Kasi pin ali suspended ing klasi. Ding alwang students pin kanita, kinailangan dapang mukyat kareng pader para makalub. Barricaded ya kasi ing HAU kanita. Makalunus la ding alwang students na magboycott kanita kasi ating mepabalitang mengabugbug la kareng security guards dareng HAU. Ding teachers kanita “silent supporters” la kanita. O, mamye lang moral support. Ding alwang HS students kanita, meconvinced la na tuki king boycott. Apin ita ing second year experience ku kanita. Unforgettable. Momentous. Dangerous. Anyang third year kami kanita, alang makaying drama king HAU kanita. Ing drama mu kanita lagi king Noli Me Tangere. I madam Patrocino Dizon kanita. Pero alwa ne apelyidu ngeni kasi mikyasawa ne. Anyway, masaya kanita. Practice naning drama mi kanita lagi king KAMAYAN AREA. Gulut naning punenarya Angelina. Makatakut. Pero, okay mu. Ding ka batch ku kanita, atsu APS ampo JDN buildings. Palitang classrooms kareng different subjects. Economics-law of supply and demand. Memorize me ing SONA kanita. Kasi kayabe ya king test. Values Education kanita, madrama. Madam HUET-TEODORO-ding kayang vocabulary everyday. Metung kareng pekamaganakang mestra na atin kami kanita. Tapus itang pekamakatakut ming OIC, I MRS. Lagman pin ta? Pulayi! Maganaka ya ita. Pero sobrang tatakut la ding students kanita kaya. Alang commotion kanita. Ing magulu mu ding mag CAT o kaya mag ROTC na akakit mi. Ding alwa mi ngang kaklasi migapply nalang COCC pin kanita? Para mu maging officer la ata panga fourth year. Atin yang pagawa ing HAU admin kanita. Pero, ali kabongga kalupa na ning ngeni. Pelasak danerin kanita itang SAWALI building. Ing HAU kanita tahimik mu. Alang makaying eksena. Ing maeksena mu ing Flag Raising Ceremony patse abak. Dapat ali ka malelate. Nuko patse migstart ne ing pambansang awit at atsu ka pa king gate, pulayi naka na atsu ya ing kanang kamay mu king kaliwang salu mu. Kasi ating magcheck attendance. Ampo lalu na ing first Friday Mass. Eka required munta patse ali ka katoliku, pero magcheck attendance. JS prom. Masaya. First dance. Pakadress la ding babai and paka neck tie noman ding lalaki. Anyang fourth year, ala muring makaying eksena king HAU kanita. Typical mu. Normal sabi dapin. Ing masaya mu kanita ing CAT ampong ACCA? And ing cheering competition ampong bookshow kanita. Masaya. Lalu na dakal activities anyang fourth year kami. Atin pang mardi gras pin ata kanita. CAT ing pekamasaya. Lalu na ing chain of command. “Talupad!” “Balangay” “Pulutong” Ding baklang sasalikut kanita. Nuko ala lang kawala. Matda kang mayli karela. Ding officers kanita, kailangan mung magtuck-in kanita king harapan da. Gang school days. Nung ali. Good luck king Saturday. Pakintaban shoes kanita. “Colours” la ata ding peka usung brand kanita. Gang tabang pamiritu gagamitang pagshine sapatus. Makalub kasang makintab a sapatus o alang alikabuk. Karin meusu murin ing tau tau, holding hands. Makatuwa. Masaya. Ding mestra kanita, masaya la namang tuturu. Madam Bognot, Filipino teacher, lagi depang pakyapusan king klasi. King HAU naman ala naman makaying pamagbayu. Makanita pamurin. Lumang facilities. Pero tuluy ing quality education. Gang makapakananu. Kasi teacher base ing acquisiton of knowledge kanita. Ding mestru ila ding pinakagateway mu para matutu. Eka kalupa ngeni. Adavancement in technology has revolutionized the way students and teachers interact on the basis of knowledge acquisition in the classroom. College ku, HAU kupa murin. Masaya kasi king HAU. Tabulu mu kareng aliwa ne. Ding aliwa kasi linapat nala AUF or kareng alwang univiersities king region. Anyang college ku, karin migstart na magplanu ya ing HAU na iimprove la ding kayang facilities. Kanita na migsumula ing bagya bagyang pamagtalakad a buildings. Mumuna