MORNING REPORT : 04.08.2014 THAWHTANNI (Zonet Zing Daifim 7:30 a.m.) Police Report : Tukinah Kolasib Police Station tih loh kan biak thin Police Station dangte chu kan be kim thei a, kan hriat theih chinah nizan lamah thil thleng duhawm lo sawi tham a awm lova. Lock Up ruak 3 a awm a, tang zingah hmeichhia an tel lova. Police Station 4 ah chhungtena an tantir mi 6 lai an awm thung a ni. Nizan chu Lunglei Police Station ten tang 17 neiin an ngah ber a, heng zinga a tam ber chu zuruih vanga buaina siam an ni a, rinhlelh man an awm nual bakah ruih vanga lirtheia chesual an tel bawk. Aizawl Police Station ah tang 9 kawlin zu mansak, khawm leh remand te niin family case a tang 2 an tel bawk. Bawngkawn PS ah tang 5 kawlin 3 chu khawm case an ni a, 2 chu family case an ni. Serchhip PS ah rinhlelh man 4 kawlin Kulikawn PS ah tun hnaia Aizawl a bomb tipuaktute nia puh mi 2 an kawl a. Vaivakawn PS ah family case 1 leh zuruih vanga man 1 kawlin, Zonuam Out Post ah zurui chunga buaina siam vanga man 2 an kawl a. Saiha PS ah family case a tantir 1 an kawl a ni. Traffic Report : Inrinni a Aizawl a Traffic Rules bawhchhia man zat : Two Wheelers 11, LMV 5, Taxi 4, Bus 1, fine tlingkhawm Rs. 7,500/- Hospital Report : Nimin tlai dar 5 atanga tukin dar 7 thlengin Aizawl Civil Hospital Casualty ah emergency case 115 an nei a, mitthi an nei lova. Nizana Civil Hospital Casualty pantu zingah hian road traffic accident vanga hliam nei an tam ber a, ruh tliak leh lu sawh nat vanga admit 3 an awm a, RTA dawtah chuan pumna an tam ber a ni. Uiseh 2 awmin zurui medical 25 lai an awm bawk. Khum ruak a awm lova, Emergency & Labour Room ah Inrinni atanga tukin dar 7 thlengin nau piang 30 an awm a, mipa 13 leh hmeichhia 17 niin, an zinga mipa 3 leh hmeichhia 2 chu zai chhuah an ni a, vawiina nei tur 2 an awm bawk. Synod Hospital Durtlang ah nizan khan emergency case 17 neiin heng zinga 9 chu admit an ni a; mitthi 2 an nei a. An mitthite hi Maite khaw nula, rannung seh vanga thi leh nausen pianghlim te an ni. Nizana Synod Hospital pantu zingah hian puitlingah pumna an tam deuh ber a, ward thenkhatah khum ruak pahnih khat lek lek an nei a, Cabin a full a, ICU ah na zual enkawl 4 an awm a. Lawmna Ward ah nau piang 4 awmin mipa 3 leh hmeichhia 1 an ni a, vawiina nei tur 3 an awm bawk. Greenwood Hospital ah thisaa lak 1 awmin khum an full a. New Life Hospital ah nau piang 2 neiin khum an full a. Kulikawn Hospital ah te, Bethesda Hospital leh BN Hospital ah te nau piang 1 theuh an nei a. Adventist Hospital ah khum an full a, a dang zawngah Cabin an full bawk a.Lunglei Civil Hospital ah nizan khan emergency case 15 neiin mitthi an nei lova, nau piang 3 an awm a. Nizana Lunglei casualty pantu zinga tam ber chu pumna leh khawsik an ni a, khum an full a ni. Power Report : State Load Despatch Centre (SLDC) atanga thu kan dawn danin, nimin leh nizana power kan hman tlem lai ber, nimin chawhma dar 11 a kan hman zat 31.48 MW a ni a. Kan hman tam lai ber, nizan dar 6:30 a kan hman zat 48.18 MW niin tualchhunga siam chhuah 3.7 MW nen kan hman zawng zawng 51.88 MW a ni a. Load shedding siam a ni lova. Zuangtui atanga Bukpui 132 KV Line nimin chawhnu dar 2:45 a chhe leh chu siam that a nih hnuah tukin dar 2:14 atang khan chhim lamah eng pek theih leh a ni. LPG REPORT : Ni 2.8.2014 Inrinni leh 3.8.2014 Sunday inkar chhunga Borkhola, Assam atanga LPG phur motor, Vairengte Supply Check Gate a in report te : 1.Zopuii Gas, Aizawl ta tur Truck 2 phurh cylinders 576 2. MIZOFED Aizawl ta tur Truck 1 phurh cylinders 306 3. V. Neihkunga Gas, Aizawl ta tur Truck 1 phurh cylinders 288 4. Biakkungi Gas, Aizawl ta tur Truck 1 phurh cylinders 288 5. Zothan Indane, Aizawl ta tur Truck 1 phurh cylinders 288 6. Suakchhunga Gas, Aizawl ta tur Truck 1 phurh cylinders 306 7. Vanbuangi Gas, Aizawl ta tur Truck 1 phurh cylinders 306 8. Assam Rifles, Aizawl ta tur Truck 1 phurh cylinders 306 9. Fidelia Gas, Hnahthial ta tur Truck 1 phurh cylinders 306 10. Mamawia Gas, Khawzawl ta tur Truck 1 phurh cylinders 306 11. Auva Gas, Vairengte ta tur Truck 1 phurh cylinders 306 12. Guwahati atangin Mualkhang ami tur Bullet Truck 10 (sawm) ** Heng LPG phur te hi Vairengte leh Aizawl inkarah te hun engemaw chen an la thang leh thin avangin lo thleng tawh anga ngaih mai loh tur, tiin Distributors lam atangin thu kan dawng a ni.
Posted on: Mon, 04 Aug 2014 02:11:41 +0000
Recently Viewed Topics
© 2015