MIZO NATIONAL FRONT, GENERAL HEADQUARTERS, AIZAWL : MIZORAM PRESS RELEASE Myanmar remna palai atan Pu Zoramthanga a kal MNF President, Pu Zoramthanga chu, January ni 11, 2015 chawhnu dar 2:30pm khan Myanmar sorkar leh Underground pawl hrang hrang 17 inhlawm khawmte inkara remna palai hna thawk turin Mizoram a chhuah san. Heng, underground pawl hrang hrang te hi - Karen, Kachin, Uah, Chin Hills, Arakan, Shan etc. te an ni Ni 12. 1. 2015 (Mon) hian Kolkata atangin Rangoon ah a thlawk lut anga, Burma sorkar Minister inchangre ‘Peace talk’ nen January ni 13 atanga ni 17 inkarah inbe turin apointment siam fel a ni. Hemi hnu Jan. ni 18, 15’-ah Bangkok a thlawk lut leh ang a. Chutah chuan Underground pawl hrang hrang aiawh hotute nen an inbia ang. Myanmar sorkar leh hel pawl hrang hrangte a biak fel hnuah January ni 22, hian Home Ministry, New Delhi ah report a pe leh dawn a ni. Pu Zoramthanga Myanmar sorkar leh underground te inkara palai hna a thawh chhan hi, ram tam takin palai hna an thawhna te a zuihral thin vang a ni a. Underhround hruaitute chuan India leh MNF inremna tluantling leh tha tak entawn tur a awm avangin, underground hruaitu hlui Pu Zoramthanga hi an rawn be pawp a. Pu Zorama’n palai hna a thawh hma hian, ram hrang hrang - China, Japan, Norway leh Sweden bakah United Nation ngei paw’n India mi UN-a thawk pawh a tir tawh a. Hmasawnna a awm theih loh vangin, Britsh Prime Minister hlui, Tony Blair-a team an hotu nu Inter/Mediate, Sr. Director Dessislava Roussanova paw’n Myanmar-a palai hna an thawhna kawngah Pu Zoramthanga chu Oct. ni 3. 2014 khan N.Delhi ah a lo kawm tawh a. Tunah chuan Myanmar sorkar leh Underground pawlte ngenna angin amah, Pu Zoramthanga ngei palai hna thawk turin a kal ta a ni. Myanmar underground leh sorkarin palai hna thawk turin Pu Zoramthanga ngen thin mah se, Central-ah congress(UPA) sorkar lai a nih avangin engmah tih theih a ni lo va. NDA a lo sawrkar takah hian Pu Zorama hi palai hna thawk turin nasa takin an nawr leh a. 2014 december thla chawhma lama Pu Zoramthanga Delhi zin khan National Security Adviser, Ajit Kumar Doval nen inhmuin, Prime Minister hnenah lehkha ziakin an thlen sak ta a. Home Ministry lamin an ngaihtuah fe hnuah Burma ramchhung buaina a nih avangin sorkar laipui inrawlh a hreh em em a, Myanmar sorkar thuneitute lo be leh phawt tura an tih angin, Myanmar sorkara an Minister te nen an indawr zui ta a. Pu Zoramthanga zinna tur Visa chu Myanmar sorkarin a buaipui ta vek a. Myanmar President office atangin an embassy new delhi lam a rawn hrilh a. An zin chhan (purpose of journey) pawh Myanmar remna pui turin (Myanmar peace making process) tiin, an lo siam sak diam a ni. Myanmar an thlen velehin ‘peace centre Myanmar’ pan nghal turin ruahmanna engkim peih sa a ni bawk. Hetianga MNF President, Pu Zoramthanga Myanmar remna palai hna thawk tura sawm a ni hi, MNF chuan ropui a tiin a chhuang a. A palai hna a thawhna kawngah harsatna tam tak tâwk thei a nihna te, underground mi raw-va pui pui te zinga khawsa tur a nih avangtein MNF chuan Mizo mipui zawng zawng tawngtai sakna ka ngen tak meuh meuh a ni. Pu Zoramthanga hi Pu Rosangzuala, MNF Gen. Hqrs. Secretary leh Delhi lama engkim lo buaipuitu Rakesh Sharma ten an tawiawm ang. (ZOBIAKVELA) Jt. Secretary, Inf. & Publicity Department, Mizo National Front Memo No. MNF/3/Pub/2015/03 Dated Aizawl, 11th. Jan. 2015
Posted on: Tue, 13 Jan 2015 15:28:18 +0000
Trending Topics
Recently Viewed Topics
© 2015