MIPI NGAIHDAN DAWPNA Amasa pen in hiai laigelh hon na sim suaksak ding in ka hon ngen hi. Ei mihingte tangkhat a hingthei kihilou, society a tengkhawm niinei, azawng-ahau, asiam-asiamlou, ahoih leh hoihlou deuh bang om a, mi tuamtuam hihna tuamtuam neite munkhat a tengkhawm, nek leh tak zonna lam a mahni a kitoudelh thei nailou, govt a kipumngak a khawsa laite ihi uhi. Hiai bang ihihman un, i gam pen govt. kam neiloute a dingin khawsakna haksa mahmah mai a, tuaziak in mailam a i khosakna-te uh tua sang a hong hoih zawktheih a kho nuam zawdeuh, tenna mun nuam zawdeuh, nekzonna nuam zawdeuh a hong suahtheih na dingin mipiten govt. hoih kipoimoh petmah hilou hiam (?) ichi hi. Govt service i chihte pen public servant i chihte uh hi a, hiai omdan bel ei a mipi ten i deihdante uh elected te’ tungtawn a dan toh kituak policy bawl hanga, huaite i govt servant ten ana semsuah chihna hilel hi. Huchi ahihleh govt. hoihtak leh kiptak i neihtheihna ding in heutu hoih, dan toh kituak a policy tuamtuam bawl khia peih, dan leh dun omsate diktat tak a enkai peih heutu kipoimoh lai hi in ka mu hi. Manipur in kum 1972 apan state piching hihna a muhnung, tuni tan in i gam in elected public leader tampi i telkheta ua, amau ten mipi adiing na tampi leng a semkhe thamta uhi. Ahihziakin, kei mimal experience leh muhdan a kipan mipite kul-le-poimoh hi a ka theih leh elected public leader khat in effective taka a septheih, a nasem ding leh a semsuahtu ding om nailou sepding mun awng hia ka theihna munte tamlou kon gen ding Mimal in i taksap:-Gamsungkhat a tengkhawm mi tuamtuamte i theih dante uleh i siamdante uh kibang kimlou in, a tei ki-om a, a tei loudeuh bang leng ki om, a maingal bang ki om, maingallou deuh bang lengki om, paudang thei meitei-pau, vai-pau leh sap-pau thei bang ki om a, a thei khollou bang leng ki omzel hi. Hichi bang mite munkhat a tengkhawm i hihna uah, khotang toh kisai thil hou chikchik ah buaina tuamtuam kituak sek hi. Huaite bel pau leh ham theihlouh ziak bang a buaina, application gelh ding bang a buaina, legal/court lehkha toh kisai/gamthu a buaina/bank lam a buaina/insurance thu a buaina/mobile phone thu a buaina leh a dangdang a buaina neuhneuh neaten maingal taka i dot theih ding uh heutu ki poimoh lua hilou hiam? Tulai in mi a tamzaw thamte i nekzonna uleh iki ngakna pipen uh local govt ahi a, hiaiziakin mi tam zawte govt. toh iki saikhak louh theihlou in ki-om nak hi. Hichi bang ahihlai in, tulai a govt. nasemte teng lah laisiam pipi ngen hi ua, tamtakte bang kisathei nuam mahmah in mi tampite ading in govt officer khat kiang a thu vatut/vagen ding chih bang thil haksapi suak a, hichi bang buaina neite lamkaihtu ding heutu ki poimoh lua hilou hiam? India govt in gentheite dopsang utna ziak in panpihna scheme tuamtuam- AADHAR CARD, BPL CARD, SANITATION SCHEME, MGNREGS, IAY, BRGF, MSDP, SELF HELP GROUP leh a dangdang tampi ah panpihna kumteng in tam taktak hong paizel mahleh, mipi leh mimal kuamah hiai bang a schemes omte theichian ki-omlou, a tangding dawl in tangkha khollou sek, a tangkha sunte lah ahong paibang tak a tang chihle om khollou zomah- hiaite enkaitu ding in SAHANG LUBAWK THUM neithei chiang heutu ki poimoh lua hilou hiam? Mipi’n i poimoh uh:- I gamsung guam leh lampite, lei (bridge) neu omte leh nulla-te a kibawl chiang in leng, hoihtak a etkai ahihlouh ziakin govt. a kipan na kisem khete peuhmah a tou omlou in se pahpah, hichi bang a mipi nate hoih zawdeuh a sep ahong hihtheihna ding in a enkaitu ding heutu hoih ki poimoh lua hilou hiam? I khawkiim uah dawn ding tui ki ningchingtak in om a, tuiluanna ding tuilawng veng chih ah kikhung suak thamta hi. Ahihziak in tuidawn ding kiningching muh chih omngei tuanlou, hiaite awlmoh a enkaitu ding heutu ki-poimoh lua hilou hiam? I gamsung ua meivak supply a ginat taktak louhlai in, vengsung a transformer omnate um chih omlou in lauhhuai theilua, electric khuam leh aguite hoihtak a enkai omlou, vuahpi-huihpi nungzek leh sia hipah zel, a siat chia lah a bawl ding om pahpah lou. Electric fee pawlkhat in pia, pawlkhat a pe-ut hetlou bangle om, meilam awlmoh pha ding heutu kipoimoh lua hilou hiam? Innteng in i poimoh pen uh Cooking Gas i gam ah kidaih chih om ngeilou, bangtan hiam a ahong kidaih deuhtheihna ding a awlmoh tak a enkaitu ding heutu kipoimoh lua hilou hiam? I gamsung ah mi kuahiam khat nekzonna haksat ziak in nekding buaita leh taina ding theilou, damlouhna ziak a buai se-gawp khat, ambulance leh doctor a poimoh huntak a arrangement bawlsak thei ding, ahih keileh guta-lata, khotang leh vengsung bitna dinga a poimoh bangzel a security-te, kul leh poimoh dungzui a zangthei ding heutu kipoimoh lua hilou hiam? I gamsung ua tuailai lehkhasiam tampi omte a nekzonna ding uh lampi gelsak leh kawk muhtu ding, banah, nupi-papi kuahiam sepdi neilou nasem nuamte a dinga a nekzonna ding uh lampi local bank hiai zahzah omte tungtawn a gelpihthei ding heutu kipoimoh lua hilou hiam? Hiai a tunga kigente teng nang mimal tak ah poimoh na sa hia? Na sak leh hichi bang nate semsuah ahong hihtheih na ding a hon pankhawmpih ding in ka hon ngen hi. Pathian in lem ahon sakpih lam-en in leh, heutute deihsakna ka tan leh hongtung ding 2015 Member of District Council (MDC) election omding ah New Lamka West constituency adin candidate khat in din kasawm hi. Non kithuahpih lamen in, C T Lian Guite NB: Hiai toh kisai kuahiam kupnop nei i om leh hiai @ 8974225922 ah hon thuzak ding in kon ngen hi.
Posted on: Tue, 26 Aug 2014 02:04:14 +0000
Trending Topics
Recently Viewed Topics
© 2015