MALU TAEAO Aso Tofi 11 Iulai Iopu 41:1-6 Autu: E MAFAI ONA E TOSO MAI LE LEVIATANA? O le ’leviatana’ ua manatu foi le au popoto, o le manu lea o le kolokokila. O se tasi lenei o manu e ese lona malosi, ua faia e le Atua. O le uiga o le upu ’leviatana’, o le taavilivili poo le taafifili (twisting one). O le masani lea a le kolokokaila, e maua loa sana mea’ai, ona taavilivili lea i lalo o le vai, e lelemo ai se manu poo se tagata foi ua ia mauaina, e tali ai lana sua. Lea e fai mai le tusitala, “E te mafai ea ona sisi o leviatana i se mātau, pe taomi lona laulaufaiva i se maea? E te mafai ea ona tuu se maea i lona isu, pe tui lona auvae i se mātau?“ (f1&2). O le olaga o loo tatou ola ai, e tele le taimi e pisi vale solo ai i mea lē aoga. Mea ia e amata ona faalatalata mai ai le leaga ia i tatou. E tau leai se taimi tatou te faia ai se mea lelei, ma mafaufau ai i le malosi o le Atua ma lona silisili ese. Peitai, lenei aso, lea ua fetalai le Atua ia Iopu, e faailoa ai lona malosi, e sili i malosi uma. O le leviatana, tasi lenei o faatusa o le leaga (evil). Tele ina tatou faauouou ma le leaga i aso uma, m tatou puapuaga ai. E leai se isi o tatou, e mafai ona tetee malosi atu le fili, pe a oo ina osofaia tatou. Lea foi ua osofaia e Satani Iopu, ma faatama’ia lona tino ma lona agaga, ae ua leai se mea na te mafaia. Ioe, lenei aso, ia tatou manatua le malosi o le Atua. Poo le ā le fia malosi mai o le leaga ma ona faaososoga, mafaufau loa i le malosi o le Atua. Vaai oe nei faataavilivili e le tiapolo. Lou ola nei malemo, ma e uma atu ai i lou faavalevalea. Vaai lau mātau o le amiotonu e tui ai le isu, ma le maea o le tatalo e nonoa ai le laulaufaiva o le fili. O malosi sili ia, ua aumaia e le Atua, tatou te tau ai le taua ma le tiapolo. Ae ’aua le sau ā le fili e attack oe, ma e faavasivasi atu ai. Uma foi lea o le aso, ua e malemo. E mafai la ona e toso ane le leviatana i lenei aso? MANUIA LENEI ASO I LE FAATASI MAI O LE MALOSI O LE ATUA.
Posted on: Wed, 10 Jul 2013 22:29:20 +0000