MBSE matric exam question papers a pût rûk avanga exam that a ngaih leh tâk kum, kum 1993 kum tir, exam tura ka inpuahchah lai khan ka thian (a nihnaah tak chuan ka patea tur) Rinthanga hi a bialnu’n Vai mistiri helper zawmthaw bân tak khan a lo bân ngawt pek a. A la na vei ngaih ngaih khawp, a tliak hnâwp kha a ni ber. A lungleng tawngkhawng awm ngaihna hre lo kha a lo tek lut nawlh a. Hla phuahsak turin min rawn ngen a, ka han phuahsak ve nghal mai bawk a. Heti ang hian: Ka dawnin suihlung reng a dam thei lo, Hlim leh lawma hmangaihna par tlan a, Nang nena suihlung kan rual lai te kha, Zantiang tawnmang mawl mai an chang zo. Then loh biahthu min tiamte kha, Lem ang derna anka mai maw lo ni? I thinlung chahbi vawngtu ka ni thin a, Lungrunpui, tunah ka tan i chuai ta si; Aw, dam takin mangtha, bawihte, mangtha. Nau ang nuarin i her maw i lunglai? Mahriak a lunglen chhiar ka zuam nem maw! A na em a ni e, lunglam ka vai, Valrianga’n ngaihlung her thei ang i maw? Valrianga’n ngaihlung reng ka her thei lo, Thinlai a hnîm, aw, lung lêm ka nei lo; Dawi tin thang ruai mah i, a dam hlei lo, I zunzam ngai, mahriakin ka tlei lo. A rhyme scheme a irregular naa ka lo rhyme thlap a nih hi. A thluk pawh keimah ngeiin ka siam ve thlap kha. Tu’n khawiah an sa zui ta lêm hlei law.
Posted on: Wed, 13 Aug 2014 07:54:46 +0000
Trending Topics
Recently Viewed Topics
© 2015