ne ing STL. Pero, mas minuna ya ing Engineering building kaya. Tapus na ning STL, tuki tuki na. Chairman ku kanita ning CAS anyang sabyan da kekami na dakal makapilang patalakad a buildings kanita. Exciting gang aliwa na ikami ing magbenefit kanita. This year minuli ku Pilipinas. Metung kareng target na buri kung pasyalan ing HAU. Ding kanakung HS mestru nung atsu la pa. Atin naku man akasabi karela na angga man ngeni tuturu la pa karin. Binilang nalang dekada. Atsu la parin at maglingkud bilang mestru at alang sawang magshare kabyasnan kareng students. Ding alwa nga migpaalam nala. Ding alwang mestru nga ka batch ku la pa. Mebigla ku anyang akit ke ing HAU. Sobrang menaliwa ne. Kilub naning adwang dekada, akit mu ing difference. Balamu from an ugly duckling to a beautiful swan ya. Masaya ka kasi yan ing Alma Mater mu eh. Pero, makalungkut muping isipan kareng damdaman mu kareng mestru mu na ali mu ing pasilidad naning HAU ing migbayu. Pati murin pala ing kayang pamamalakad ampo pamagtratu kareng mestru. Makalungkut isipan kasi ding sobra na lambat a tuturu king HAU, agagawa dapa rugung magrally. Na nung tutuusin dapat masaya nala king tatanggapan da king HAU kasi uling malambat nalapin eh. Madakal issues kung abalu. Na patse lalawen ke ing HAU, eme pweding e akit ing kayang peka slogan...LAOS DEO SEMPER! "Praise always to God." Ngeni itang baseball field kanita, chapel ne. Nanu ya wari talaga ing tutung kabaldugan naning slogan a ita? Ing balu kumu na, ing tutung magshare kabalwan kareng tau, ali mu dapat makabasi king pasilidad na atin ka. Makabasi ini king kakayanan naning guru na turung masalese. Ekaila na madagul ya gagastusan ing HAU kareng facilities na. Pero, sana isipan narin na kaakibat na ning kayang pamagunlad ay itang tutung pamagpuri king Apung Ginu na dapat makatarungan ka kareng magobra na ampo kareng magaral na. Ing eskwela negosyu ya. Atsu tana karin. Kailangan makasabe ya king competition kareng alwang schools. Pero, ali na neman dapat isakripisyu itang lugud na kareng magobra na ampo kareng magaral na, lalu na kareng pakakalulu. Sana isipan na ning HAU na ali mu lagi negosyu. Ulti mu atang papil na gamitan kareng quizzes dareng students, karela dapa salwan. Atin lang reading program, math program and nanu nanu pang program na pampadagdag gastus king pengari. Nanu man ing issue between HAUTEU and HAU admin, makalunus lang akakakit ding mestru na atsu king dalan na magrally. Apung Ginu ko. Kailangan dapang gawan ita para mu akwa itang dapat karela. Ing asabi kumu na ding eganaganang magaral king metung a eskwelahan, dakal a dakal ding tandanan daren ding mestru da anggang patse ala nala king school da. Kasi ding mestru ila ding molders daring anak. Alwa naman talaga ing school. Lugar yamu ing school. Ding mestru, ila talaga ding sasaup para magbuild knowledge and memories daring anak na tandanan da hanggang tumwa la. Sana mu maayus nanu man ing problema da. Sana mu madinan lang chance ding students na makapagaral king HAU based on their principles of quality education. Of all people, dapat dang abalu, na mestru la ding maapi. Ila ing makabalu mumunang mumuna kung maaapi la o ali. Kasi pin ila ing tuturung kabisyanan kareng anak. Sana datang ing panahun kareng magaral ngeni karin na ing atandanan da alwa ing sakit a denasan daring karelang mestru anyang magaral la. Sana ing atandanan da ing katapangan na ipaglaban ing ustu. Sana ing atandanan da ing ngiti ampong saya dareng mestru da na tuturu king klasi. Alang estudyanting ali apektadu patse ing mestru iya ing mipaburen. Sabi napin Jose Rizal, "Ang kabataan ay ang pagasa ng bayan". Sabi ko naman, "Ang guro ay ang pagasa ng kabataan".
Posted on: Tue, 27 Aug 2013 11:58:25 +0000
Trending Topics
Recently Viewed Topics
© 2015