MATCH REPORT : BURNLEY 1 - 3 CHELSEA Chelsea chuan 2014/15 season a EPL game hmasa ber chu Turf Moor ah Burnley nen an khel a, Mipui 20,699 hmaah sikhat an phurh zet hnuin, 1-3 in hnehna an chang. Chelsea boss Jose Mourinho chuan 4-2-3-1 formation hmang bawkin a naute a rawn rem leh a, Kum 10 chhung Chelsea Keeper rinawm lo ni thin Petr Cech aiah rawlthar Thibaut Courtois a luh tir thung. Hemi chungchangah hian Mourinho chuan, Kan hmalam hun kan thlir angaih avangin Thibaut Courtois hi thlang ka ni. Kum 10 kal ta a, Cudicini v Cech chungchang pawh kha thutlukna siam har tak a ni a, tun a mi nen hian a in ang khawp mai. Season pumpui atana thuthlukna hi siam ka ni lova, Zanin match atana siam mai ka ni. Petr Čech hi professional dik tak a ni a, tukin a ka thutlukna ka hrilh pawhin a pawm thiam khawp mai, he hmun luah leh tur hian a rawn bei let ngei ang tiin a sawi nghe nghe a ni. Courtois bakah hian kan leithar pahnih Fabregas leh Costa te chuan first XI an rawn chang nghal a, Luis erawh bench ah a thu rih. Iva, Cahill, Terry leh Azpi ten defence line an luah lum a, Matic leh Fabregas te holding midfield ah awmin, Oscar chu attacking midfielder niin, A sir ah Hazard leh Schurrle te awm an awm a, a hmatawngah Costa a awm bawk a. Burnley hian 4-4-1-1 formation an rawn hmang a, pre-season match hnuhnung bera an XI ah thlak danglam an nei lo a ni. FIRST HALF : Game tan a nih hma atangin boruak a tang thra hle a, fans ten an team te theihtawp au tran tumin an bei nasa hle. Khua a dur deuh a, ruahhmi a tla seng seng bawk. Game tran a nih atanga rei lo te ah Schurrle goal shot chu Burnley player in a dang pial a, goal ah a lut teuh nghal ngei mai ! Burnley lamin hei hi rawn chhang let nghalin, Lukas Jutkiewicz chuan Chelsea goal net sir chu a rawn pet per ve dawp bawk. Inkhel a tang a, player te an che rangin game a hmuhnawm chho khawp mai. Minute 13 na ah Burnley in corner an hmu a, hei hi Matic-an a lo head chhuak, mahse Burnley lamin chang zuiin, veilam sir atangin ball an rawn cross a. Scott Arfield chuan ball chu a awm a lo dang thla in, kawh zetin a shot nghal a, a goal chiang kher mai. Courtois atan chet hman ngaihna a awm lo. Burnley fans authawm pawh a reh hma in, minute 17 naah Ivanovic chuan lei hrulin a shot a, goal post per in ball lo let leh chu Costa hmaah a rawn kal a, a chance a hlah lo. Hnai set sawt ah a shot a, lehlam player in dang pial deuhin, goal net a puar pawp mai. Minute 20 naah Chelsea season a intan tak tak ta tih nem ngheh nan goal ropui tak mai an thun zawm. Eden Hazard chuan midfieldah ball changin, a khalh lut a, Ivanovic pe in , a nin Fabregas tan a pe leh nghal a. Fabregas hian Schurlle tan ball duhthusam pe lutin, cool zein a ke dinglamin a goal ah a thun a. Fabregas a assist a ropui rualin, Angle tight tak kar a Schurrle finishing pawh a ropui thlawt ! Burnley defender back pass chu Costa in umzui nghalin, ball a chang a, hei hi Burnley keeper Heaton chuan a lo ti tlu a, Mahse Referee Michael Oliver chuan dive angah ngaiin,Yellow Card a pe ta daih a. Replay atanga a landanin Penalty tur ngei a nih hmel hle. Minute 34 naah Ivanovic a rawn inlar ve thung. Fabregas a corner pet chu chiang zetin Burnley goal ah a lo tlawh lut a. 3-1 in hma kan hruai ta der mai. Defence line lam pawh an hriam thrain, first half ah hian kan game a mawiin, a hmuhnawm takzet a ni. SECOND HALF : Second half ah hian Burnley an rawn hlauhawm hret a, nikum lama an top scorer Arfield chuan remchang hmuin nalh zetin goalah a shot kual a. Mahse Courtois an thra zet in a lo save sak thung. Second half tan atanga minute 10 chhung chu Burnley an hlauhawm tluan zak a, Mahse Mourinho a nauten insiam tha in game an thunun chhunzawm leh thei. World Cup an khelh avanga chawlh nei rei deuh, training zawm tlai Schurrle leh Oscar te chu minute 77 hnulam ah lak chhuah an ni a. Mikel leh Willian ten an rawn thlak. Chumi hnu ah King Drogba chuan Hazard a rawn thlak veleh bawk. Second half ah hian Goal dang luh belh tawh lovin , Chelsea chuan 2014/15 EPL a an game hmasa berah point thum an hlawh chhuak ta a ni. MATCH FACTS : Chelsea (4-2-3-1): Courtois; Ivanovic, Cahill, Terry (c), Azpilicueta; Fabregas, Matic; Schurrle (Willian 77), Oscar (Mikel 81), Hazard (Drogba 83); Diego Costa. Unused subs - Cech, Zouma, Filipe Luis, Torres. Scorers - Diego Costa 17, Schurrle 21, Ivanovic 34. Booked - Diego Costa 29 Burnley (4-4-1-1): Heaton; Trippier, Shackell (c), Duff, Mee; Arfield, Jones, Marney, Taylor (Kightly 70); Ings (Sordell 81); Jutkiewicz (Barnes 70). Unused subs - Gilks, Dummigan, Long, Wallace, Scorer - Arfield 14 Booked - Sordell 86. Referee : Michael Oliver Ball Possession : Burnley 37% - 63% Chelsea Man of the Match : Cesc Fàbregas
Posted on: Mon, 18 Aug 2014 22:18:37 +0000
Trending Topics
Recently Viewed Topics
© 2015