MATANA MEMO 14 Laltanpuia Pachuau laltanpuiapachuau@gmail MIZORAM SORKAR EDUCATION POLICY Nov 7 chanchintharah khan political party hrang hrang ten zirna chungchanga an hmalak dan tur hmachhawp te mipui hriatah an sawi kan chhiar a. A engemaw hmaa lo rinhlelh nghal zel ringawt pawh hi a rilru dikloh thlak lek lek te hian ka hre deuh na chungin a tak ram a thleng thei em, a realistic em? tih rilrua dah chungin Zoram mipuite hian kan politician te thusawi leh an thutiam te hi uluk takin ngaihtuah ila a tha hle in ka hria. Zirna lam policy an sawi te kha a lo tha viau thei a, a lo tha mang hlek lo thei bawk a. Ngaihtuah chiang lova, ‘aw, aw, aw’ ti ngawt lo deuhvin kum zabi 21-na Mizo te hian kan ram hruaitute inzawrhna policy te hi i han bih chiang tak tak dawn teh ang u, kan zavaia that tlannan. Congress hi sorkar lai an ni bawk a. Anni policy hi han en phawt ila. Kan ram hruaitu lu berin ‘World class education’ a tih kha a tawngkam chu a ropui khawp mai a. Chumi min thlen tura din Education Reforms Commission a member te pawh mi mai mai lo tak tak vek an ni hlawm ang. Mahse, ‘commission’ tih te ‘committee’ tih te hi history kan chhiar chuan, thiltum tihhlawhtlinna ai mahin a kawng tawpnaa ngaih theihah a chhuak fo thin tih kan hria. Tin, ‘world class education’ tih phei chu India ramah pawh kum tam tak kan la tluk loh tur an la awm thup chhung hi chuan Mizoram sorkar hian a tum ang hi a sual chhuah har hmel ka lo ti. Thil theih loh chu a ni lo, mahse khawvel pumpui el phaka han in hlangkai tur chuan sorkar term tam a ngaih hmel a. Chuvangin ‘world class education’ han tih hluai ang te hi chu ‘Switzerland of the East’ tih nen khan a danglam vak em ni le? tih te rilruah chuan a lo awm. ‘Mizo zirlai, India ram pawna zir tlak, sum lama harsatna neite tan foreign scholarship an siam thu leh, sorkarna an chan leh chuan foreign scholarship chu tihpun an tum thu a sawi a’ tih chanchinbuah kan chhiar a. He scholarship hi a bul bal la hre lo kan awm takin, Education Minister Pu Lalsawta’n Sept 2010 a Assembly House a hrilh dan chuan, ‘scholarship dawng tur hian Mizoram Overseas Scholarship Rules 2009-in a huam chinte thlan an ni a, Rules in a phal angin Post-Graduate zirlai tan an senso 50% leh Under Graduate tan 40% pek an ni,’ a ti a. Scholarship pe theitu chu Higher & Technical Education Secretary a nih thu a sawi bawk a. A dawngtu zat chu House a hrilh lai khan mi 20 an ni a, a vaiin Rs. 77,46,568.00 sem a ni. misual/2010/09/27/india-pawna-mizo-zirlai-20-te-overseas-scho-nuai-77-chuang-pe/ misual/2010/09/28/overseas-scholarship-house-ah-sawifiah/ ‘Zir tlak’ tih chu hrilhfiah dan azirin a dang thei hle anga. Duhsak bik neih theihna chance pawh a siam theiin a hriat, officer pakhat thuneihna a ni bawk si a. India ram pawna zir Mizo zawng zawng te hi an thahnem ve tawh a, ka hriat ve chin ho hi Mizoram chu sawi loh India rama haw leh pawh chak tawh lo an ni tlangpui. Tin, a then chu ‘haw leh rawh u’ tih ngawt theih pawh an ni hlawm chuang lo. Haw leh se an thawh tur hna Mizoramah a awm thin chuang lova. Hetia Mizoram sorkarin an zirna atana sum tam tham tak a pek hian a dawngtu tan chuan thil lawmawm tak chu a ni ngei anga. Mahse, heng kan Mizo thalai India ram pawna lehkhazir te hian haw leh an tum tawh hlawm loh ber chuan anmahni tanpuina tura sorkarin sum tam tak a sen kha Mizoram sorkar leh Mizoram tan enge a hlawkna ni ang? Mizoram sorkarin mimal hmasawnnan a ‘zir tlak’ te a lo duhsak a nih pawhin hetianga sum seng tur hian kan sum bawm hi a khat tha tawk em? tih te hi zawhna a ni leh bawk. Kan ram hmasawnna (mimal hamthatna/hmasawnna ni lo) tur atan hian a taima leh ti tha peih, ram hmangaihna rilru pu te an awm a, India rama zirna in ropui leh tha tak tak atangte hian Mizoram tana tangkai tur zir chhuah tlak a awm lo a nih chuan a hla ber berah te pawh thiamna tak tak va paw chhuak turin a zir thei fa te chu zir chur chur se. An zirna tur sum leh pai pawh chhungkhat laina te leh sorkar sum bawm thleng pawhin khawrh ila tih te chu duhthusam alawm. Amaherawhchu, kan tlin em? ‘Zir tlak’ te kan thlang dik thei angem? Thlang dik thei pawh ni ila kan Zoram tan hian enge he sum hmanna hi a tangkaina tur chiah ni ang? He’ng te hi kan chhan hleih theih loh chuan sapram thlir lovin kan ram chhunga zirna leh zirlai te hi thupuiah nei phawt zawk ila kan tih fuh zawk angem aw?
Posted on: Tue, 12 Nov 2013 08:27:19 +0000