MALU TAEAO Aso Lua 8 Iulai Iopu 40:1-14 Autu: E TE TUUINA A’U I LE SESE? (Will you put me in the wrong?) Matua: f6 “Ona tali mai ai lea o le Atua mai le afā.“ (The Lord spoke to Job out of the storm) Masani lelei tatou i lenei mea o le “afā“. Taimi ia e nofo ai lava le tagata ia i lona fale, ma vaavaai atu i le matautia o le malosi o le agi mai o le matagi, ma faatalitali le taimi, e pa’u ai le fale, pe lelea ese lona taualuga, pe pē ai le eletise, osofaia ai le fale i le vai, ma nisi tulaga faapena. O ia mea uma, e tau mai ai i le tagata, e matuā leai lava so tatou malosi, e pupulu ai le malosi o le Atua. Wind remind us how helpless we are. Ioe, a oo i taimi o afā, ua faaalia le malosi o le Atua, pau le mea e fai e le tagata, na o le faalologo lava ma le loto maualalo. Lea ua tali Iopu, i le vaipanoa lea. “Faauta, ua faatauvaa lava au, se a se mea ou te tali atu ai ia te oe? ou te tuu ae lo’u lima i lo’u gutu. Ua ou tautala atu faatasi, ae ou te e toe tali atu, ua faalua foi, ae ou te le toe faaopoopo atu“ (f4,5). O le mea sese lea ua fai e Iopu, o le tali upu. Tatou Samoa, e le manaomia se tali o se upu a le matua. A tali loa e se tagata se upu, o lona uiga, ua foliga ai ua na faasa’oina lona manatu. O le fesili a le Atua, o le mea e ta’u o le rhetorical question. O le fesili e le moomia ai se tali. Lea la na faaoso ai loa e le Atua le afā, e ta’u mai ai ia Iopu, AUA E TE TUUINA A’U I LE SESE. Will you put me in a wrong? Tusa o lea ua fetalai le Atua, “Iopu, ’aua le fai atu ae e tali mai. E te tau faasa’oina a’u? Na o le faalogo lava o ou taliga.“ hehehe. A fika atu i le tali a Iopu, e leai se leaga. E pei se faatoesega. Ioe, o lea e le’i ma’ea le saunoaga a le Silisili Ese, ae ua sosopo le manu vale, a o ala le mafua. Lenei aso foi ma ona fuafuaga, ia tatou lagona le loto maualalo, pe a oo ina siisii le tai fana’e i lagona ma manatu. A lutaluta foi le gataifale i ona faigata ma puapuaga, ia olo lava le fua. E iloa le tagata i ona fua. ’Aua le gutuoso. ’Aua le tali upu. ’Aua le faafiapoto, auā o le mea lena e tutupu ai afā. Pa loa ma le misa, tau pusi i luga o le aupā, tau fai toso lava le pito laau a le tagata ia, e uma ane le afā, ua lē aoga. Tatou tuu pea i le Atua lenei aso, ina ia tu i le foe e faatautaiina lo tatou sa. Faamoemoe i lona alofa, e malū ai le sousou o le vasa. Pau la tatou pitolaau e tauamo, ia lotomaualalo, ma ia tatou pei o Iesu, “ua ia faamaualalo o ia e ia lava. Na faaeaina e le Atua, ma foaiina atu ia te ia le suafa e silisili i suafa uma lava.“ (Filipi 2:8,9). Fetalai Iesu, “Amuia e loto maualalo, aua latou te iloa atu le Atua.“ Manatua, aua le tuuina le Atua i le sese. AMENE
Posted on: Mon, 08 Jul 2013 22:33:51 +0000
Trending Topics
Recently Viewed Topics
© 2015